Read Tobelo O YESAYA 12 Bible Online

O YESAYA 12 - Tobelo bible

O YESAYA 12

¹Aha iboa maöraha ngini ninyanyi: ”Jou, ngohi tosyukur Ngonaika, karana Ngona nohilaru ngohi. Mahira Ngona nohingamo ngohino, mä o örahanënanga Ani gangamo itouroka.

² I goungu, ma Jou Madutu gënanga wohihihohalamati, ngohi tingaku Unangika. Ngohi tohawanua, hababu Unanga wohihi kuata ngohi. Wohihihohalamati enagënanga ma Jou Madutu, Unangika ngohi tonyanyi.

³Hokä o akere mamäta yamorene o nyawa manga kiriti yodudungu, hokogënanga ngini aha nimorene, karana winihihalamatoka ma Jou Madutu.”

⁴Aha iboa maöraha ngini nitemo, ”Nisyukur ma Jouika, deʼ niwihuba Unanga. Nihiabari o hoana deo bereraika Ai mulia deʼ hagala Ai manarama.

⁵Ninyanyi ma Jouika, hababu Unanga wodiai mangöe ihö hera-heranga. Mal̄aika o dunia yamode-modekika i ihene mangale Ai manarama.

⁶Nima uli-ulili hei Sion manyawa, ninyanyi de nimorene. O Israeloka manga Jou Madutu wotebi-tebini igoungu womulia, Unanga wogogere tingini niahidödogoronaka.”