Read Tobelo O KIDUNG AGUNG 1 Bible Online

O KIDUNG AGUNG 1 - Tobelo bible

O KIDUNG AGUNG 1

¹ O nyanyi imomulia o Salomo watö tuli-tulihi.

²Nohi ame ngohi de aniuru makai; aniigo iholoi ijame ngaro de o angguru!

³Ngona anibounu mahemoro ifulaja, aniromanga hokä o minya mabou-bounu ikopoa; hababu gënanga o momoholehe inïigo ngonaika!

⁴Homä tai-taiti ngone, yäahi koano, nohiao ngohi anikamari magoronaika. Karana ngona ngomi mata-mata mimorene, deʼ mihigiriri ani igo yaholoi de o angguru; ipatutu o momoholehe ini igo ngonaika!

⁵Ngaro totaromo, ngohi tohailoa, hei Yerusalem ma koano manga momoholehe; ahi madaromo hokä o Keder manga tau, mä marahai hokä o Salomo ai kadato maguba!

⁶Uha nolegaika ahi kai mamadaromo, hababu ngohi ihi dahauku o wange madararono. Ahi ria-riaka ihi ngamo ngohino, deʼ ihi huloko ngohi tokarajanga o angguru madumuleoka; ngohi koiwa ahi öraha tohi dailako ahi diri mahirete.

⁷Nahetongo, hei ahi mamane, kiaka ngona nogoana hagala o duba, kiaka näidu önanga maöraha o bimaoaoka? Kiaka yakunu ngohi aha hokä tongika ngino ani dodiawo manga duba matika magoronaka?

⁸Kiaka yakunu nohiorikua mangï, hei ani rorahai o ngongoheka manga hidogoronaka? Nanïki dika o duba matika mario, deʼ nogoana hagala ani kabingi o gogoana-o gogoana manga tau-tau madatekoka.

⁹Ngohi mamane, ngona matero-tero o kuda mabeka yatauru ma koano Mesir ai kereta.

¹⁰Ani gotoaka mahailoa o poromu mahidogoronaka, ani tomara mahailoa de o gule o paramata.

¹¹Ngomi minïdiai o poromu o gurasi ngonaika, de o manyi-manyi o haaka.

¹²Maöraha ahi koano ai ngidu-ngiduoka ahi narwastu mabounu ifulaja.

¹³Ahi mamane hokä o mur mabounu, maöraha woma rubauku ahi aluku.

¹⁴Ahi mamane matero-tero o guabebe o lihunu moi o En-Gedi ma angguru madumule-dumuleoka.

¹⁵Ngona ani hailoa koani rahai, katonihi bohono, i goungu ngona nohailoa! Ani lako hokä o namodara.

¹⁶Ngona animohora, hioko, i goungu ngona ani mohora! Tongone nanga ngidu-ngidu o mo maijo-ijoka.

¹⁷O aras mautu idadi tongone nanga tau maliate, deʼ o liwewuru mautu toënanga malotenge.