Read Tobelo O PENGKHOTBAH 9 Bible Online

O PENGKHOTBAH 9 - Tobelo bible

O PENGKHOTBAH 9

¹Mata-mata gënanga tapikiri de madiai. Ma Jou Madutu watatoro o nyawa manga ngango yaoa deʼ isawaro, nako o nyawa gënanga yädohata ekola yahininga. Koiwa ihiöriki okia aha idadi o wange maduruino.

²I goungu, okia idadi kaimatero yatapal̄u o nyawamagetongo: O nyawa manga hininga iriko-rikoto yaoa o nyawa itotorou manga kalakuanga, o nyawa maoa yaoa o nyawa madorou, o nyawa yotebi-tebini yaoa o nyawa yopese-peseke o nyawa ihihö huba-huba o huhuba yaoa kowali. O nyawa maoa iholoiua youtumu deo nyawa yoböbaradoha, o nyawa yokökobo-koboto kaimatero dika deo nyawa yolu-oluku yokoboto.

³Ho, okia idadi kaimatero dika yatapal̄u önanga mata-mata. Deʼ gënanga moi o hali o hininga mahuha hokä sarakia dika hagala idödadadi o duniaka. Ai wowango madekanino o nyawa manga hininga iomanga deo dorou, deʼ ai pikirangö iomanga o bodo. Daha itodokanino ünanga wamake ai ajali.

⁴Mä madekanino kayowangohi, madekana gënanga naga o nganono. Koigoungua o kaho mangango iholoi iutumu ngaro deo singa koiwa majiwa?

⁵Makurangua, o nyawa yowango-wango ihiöriki manga ajali yadodamä, enahioko o nyawa yohone-honenge okia-kiaua ihiöriki. Unangika koiwa mahewa ekola magilioro, deʼ ai romanga yawohangoka.

⁶O mamao o ingigo o dohata ikali ai nahihu, mata-mata i honenge imakinïki de ünanga. O hidoku okia-kiaua ünanga womäl̄ëoli hagala o dodadi magoronaka o duniaka.

⁷Ika, niol̄omo dika deʼ nimorene, niokere niaangguru de niahininga imore-morene. Ma Jou Madutu wokabaratangua, koaholi ünanga ai hininga yadaene.

⁸Mal̄aika anibiono itararono dei wangoro.

⁹Najame nowango de ngone hekata nomiö igo-igo aniwowango madekana ipoparahaja, ma Jou Madutu wonihidöa doa-doaka ngonaika o duniaka. Najame o wange ihigetongo ngaroka ibaragunaua. Hababu anihuha de anikangela mahewa duga-duga gënanga dika.

¹⁰Nia karajanga hagala niamanarama de niakuata niododoomuino. Hababu aha koiwakaoli o pikiranga ekola o karajanga. Koiwaka o dodotoko ekola o barija o nyawa yohone-honenge manga duniaka. Deʼ genangika ngona aha nöiki.

¹¹O duniaka nënanga nagali tamake: o rorebe hoko genangikaua yäutumu mangale o nyawa yotö tai-taiti imapopata, o parangi hoko genangikaua yäutumu mangale o nyawa yokö kua-kuata. O nyawa yobobarija hoko genangikaua yamake o lolingiri matiti. Deʼ o nyawa yososawaro hoko genangikaua ima make o kaya. Duru yanö nako-nako hoko genangikaua kayäheto-hetongo. Hababu o nagona dika yakunu yabänga manga wowango maukuru itotorou.

¹²O nyawa ihiorikua muruonoka maöraha iböa. Hokä o totaleo yamodoi deʼ o nawoko yajä, hoko genangoli o nyawa yabänga o bodito maöraha hanako-nakoua.

¹³Yanikino nënanga naga moi o nonako yakorona de madiai sarakia o nyawa ihilö amo-amoko o barija.

¹⁴Naga moi o kota maiteteke manga huhutulu manyawa. O wange moiuku womatengo ma koano wolamo-amoko woböa waparangi o kota gënanga. Unanga wohigilolitoka deʼ womahidodiai wongohama mabebeno o mehele.

¹⁵O kotaka gënanga naga womatengo o mihikini wobobarija. Unanga wakunu wohihalamati o kota gënanga. Mä karana ünanga womihikini, ai oa-oa demajapati yawohanga deʼ moiuaö iwihininga unangika.

¹⁶Ho, itiai ahi damake o barija yatilakuru o kuata. Ngaro hoko gënanga, o nyawa mihikini manga barija yolegaikaua. Ai demo-demo koiwa yohiningaika.

¹⁷Iholoi yaoa hohigihene ai demo-demo irö rirïdi womatengo de ai dododotokoka ngaro de womatengo wokokuaha woma poa-pöaka hagala o nyawa yobodo-bodo manga doomu magoronaka.

¹⁸O barija iholoi ibaraguna ngaro deo dae, mä o hurutu o dututu moi yadadi dorou o susu o bohoko moi.