Read Tobelo O YESAYA 11 Bible Online

O YESAYA 11 - Tobelo bible

O YESAYA 11

¹ Ma koano Daud aidifauku hokä o gota yatol̄angoka. Mä hokä sarakia maagerino iwango madori mahungi, hokogenangoli o Daud aidifaukuino aha woboa womatengo o koano.

²Ma Jou Ai kuaha aha iwituda ünanga, iwidiai ünanga aiakali yaoa deʼ wobarija, wosawaro wa l̄e maputuhu deʼ wadiai; wanako ma Jou Madutu Ai mau deʼ wimodongo Unangika.

³Ai igo enagënanga wihingounu ma Jouika. Unanga wäjuruhakimiua deo lolega o lakodadawi ekola wodomoteke o nyawa manga demo.

⁴ O mihikini manyawa wäjuruhakimi dema adili, o nyawa imasosikaua wädemo dema rikoto; o nyawa yahowo-howono wähukumu mangale de Ai pareta, o nyawa madorou wabinaha.

⁵ Unanga wodiai de maadili deʼ wosatia hagala moi-moi magoronaka.

⁶ O serigala aha igogere kamamoi deo duba, o macam tutul imarubaiha o kabingi madatekoka. O hapi mangohaka aha iol̄omo o momo imakinïki o singa mangohaka, deʼ o ngohaka maalu-aluhu wabiri ënanga.

⁷O hapi aha iol̄omo o momo kamamoi deo beruang, mangoha-ngohaka imaidu imakinïki. O singa iol̄omo o gandum maröehe madoolenge hokä o hapi.

⁸Hoko genangoli o ngohaka magil̄au yoboditoua nako imagogule o dodiha ibiha-biha madatekoka.

⁹ O Sionoka, ma Jou Madutu Ai Doporono i Tebi-tebini, koiwa naga itorou ekola ikilianga. O berera aha iomanga o ganako mangale ma Jou Madutu, hokä o akere yaomanga o ngöto.

¹⁰ Maöraha aha iboa womatengo ma koano Daud aidifauku idadi o hoana deo berera manga higihene matiti. Onanga aha yoboa unangika, deʼ aingï wogogogere aha ihigogiriri.

¹¹O wange gënanga ma Jou aha mamoioli wapake Ai kuaha deʼ waao wahigilio Ai umati mahou-hou o Asyuroka deʼ o Mesir, o Patros mabobereraka, o Sudan deʼ o Elam, o Babeloka, o Hamat deʼ o nünuhu magogurutika.

¹²Ma Jou aha wohidoa moi o bandera mangale hagala o hoana deo berera. Genanga manonako Unanga watoomu okali o Israel deʼ o Yehuda manyawa imahi kokabarihika hagala o libuku o duniaoka de waao önanga wahigilio.

¹³O Israeloka mapareta koiwakaoli yasanangua o Yehudaika, deʼ Yehuda yahaturuokauaoli o Israelokaika.

¹⁴Onanga imakinïki aha yaparangi o Filistin manyawa o wange madumuniha deʼ yäora o hoana deo berera o wange mahiwaroko. Onanga aha yautumu o Edom deʼ o Moab manyawa, deʼ o Amon manyawa aha imaponu onangika.

¹⁵ Ma Jou aha wadudungu o Suez ma Jiko. Unanga wadiai o hidal̄oko makua-kuata iwuwu hiädono o Efrat ma Ngairi idadi o akere maröehe tumidi magogowaha, deʼ o nyawa moi-moi yakunu yatobongo de imatarupail̄e.

¹⁶Mangale Ai umati mahou-hou aha naga o ngekomo maago-agomo mangale o Asyurino yohupu, hokä maöraha o Israeloka o Mesirino yohupu.