Read Tobelo O PENGKHOTBAH 6 Bible Online

O PENGKHOTBAH 6 - Tobelo bible

O PENGKHOTBAH 6

¹Tamakeoli koiadilua duru yätuku o nyawa o duniaka nënanga.

²Mamoi-mamoi ma Jou Madutu wahidöaka o kaya, o horomati deʼ o arata womatengoikani, hiädono koiwaka wonahihuoli. Mä ma Jou Madutu wihigumal̄aua ünanga wajame mata-mata o ngongike gënanga. I idulu yaino, o nyawa iwinako-nakoua aha wajame o kaya gënanga. Hoʼ, mata-mata gënanga kaparahaja deʼ kaohininga mahuha.

³Ngaro womatengo toünanga aingohaka yaratuhu moi deʼ wowango tedekana hiädono wadono o umuru magurutu, mä nako ünanga wamaoua o utumu deʼ kowamakeuaoli o jere ipatu-patutu, done imoteke ahidamake, o ngohaka magil̄au makil̄auino i honenge yaoa mawowango ngaro deo nyawa gënanga.

⁴Hababu mangale o ngohaka magil̄au gënanga idadiua o loleha boteka ënanga ihingohaka ekola kowali; ënanga ioiki o huhutu magoronaika, daha demajapatioka hawohanga.

⁵Komaiwahi ënanga yamake o wange madararono, deʼ enangö i mangaratiuahi okia o ngango nënanga, hiädono ënanga yakunu imarubaiha dei rirïdi.

⁶Deʼ gënanga iholoi yaoa ngaro o nyawa yowango o taongo o ratuhu hinoto, mä komaiwa youtumu, koigoua yahinoto yöiki o ngï kaimatero dika?

⁷O nyawa yokarajanga duga-duga mangale o ngol̄omo, mä komaiwahi yamao yäwedono.

⁸Ho, okia manga utumu o nyawa yososawaro hohitero de o nyawa bodo? Okiali mabaraguna nako o nyawa mihikini manga kalakuanga yaoa o kawaha manga hidogoronaka?

⁹Mata-mata gënanga kaparahaja hokä ohidal̄oko yoginïki. I holoi yaoa ngone inawedono de okianaga ngoneoka ngaro hoko genangika honahihu iholoi iwöeoli.

¹⁰Hagala moi-moi nanga naga, madekanoka naga. Ngone hohiöriki o nyawa yakunua yalawani iholoi yokuata ngaro de ünanga.

¹¹Iholoi itedekana ünanga walawani, iholoi koiwa mamangarati ai demo-demo, iholoi o utumu okia-kiaua ünanga wamake.

¹²Sarakia o nyawa yakunu ihiöriki okia iholoi yaoa unangika ai ngango magoronaka itötotipoko deʼ koö iwa-iwa mabaraguna, deʼ yakaino hokä o gurumini? Sarakia womatengo yakunu womangarati okia aha idadi o duniaoka nënanga ünanga kadei wiwaka?