Read Tobelo O KIDUNG AGUNG 8 Bible Online

O KIDUNG AGUNG 8 - Tobelo bible

O KIDUNG AGUNG 8

¹Eh, hokä nako ngona ahiranga madutu, nomi huhuhuoka ngohi ayoika, maraioka ngona toniame tonimake o ngekomoka, moiua aha ihi hohedu ngohi.

²Ngona aha toniao ngohi ayo ami tauika, hupaya ngona yakunu nohï dotoko ngohi. Ngona aha toni okere o angguru mabounu ihemo-hemoro, deʼ o delima mahohoko mateongo.

³Ani giama mahigili nohihi tumungil̄e ngohi, de ani giama maniraka nohihi köino ngohi.

⁴Nijaji, hei Yerusalem mamoholehe, ngini aha niruaeua o igo hiädono ünanga iwi wedono.

⁵O nagona gënanga o tonaka makokakahaoka de yaino, momahi tangonoko ami mamaneoka? Toni tumomiki ngona o Apel mautu matimioka, mangï ngona inihiao deʼ inihingohaka.

⁶Nohidiai ngohi ani gate mabelaka, uha näkololo nagona ö dika mahomoa de ngohi; karana o igo gënanga imatero makuata o honenge, deʼ o nahihu ikuaha hokä o honenge. Madokara hokä o uku madokara ihiru, mahiru de homodongo.

⁷O akere koha amoko yakunua yahonenge o igo, deʼ o nguihi yakunua ihihahuru. Nako womatengo wohidöaka hagala ai arata mangale wohi ija o igo, maraioka duga-duga o hikauku wamake.

⁸Tongomi momatengo mia dodoto o ngoheka, kai etekohi ami huhu. Okia kokiani ngomi midiai munangika nako naga yoboa imidunia?

⁹O demo ma ade munanga moi o bebeno o mehele, aha ngomi mihigoko o candi o haaka ma l̄okuoka. O demo ma ade munanga moi o ngorana ma amo-amoko, aha ngomi mio dudukuru de o liwewuru magota.

¹⁰Ngohi nënanga moi o bebeno o mehele, deʼ macandi ahi huhu. Ahi mamane wohiöriki unangoka ngohi toutumu.

¹¹O Salomo Toünanga ai angguru madumule o Baal-Hamonoka; o dumule gënanga wohilapahi yogö goa-goanika. Moi-moi yofangu o tiwi o haaka o ribuhu moi mangale mahasili,

¹²deʼ yamake o ratuhu hinoto mangale manga kangela. Mal̄aika o tiwi gënanga mangale ngona, Salomo, deʼ mangale yogö goa-goana ani dumule. Maʼ ahi angguru madumule, tongohi mahirete, naga ahi himangoka.

¹³Hei, dumule magogoana, ani dodiawo yöigo yoihene ani ilingi; nohi toihene gënanga ngohino!

¹⁴Ahi mamane, woböa hokä o kijang, hokä o maijanga mangohaka o Beter ma l̄oku mabuturungoka.