Read Tobelo O PENGKHOTBAH 7 Bible Online

O PENGKHOTBAH 7 - Tobelo bible

O PENGKHOTBAH 7

¹ O romanga mabounu mahemoro iholoi yaoa ngaro deo minya maija magogurutil̄e; deʼ mawange o honenge iholoi yaoa de homa kil̄au mawange.

²Iholoi yaoa hoiki o duka matauika ngaro deo rameanga mangï ika. Hababu ngone kiani salalu hohininga o nyawa moi-moi inadamä o honenge.

³O hininga mahuha iholoi yaoa ngaro deo giete. Ngaroka o biono kaiduka, iti o hininga isanangi.

⁴O nyawa bodo gila-gila yanïki o sanangi; o nyawa yososawaro salalu yapikiri o honenge.

⁵Iholoi yaoa yahidaaere o nyawa yososawaro, de yahigiriri o nyawa ihuha imangarati.

⁶O nyawa bodo manga giete koiwa mangarati, hokä o hihika youku mailingi.

⁷Nako o nyawa yososawaro yotipu, ibodo manga manarama; nako o nyawa yatarima o uru bokumu matiwi, yatorou manga hininga.

⁸Iholoi yaoa moi o perekara mabobaha ngaro dema muläenge; iholoi yaoa hosabari ngaro demagiria homahil̄e.

⁹ Uha demajapati ani awunu idoa; duga-duga o nyawa o bodo yagogono o janggutu.

¹⁰Uha noleha, ”Yadodoa o öraha mahira iholoi yaoa ngaro deo öraha nënanga?” Duga-duga o nyawa bodo yoleha hoko gënanga.

¹¹O nyawa yowango-wango kokiani yobarija; manga barija maragane imatero de manga puhaka;

¹²imateroli deo tiwi i hidöa-döaka o mamao isosanangi. Okia hongoli o ganako ma ngale barija! O nagona madutu aha yohalamati.

¹³Niohohininga ma Jou Madutu Ai karajanga. Hababu o nagona yarikoto okia ma Jou Madutu wapeleokoka?

¹⁴Ho, nomorene nako ngona magogiria noutumu. Mänako ngona inibaanga o bodito, uha nawohanga ma Jou Madutu wonihidöaka hinoto. Ngone nohiörikua okia idadi ihikaika.

¹⁵Ahi ngango koiwa mabaraguna, ma towango madekana gënanga tamake enagënanga: Mamoi-mamoi o nyawa maoa-oa yobinaha, ngaro önanga yotebini. Mamoi-mamoi o nyawa madorou manga umuru ikurutu, ngaroka önanga hoko genangika yobaradoha.

¹⁶Uha kaliolo yaoa deʼ uhali kalioli niomabarija. Okia mabaraguna nia toma nia diri?

¹⁷Uha o kalioli itorou ekola nibodoholi. Mautumu okia nihonenge maörahauahi?

¹⁸Nimahi rehene hinoto kangano gënanga. Nako ngone himodongo ma Jou Madutuika, maraioka ngone hohasili yaoa.

¹⁹O barija iwidiai madutu iholoi woputurungu ngaro de yokokuaha yangimoi o kota moioka.

²⁰O duniaka nënanga moiua o nyawa yotiai; koiwa salalu yodiai yaoa deʼ komaiwahi yobaradoha.

²¹Uha noigo nohigihene o ade-ade, o nagona ihiöriki ngona magogiria womatengo wolöleleani wohihilai.

²²Ngona mahireteö mänamao o nyawa mahomoaö mamoi iböto nahilai.

²³Mata-mata gënanga tauji de ahi barija. Mä iholoi talingiri o barija gënanga, iholoi ikurutika ënanga de ngohi.

²⁴O nagona yakunu yamake o ngango mamangarati nënanga? Ilukuholi mangale yakunu homangarati!

²⁵Mä ngohi tongohono tomädotoko deʼ talingiri oganako, hupaya tamake o barija deʼ o bobaluhu mangale hagala ololeha. Ngohi tohitaili tomangarati o baradoha gënanga o bodo, deʼo dorou ganga tahaduliua.

²⁶Ngohi tamake o ngoheka iholoi imali ngaro deo honenge. O ngoheka manga nahihu hokä o jä deʼ o dadagoko imäboboto yatagoko mainomo. Yokololo hokä o alara yaliko yakeketino. O nyawa yadodiai ma Jou Madutu Ai mau yahirehene de ai modoi, mä o nyawa baradoha maraioka aha yätagoko.

²⁷Niolega, wapöpiki-pikiri ai demo: Mata-mata gënanga tamakeoka, maöraha o aguru itagali deo aguru tölingiri mabobaluhu.

²⁸Ngohi kato lingirohioli hagala mabobaluhu mahomoa, mä ihasilua. O nyawa yaribuhu moi manga hidogoronaka, tamake womatengo o nauru tihohoromati. Mä toönanga manga hidogoronaka koiwa o ngoheka yakunu tähoromati.

²⁹Duga-duga nënanga tamake: ma Jou Madutu wonadiai ngone maduga-dugaka de biaha. Mä ngone mahirete hadiai tongone nanga diri hohihuha dei ikokiloliti.