Read Tobelo O KIDUNG AGUNG 6 Bible Online

O KIDUNG AGUNG 6 - Tobelo bible

O KIDUNG AGUNG 6

¹Okiaika ani mamane woiki, hei moholehe duru nohöhailoa? Kiaika woiki ani mamane, la ngomi mininïki hïlingiri?

²Ahi mamane woiki ai dumuleika, o rampa-rampa madumuleika mangale wogoana o duba-duba o dumuleoka, deʼ wopagele o bakung mabunga-bunga.

³Ngohi toahi mamane madutu, deʼ ünanga tongohi madutu, ünanga wogoana o duba-duba o bakung mabunga-bunga mahidogoronaka.

⁴Ngona nohailoa, toni boho-bohono, imatero marahai o Yerusalem makota, imatero mahailoa o Tirzah makota. Ngona duru näheranga, hokä o tentara maduduono de manga benderaoka.

⁵Nohi niporo anibiono ngohioka, hababu anilolega ihi bingu ngohi. Ani tadauru hokä o kabingi matika yauti o Gilead madoporono-doporono.

⁶Ani ingiri mamagarehe hokä o duba matika ipahaino yakori deʼ yaohiki; imakokahabi hokä o duba mangoha-ngohaka ihago, kamoiö ma ihihangua.

⁷Ani gotoaka hokä o delima mahohoko ibelakil̄e, ima ngiunika ani kokudu maporetoka.

⁸Ngaroka naga o jou boki yamoributanga, deʼ o hekata paliara yamoritufange, ikali o momoholehe duru komanga ngöe,

⁹mä duga-duga kamoi ahi namodara, tonönahihu, ngomi ayo ami ngohaka momatengo-tengooka momihö haya-hayanga. Hagala o moholehe imi make deʼ imi higiriri munanga, hagala o jou boki deʼ o hekata paliara imï heranga munangika.

¹⁰O nagona munanga moböa matero-tero danengino ibatingoka, ami hailoa imatero o mede imatono, ani modararono imatero o wange? Munanga duru imï heranga, hokä o tentara manyawa de manga paji-pajioka.

¹¹Ngohi taika o niara madumuleika, tamake hagala o dubo muläenge ihohe o waioka; boteka o angguru ma utu naga dema dubooka, deʼ o delima mautu ihurioka.

¹²Ngohi duru tomau ani igo, hokä duru tomau tadoa o kereta ihi poparangi kamamoi hagala o nyawa yomomulia.

¹³Niselo, hei Sulam mamomoholehe, nima lololiti, hupaya ngomi minihi gogiria. Yadodoa ngini nioigo nihi pulono ngohi, ena hioko ngohi toselo yowuni-wuningi manga duduono mahidogoronaka?