Read Tobelo O KIDUNG AGUNG 7 Bible Online

O KIDUNG AGUNG 7 - Tobelo bible

O KIDUNG AGUNG 7

¹O moholehe ami jako irorahai, igoungu kohä hailoa ani l̄ou de o sandal gënanga. Ani uguru magookoro hokä o poromu, ai karajanga mahasili womatengo wogogarade.

²Ani wotiti hokä o udo-udomo mamohululunu, komaiwahi i kuranga o angguru igö ganu-ganu. Ani mamata hokä o gandum madoporonil̄e, yakilolitino o bakung mabunga.

³Ani huhu matero-tero o maijanga mangohaka hinoto, o kijang ihago hinoto.

⁴Ani tomara hokä o candi o gading. Ani lako hokä o lolupungu o Hesybonoka, o Batrabim ma ngorana ma amo-amoko madatekoka. Ani ngunungu hokä o Libanon mal̄oku macandi, yohimangika o Damsyik makotaika.

⁵Ani haëke hokä o Karmel madoporono; ani tadauru ihi rugihi hokä magoguhurungu, o koano womatengo iwï heranga.

⁶Igoungu ngona ani hailoa irahai, ini igo-igo ini sosanangi manga hidogoronaka.

⁷Ani roëhe majako imatero korma mautu, ani huhu mahohoko magobe.

⁸Ngohi tönahihu tadoa o korma mautu gënanga, deʼ tomä make hagala mahohoko. Tanu ani huhu hokä o angguru mahohoko magobe, ani womaha kaimatero mabounu mahemoro o apel mahohoko,

⁹ani uru mamutiti kaimatero o angguru mateongo! Mal̄aika o angguru gënanga ihahuru ahi mamaneika, de koi toa-toakua; deʼ yamomiki o nahihu maigo, ikali hagala o nyawaika magogiria ima iduoka.

¹⁰Ngohi toahi mamane madutu, ünanga wohi nahihu ngohi.

¹¹Naino ngone hoiki o tonaka malua-luasika, ahi mamane, deʼ homaidu o dumuleoka o guabebe mamaratana mahidö dogoronaka.

¹²Naino ngone höngoru-ngorumu o dumuleika, deʼ hölega boteka o angguru mautu ituboka, deʼ mahuri ihoheoka; boteka o delima mautu ihurioka. Dokengoka aha toni hidöaka ahi igo ngonaika.

¹³O Arak mautu mabounu mahemoro ifulaja, tongone nanga ngorana madatekoka naga hagala o hohoko mahemo-hemoro, madekanoka yapagele deʼ mahungi-hungiohi; gënanga tagogono mangale ngonaka, ahi mamane.