Read Tobelo O YESAYA 1 Bible Online

O YESAYA 1 - Tobelo bible

O YESAYA 1

¹ O buku nënanga madol̄a o behehongo-behehongo mangale o Yehuda deʼ o Yerusalem ma Jou Madutu wohinyönyata-nyata o Yesayaika, o Amos aingohaka, maöraha o Uzia, o Yotam, o Ahas deʼ o Hizkia yopareta o Yehudaka.

²Noihene heidihanga, nohohininga heidunia! Ma Jou wotemo, ”O ngoha-ngohaka Tapö paliaraka ihi lawani Ngohino.

³O hapi winako madutu, o keledai yanako mainomo mangi wasosadia matuanga. Mä Ahi umati o Israeloka kowali; önanga imangaratiua.”

⁴Nibodito ngini o hoana deʼ o berera nibobaradoha, hagala o nyawa niabiaha itiaiua de itorou! Ngini inihangiharaka hagala niabaradoha. Ngini niwitilaka ma Jou de niwiporete ma Jou Madutu wo To tebi-tebini kokiani ngini niwihuba.

⁵Yadodoa ngini hokogenangika dika nimalawani? Ngini nimau inïhukumu iholoi itubuholi? Niahaeke iomangoka deo boro-boroho, niahininga de niapikiranga yohiri.

⁶Niahaekoka de yauku hiädono nial̄ou mahoatuku koiwa niaröehe itumuloa. Ngini iniomanga o nobo-noboho, o dinirihi deʼ o nabo-nabo. Nianabo-nabo gënanga itebinuahi ekola ipakiti, ihouruaö deo minya.

⁷Niaberera yabinahaoka; hagala niakota yatuhuku imata. Nia lako mahimangoka o nyawa maporetino yal̄ë niatonaka de yawedere hagala moi-moi.

⁸Duga-duga o Yerusalem igogogere, mä hokä o kota ihigororomino de imasikaua, hokä o dodogumu matau o angguru madumuleoka ekola o tau-tau o timu madumuleoka.

⁹ Hohiade ma Jou Duru Wo Kokuaha wonahi rehenua o nyawa yamuruono naga ngoneoka, ngone hobinahaka kamamoiuku, hokä o Sodom deʼ o Gomora.

¹⁰O Yerusalem, o tutuda-tutuda de niahoana yodadioka hokä o Sodom deʼ Gomora manyawa. Niihene okia waheto-hetongoka ma Jou nginika; niohohininga okia winïdoto-dotokoka tongone nanga Jou Madutu.

¹¹ Ma Jou wato, ”Niatobote Ngohi aha toigo mata-mata o huhuba hokogenangika nihihöhuba-huba Ngohino? Ngohi togihounu de hagala o duba o huhuba itotuhu-tuhuku deʼ niahapi mangohaka mahaki. O hapi manauru maawunu, o duba deʼ o kabingi toigoua.

¹²O nagona inihuloko ngini niao hagala o huhuba gënanga maöraha ngini niboa nipuji Ngohino? O nagona inihuloko ngini niridua ahi Tau iTebi-tebinoka?

¹³Parahaja dika niao niahuhuba gënanga. Mabounu ma Ngohi taemono. Ngohi todohata deʼ takunua tinimake ngini nihimulia o Mede ma Hungi, O Sabat mawange deʼ hagala o wange maago-agomo ikali hagala o agama madoomu. Mata-mata gënanga ngini nianoda de niabaradoha-baradoha deʼ marupa o momoku Ngohino; Ngohi ihiboleoka tatagongo.

¹⁵Nako ngini niagoraka niagiama mangale nimäniata, Ngohi toluku tolegaika. Tahaduliua hokokia mangöe nianiata, Ngohi toluku tohigihene, hababu de niagiama gënanga ngini nia hitomaoka manga ngöe. Niaihoro niadiri hiädono itebini.

¹⁶Ngini nia mal̄a mata-mata o dorou ngini niadodiai gënanga. Ya, uha niadiaioli o dorou,

¹⁷nimä dotoko niadiai o oa. Niasösö o adili deʼ niahihanga o manarama itotorou nihidöaka o gohihi madutuika toönanga manga haku deʼ niariwo o bobobao manga perekara.”

¹⁸Ma Jou wato, ”Niaino ngone hatiai o perekara nënanga. Ngaroko ngini niamodokara hokä o kahuba karana hagala nia baradoha, ngini aha Tini ihoro idadi niarehe nitebini hokä o kapasi. Ngaroka hagala niabaradoha iwöe deʼ itubuho, ngini aha Tini hiapongo i tötotomo.

¹⁹Nako ngini nimau nihihingounu Ngohino, ngini aha niajame mata-mata ma oa-oa ihihöhasi-hasili niaberera.

²⁰Mä nako ngini nihilawani Ngohi, ngini nihonenge o parangi magoronaka. Ngohi, ma Jou, totemo-temoka.”

²¹O kota mahira isatia o örahanënanga hokä momatengo ami röehe mahuku-hukunu! Mahira manyawa mata-mata yoadili de yorikoto, mä o örahanënanga yögogere hagala yotötoma-toma.

²²Yerusalem, mahira ngona hokä o haaka, mä örahanënanga koiwakali ani ija. Mahira ngona hokä o angguru mahemo-hemoro, mä o örahanënanga duga-duga kao akere mata-mata.

²³Anitutuda yotalawani deʼ manga l̄ou de manga giama i tohi-tohiki önanga yoigo yatarima hadia deʼ o urubokumu matiwi. Onanga yoluku yädemo o ngohaka o gohihi madutu o juruhakimoka; yoluku ihigihene manga huha maböaka o bobao.

²⁴Hababu gënanga o Jou Wo Kokuaha, o Israeloka manga Jou Madutu wotemo: ”Hei, Ahi haturu-haturu Ngohi aha tabalahi o hininga ini gögogono nginika, hiädono ngini nihihi huhaokauaoli Ngohi.

²⁵Ngohi aha todiai nginika. Hokä o nyawa yaihoro o gurasi deʼ o haaka, ngini aha Tini ihoro; hagala ipese-peseke Tohititoko nginioka.

²⁶Ngini aha Tinihidöakoli hagala o hakimi deʼ yononasihati hokä mahira. Done o Yerusalem aha ihiromanga o kota iadi-adili deʼ isosatia.”

²⁷Ma Jou woadili, done Unanga aha wohihalamati o Yerusalem deʼ hagala manyawa imatotoduba.

²⁸Ma hagala o nyawa baradoha iwilo lawa-lawani Unangika aha wähibinaha, deʼ mata-mata iwimö mal̄a-mal̄a Unanga aha wahohihanga.

²⁹Onanga aha yamake o mal̄eke karana yahuba hagala o gota deʼ yodingakoka hagala o dumule mangale hagala o gikiri.

³⁰Onanga aha yodadi hokä o gota mapako-pako mahoka imaai, deʼ hokä o dumule ma akere koiwa.

³¹Hokä o gandum maröehe madoolenge youku yoderero o uku mangaboho, hokogenangö hagala o nyawa yokokuaha aha yabinaha toönanga manga manarama itotorou mahirete, deʼ koiwa yakunu yatogumu o binaha gënanga.