Read Tobelo O KIDUNG AGUNG 2 Bible Online

O KIDUNG AGUNG 2 - Tobelo bible

O KIDUNG AGUNG 2

¹Ngohi duga-duga o mawar mabunga o Saronino, o bakung mabunga o wai-waioka.

²Hokä o bakung mabunga o mo marubu-rubu mahohihika mahidogoronaka, hoko gënanga ngohi mamane o koano manga momoholehe manga hidogoronaka.

³Hokä o apel mautu hagala o gota o honganoka mahi dogoronaka, hoko gënanga ahi mamane o nyawa o nau-nauru manga hidogoronaka. Ngohi tosanangi toma hohongo matimioka, hagala mahohoko tamao mamutiti.

⁴Wohi ao ngohi o rameanga mangï ika, ai lolega ngohino i omanga o igo.

⁵Ihihi kuata ngohi de o angguru mahohoko mamuti-mutiti, ngohi ahi röehe na awunu de o apel mahohoko, hababu ngohi tohi panyake o nahihu.

⁶Ai giama mahigili wohitumungil̄e ahi häeke, ai giama maniraka wohihiköuku ngohi.

⁷Nijaji, hei o Yerusalem mamomoholehe, de hagala o maijanga deʼ hagala o kijanga o tonaka malua-luasoka, ngini nia rüaeua o igo, hiädono ënanga yakihounu.

⁸Ni ihene! Ahi mamane woböa! Unanga hokä o maijanga ekola o kijang mangohaka. Ima tototubo ol̄oku-l̄okuoka, imapopata o dodoporonoka. Nio lega, o bebeno o mehele maporetoka ünanga woma okoino, de ai lako ünanga wohi lingi-lingiri; wohi donga o jangela mataralino.

¹⁰Ni ihene, ahi mamane wohï ade-ade ngohino. Noböa tonihibö boho-bohono, naino tongohi nohohailoa!

¹¹Nolega, maöraha o dumamata inatilakuroka, maöraha o awa-awana ipahaka.

¹²O dumuleoka o bunga-bunga ikokihohe; o öraha ipöpoporo iböaka; o pombo mailingi hoihene tongone nanga tonakoka.

¹³O ara mautu imuläenge ihohoko, o angguru mautu mahuri mabounu ifulaja. Noböa tonihibö boho-bohono, naino tongohi nohöhailoa.

¹⁴O, ahi namodara o helewo madonga-dongaka, ima ngiunu o gelehoro-gelehoro ibako-bakoroka, tanu iti tamake ani biono, deʼ toihene ani ilingi, hababu ani biono ihailoa, ani ilingi il̄ouhu.

¹⁵Natagoko hagala o gito gënanga, hagala o gito ma alu-aluhu yabobinaha o angguru madumule, hababu tongomi mia angguru madumule magogiria ihero.

¹⁶Toahi mamane tongohi madutu, deʼ ngohi toünanga madutu, ünanga wögoana ai duba-duba o bakung mabunga mahidogoronaka

¹⁷hiädono o ngorumino mahidaloko iwuwu yahihanga o huhutu. Noma idulu, ahi mamane, hokä o kijang, hokä o maijanga mangohaka o Beter de mal̄oku-l̄okuoka.