Read Tobelo O YESAYA 10 Bible Online

O YESAYA 10 - Tobelo bible

O YESAYA 10

¹Nibodito ngini niadiai hagala o tita iadi-adili mangale niatuku Ahi hoana.

²De madatoro gënanga ngini niatatoko o nyawa mihikini yamake o haku deʼ o adili, deʼ niaora manga kiahononga o bobobao-o bobobao deʼ o ngohaka gohihi.

³Okia aha ngini nidiai ma Jou Madutu winihukumu ngini mawangeoka? Okia niakuata maöraha ”Unanga winïdotagao o bodito o berera magogurutoka de yaino? O nagonaika ngini aha nigahoko o roriwo? Okiaka aha ngini niangiunu nia kaya gënanga?

⁴Okia aha idadi duga-duga initoma o parangi magoronaka ekola inililiara hokä o dagokino. Mä ma Jou kawongamohi de kahirahi winïhukumu.

⁵ Ma Jou wotemo, ”Nobodito Asyur! O Asyur Tapake hokä o boboha deʼ o diki-diki o boboha mangale tahigohara hagala o nyawa yadödae-daene Ahi gangamo.

⁶Ngohi tahidingoto o Asyur mangale yaparangi Ahi hoana yososatiaokaua deʼ yadiai Ngohi tongamo. Ngohi tähuloko o Asyur mangale yäora deʼ yädohiki deʼ yapito-pitoko Ahi hoana o kafo o ngekomoka.”

⁷Mä ma koano Asyur toünanga aidatoro mahirete. Unanga wongumutuku mangale wapake de mabuturungu deʼ wabinaha o hoana mangangöe.

⁸Unanga womahil̄e aidiri, wato, ”Ahikokapita mata-mata o kokoano!

⁹Taora o Kalno deʼ o Karkemis, o Hamat deʼ Arpad makota. Taora ö o Samaria deʼ o Damsyik makota-kota.

¹⁰Tahohihanga o popareta yahöhuba-huba hagala o gomanga i holoi ikuaha naga o Yerusalem de o Samariaka tabinahaka.

¹¹O Samaria di mata-mata magomangata tabinahaka. Kaimatero aha tadiai o Yerusalemoka de mata-mata o gomanga yahöhuba-huba dokengoka.”

¹²Mä ma Jou wotemo, ”Nako tomau todiai o Sion maDoporono deʼ o Yerusalemoka gënanga ibötoka, Ngohi aha tihukumu o Asyur manga koano karana aiedenge deʼ aihininga magurutil̄e.”

¹³Ma koano Asyur womahil̄e, wato, ”Mata-mata gënanga tadiai de ahikuata mahirete. Ngohi tobarija deʼ taora toönanga ibobotukuoka. Hokä o banteng Ngohi tapito-pitoko hagala o nyawa yopopareta.

¹⁴O hoana deo berera manyawa o duniaoka hokä o totaleo maigutu, de magapanga toönanga manga arata tal̄e, hokä o nyawa yahookutu o gohi yamomal̄a-mal̄a maigutoka. Koiwa naga o gahuhu imahipopoka, koiwa yahelenga mauru ekola ipio-pio.”

¹⁵Mä ma Jou wotemo, ”Yakunoka o bahuku imahil̄e madiri o nyawa wapöpake-pakeika? Boteka o garagaji iholoi iragane de o nyawa wapöpake-pake?”

¹⁶Karana o Asyur manyawa imahil̄eoka mangadiri, ma Jou Duru Wokokuaha aha wadotagao o bobaku o panyake mangale wähukumu o tentara mangabalu-baluhu yokökua-kuata. Onanga aha yagogama magiria itogu-togumua hokä o uku yatuhuku hokogenangika.

¹⁷Ma Jou Madutu wotebi-tebini, o Israeloka manga Sahaya, aha wodadi hokä o uku madokara o wange moi magoronaka youku yamata hagala moi-moi, ikali o momo marubu-rubu mahohihika.

¹⁸Hagala o honganö irubu-rubu deʼ o dumule i boburere Asyur mabereraka aha yabinaha kamamoiuku, hokä o nyawa yopanyake madeka-dekanuku hiadono yohonenge.

¹⁹Hagala o gota aha igogogere mahuhutulu dika, hiädono o ngohaka maitetekö mayakunu yaetongo.

²⁰Maöraha aha iboa o Israeloka manyawa mahou yoota-otana kowalioka ihigagao mangawowango o hoana deo berera yokokuahaika ngadeke yahibinaha önanga, mä ma Jouika, o Israeloka manga Jou Madutu wotebi-tebini.

²¹O Israel manyawa mahou mahuhutulu aha imatoba ma Jou Madutuika wopöpoputurungika.

²² Ngaroka o Israeloka manyawa o örahanënanga kaimatero mangöe deo dowongi o ngötoka, duga-duga yamuruono nagadika aha imaidulu. Ma Jou Aihukumanga itigioka, de igoungu deiadili o hoana gënanga wäbinaha.

²³Iya, o berera yamode-modekika aha wäwedere ma Jou Duru Wokokuaha; gënanga toma Jou Aiputuhu, deʼ yakunua yangalioli.

²⁴Ma Jou Duru Wokokuaha wätemo Ai umatika yogögogogere o Sionoka, ”Uha niamodongo o Asyur manyawaika, ngaro önanga inituku deʼ inianiaya ngini hokä yadodiai o Mesir manyawa mahira.

²⁵O öraha madipoko magoronaka Ahi gangamo nginika imatogumu daha önanga aha Tahibinaha.

²⁶Ngohi o Jou To Kokuaha, aha tagohara önanga deo boboha, hokä Tägohara o Midian manyawa o Oreb mal̄oku ihohelewoka. O Asyur aha Tahukumu, hokä Ngohi tahukumu o Mesir.

²⁷O öraha gënanga Ngohi ahatinihibebasi ngini o Asyur mangakuahaino, deʼ önanga inikuahaokauaoli mangale ngini.”

²⁸O Asyur manga tentara yaoraoka o Ayat makota. Onanga yatilakuroka o Migron! Toönanga mangabilaono yamal̄a O Mikhmasoka!

²⁹Onanga yatilakuroka dodobongo deʼ imaidu o Gebaoka! O Rama manyawa, deʼ o Gibea manyawa yohaharoka, ma Koano Saul aikota, ihioaroka manga diri.

³⁰Nima pöaka, hei Galimma nyawa! Ni ihene, Laisya manyawa! Nihaluhu, Anatot manyawa!

³¹O Madmena deʼ o Gebin manyawa yoara imahiditoko.

³²O wange nënanga o haturu naga o Nob makotaka, deʼ dokengoka önanga manga dubu mabokoto ihi meta-meta o Sion ma Doporonika, o Yerusalem makotaika.

³³Ma Jou Duru Wokokuaha aha wäruba önanga hokä o jaga madengeeti yatol̄anga mautuoka. Duru imahiholoi il̄e deʼ ikurutil̄e mahidogoronaka aha yatobiki deʼ yaruba.

³⁴Ma Jou aha wäruba önanga hokä o gota o honanga magoronaka yatol̄anga deo bahuku. Ngaroka önanga yokuata hokä o gota duru i kua-kuata o Libanonoka, önanga aha yoruba dika!