Read Tobelo O PENGKHOTBAH 5 Bible Online

O PENGKHOTBAH 5 - Tobelo bible

O PENGKHOTBAH 5

¹Notemouahi nomapikirokahi, de uha kalioli itaiti nojaji ma Jou Madutuika. Unanga naga o horogaka deʼ ngona naga o duniaka, ho, nomahidodiai deʼ ani demo-demo.

²Iholoi ani hininga ihuha, iholoi ilamoko yakunu namake o nanare itotorou. Iholoi iwöe o demo, iholoi ilamoko yakunu ihihupu o bodo mademo-demo.

³Ho, nako ngona nojaji ma Jou Madutuika, kiani nohi ganapu i tiai. Unanga wäigoua o nyawaika yodiai ibodo. Hababu gënanga, nohi ganapu ani jaji.

⁴ Iholoi yaoa ngaro uha nojaji, nako nojaji de nohi ganapuua.

⁵Uha ani demo-demo inidiai ngona nobaradoha, hiädono ngona pakisa notemo maimamika wilöleleani ma Jou, ngona nahowono nahetongo o jaji. Mangale okia ma Jou Madutu widiai woningamo ngonaika hiädono wawedere ani karajanga mahasili?

⁶Hokä sarakia o nanere mangöe gënanga koiwa mamangarati, hoko genangö o demo mangöe-ngöe koiwa mabaraguna. Mä niwï modongo ma Jouika.

⁷Uha noheranga nako namake yokokuaha yätuku o mihikini manyawa, yaora toönanga manga haku deʼ yahidoakua önanga o adili. O pegawe magetongo wihohongino ai baluhu deʼ yahinoto wahohongino o pegawe iholoi ikurutil̄e ai pangakati.

⁸Hoko genangö ma koano ai ngango imahigagao o gugutuku mahasilino.

⁹O nyawa malako kao tiwika, komaiwahi yawedono manga tiwi; o nyawa ihidodogohanga o arata komaiwahi yogihounu de manga utumu. Mata-mata kaparahaja.

¹⁰Iholoi iwöe ai kaya womatengoani iholoi iwöe o nyawa mahomoa kiani wahidöaka yol̄omo. Koiwa mautumu mangale wapake-pakeino, ünanga duga-duga wohiöriki ünanga wokaya.

¹¹Womatengo wokö karajanga mudukua iwiwedonua toünanga ai inomo, kemakuranguku ünanga yakunu womaidu iwi kioko. I idulu yaino, womatengo o kaya o arata hoko gënanga mangöe hiädono ünanga wakunua womäidu karana kawo hawa-hawanika.

¹²Tamake o duniaka nënanga okianaga moi manga hininga yahuha: Womatengo watoporono o arata mangale maöraha o kuranga.

¹³Mä o arata gënanga ihihanga karana moi o bodito, hiädono okiaua yakunu wahipuhaka ai ngoha-ngohaka.

¹⁴Ngone homakil̄au de nanga hekonoka; hoko genangö ngone hamal̄a o dunia nënanga, okia-kiaua hao hagala tongone nanga huha de nanga kangelaino.

¹⁵ Genanga igoungu nanga hininga yahuha! Ngone höiki hokä maöraha ngone öraha nënanga hoböa. Ngone homahi kokangela mangale hoginïki o hidal̄oko, deʼ okia mahasili?

¹⁶Madekanino ngone howango, ngone homahi bobal̄anga o huhutu magoronaka, ngone homahi huha-huha, hohawatere, haigoua deʼ nanga hininga yohiri.

¹⁷Done ngohi tomangarati duru yaoa mangale ngone enagënanga o ngol̄omo, o ngokere deʼ hajame tongone nanga karajanga mahasili madekana o ngango madodipoko ma Jou Madutu wonahi doa-doaka ngoneino; gënanga okia idadi de ngone.

¹⁸Nako womatengo watarima o kaya deʼ o arata ma Jou Madutuino, deʼ ünanga wihigumal̄a wajame o kaya gënanga, kokiani ünanga wamao wosukur deʼ wajame hagala ai karajanga mahasili. Genanga gangö ma Jou Madutu Ai ngongike.

¹⁹Ma Jou Madutu wohitotomo o nyawa manga hininga gënanga de o morene, done ünanga ai hininga ihuhaua wapikiri mangale ai ngango mamodipoko gënanga.