Read Tobelo O KIDUNG AGUNG 4 Bible Online

O KIDUNG AGUNG 4 - Tobelo bible

O KIDUNG AGUNG 4

¹Ngona ani hailoa ani peha-pehanil̄e, katonihi boho-bohono, igoungu, ngona ani hailoa ani peha-pehanil̄e. Ani lako ani kokudu maporetoka hokä namodara; ani tadauru hokä o kabingi matika o Gilead madoporonoka de iuti.

²Ani ingiri mamagarehe hokä o duba matika daha yakorioka deʼ yaohikoka; ima kokahabi hokä o duba mangoha-ngohaka ihago, kamoiö mai hihangua.

³Ani uru makai hokä o pita madoka-dokara o ramini moi, deʼ ani uru marahai. Ani gotoaka hokä o delima mahohoko ibelakil̄e, ima ngiunika ani kokudu maporetoka.

⁴Ani tomara hokä o Daud ai candi, wohi goko mangale wö gogono o dae. Ani gule kaimatero o dadatoko o ribuhu moi, yobobarani mata-mata manga boboha.

⁵Ani huhu matero-tero maijanga mangohaka hinoto, o kijang mangohaka ihago magogiria i ol̄omo o bakung mabunga-bunga mahidogoronaka.

⁶Ngohi tonahihu toiki o mur mal̄okuika, o manyanyi madoporonika, hiädono o ngorumino mahidaloko iwuwu, yahohihanga o huhutu.

⁷Ngona duru nohailoa, tonihibö boho-bohono, koiwa makuranga ngonaka.

⁸Naino ngone houti o Libanon de hauku, tonikö kawi-kawingi, naino ngone houti o Libanon de hauku. Houti o Amana matubuoka de hauku, o Senir deʼ o Hermon matubuoka de hauku, o harimau deʼ o singa mangï yogogogere.

⁹Ngona duru ahihininga yadaene, dodoto, tonikö kawi-kawingi, de ani lolega ngona duru ahihininga yadaene, deo gurasi deo haaka marorahai ani guleoka.

¹⁰Hokokia majame ani igo, dodoto, tonikö kawi-kawingi, iholoi ikurutika majame ngaro deo angguru. Ani minya mabounu mahemoro ifulaja, yatilakuru hagala rupa o rampa.

¹¹Ani demo-demo mamutiti, tonikö kawi-kawingi, hokä o madu madutu deʼ o susu. Ani pakeanga kaimatero mabounu de o Libanon mal̄oku.

¹²Ahi mamane ganga o dumule mabebeno o mehele, o dumule mabebeno o mehele, o jobubu ikusino.

¹³Dokengoka iwango o delima mautu-utu, dema hohoko duru kohä hemoro. O maratana o guabebe deʼ narwastu,

¹⁴o narwastu, o gurati, o kayu manis deʼ o ugaka, de i rupa-rupa o manyanyi mautu. O mur deʼ o gaharu, de irupa-rupa o rampa i iri-irikoka.

¹⁵O jobubu ahi dumuleoka ihi buaele o akere mangango ihahuru o Libanon de yaino!

¹⁶Nomomiki, hei koremie, no böa, hei korehara! Nia wuwu ahi dumuleoka, mal̄aika mabounu ifulaja. Tanu ahi mamane woböa ai dumuleika, deʼ wa ol̄omo mahohoko ihö hemo-hemoro.