Read Tobelo O YESAYA 13 Bible Online

O YESAYA 13 - Tobelo bible

O YESAYA 13

¹ Nenanga ma Jou Madutu Aibehehongo, watotarima o Yesaya o Amos aingohaka mangale o Babel:

²Niatubo o parangi mapaji-paji o doporono matubu i totoongoroka! Niaböaka o tentara, deʼ nihitoakika niagiama hupaya önanga yaparangi o kota mangora-ngorana maago-agomo yoede-edenge gënanga.

³Ma Jou waahokoka imahidödofo-dofo Wairikoka. Onanga yokuata, yängaku mangadiri, deʼ yakunu Unanga womahil̄e. Ma Jou wahimanarama önanga mangale yahukumu hagala o nyawa yakokorona Ai gangamo.

⁴Niihene o huru-hara mailingi ol̄oku-l̄okuoka, hokä o nyawa duru manga ngöe-ngöe mangadoomu mailingi. Niihene mangagigoro hagala o pareta deʼ o hoana deo berera magogiria imatoomu. Ma Jou Duru Wokokuaha watailako yopoparangi manga duduono.

⁵Onanga hagala o berera magogurutoka o dunia mabati-batingoka de yaino. Ma Jou Aigangamo magoronaka wäpake önanga mangale yabinaha o dunia yamode-modekika.

⁶ Nidodora, hababu ma Jou Aiwange itigioka, enagënanga o binaha mawange ma Jou Wokokuaha wodödotagao.

⁷O nyawa moi-moi aha yamao mangagiama yabole deʼ ihihanga mangabarani.

⁸Onanga mata-mata ahayatapal̄u o hawana kohagiria, deʼ yohirikiti mahiri hokä o ngoheka magogiria momagilianga. Onanga ahakaimakupulono de mangahininga ihuha, mangabiono itokara karana yamal̄eke.

⁹Ma Jou Aiwange aha iboa, deʼ mawange gënanga ma Jou Ai gangamo wohiaiki deʼ Ai muruka ikokiria. O dunia aha idadi o tonaka madoongoro ilua-luasika, deʼ o nyawa moi-moi yobobaradoha aha yobinaha.

¹⁰ O murumu moi-moi deʼ o murumu madoomu imatogumu itararono; o wange aha ihuhutu maöraha ënanga ipotoka, deʼ o mede aha itararonokauaoli.

¹¹Ma Jou wotemo, ”Ngohi aha tahukumu o dunia karana mangadorou, deʼ hagala o nyawa mangadorou karana toönanga mangabaradoha. O nyawa moi-moi mangahininga ikokurutil̄e aha Tahitipokouku, o nyawa imahil̄e-hil̄e deʼ mahayanga koiwa aha Tahukumu.

¹²O nyawa yahihohalamati duru manga huhutulu, önanga iholoi yoaguru yaika deo gurasi madutu.

¹³Ngohi ahatadiai o dihanga ihahara deʼ o dunia igiwi mangioka mawangeoka Ngohi, o Jou Duru Tokokuaha, tohidumutu Ahi gangamo.

¹⁴O nyawa maporetino yogogogere o Babeloka aha hohahibari-barihi deʼ yoara manga bereraika moi-moi. Onanga hokä o maijanga o niniaoka de ihioara manga diri, ekola o duba matika koiwa to ënanga magogoana.

¹⁵O nagona dika yätagoko aha yatuduku hiädono yohonenge.

¹⁶Onanga aha yahakihi toönanga manga ngohaka magogil̄au yawede-wederuku, toönanga mangatau-tau yaora deʼ toönanga manga heka-hekata yapakisa.”

¹⁷Ma Jou wotemo, ”Ngohi tagaraki o Madai manyawa mangale yaparangi o Babel. Onanga yakunua yäurubokumu de o haaka ekola deo gurasi.

¹⁸Deʼ toimi mal̄eha deʼ madotoönanga aha yätoma hagala o nyawa o goguduru. Onanga yahayangua o ngohaka magil̄auika deʼ yadoraua o ngohakika.

¹⁹ O poparetaino mata-mata, o Babel gënanga iholoi irahai deʼ idadi manyawa kaihigogiriri. Mä Ngohi, o Jou, aha tawedere, hokä Tadiaioka o Sodom deʼ o Gomoraika.

²⁰Moiokauaö aha yogogogeroli dokengoka. Moiua o Araboka ma nyawa yongongika-ngino aha ihigoko manga tau-tau o ngïoka gënanga, deʼ koiwa o gogoana aha yao manga kabingi de manga duba mangale ihiol̄omo o momo genangoka.

²¹ O ngï gënanga aha yogogere hagala o aiwani ihühuhuku. O wuku deo ginene aha imaigutu hagala toönanga manga tau-tauoka, deʼ o totaleo o onta aha igogere dokengoka. Hagala o kabingi ihühuhuku aha imatototubo magilianga mahidogoronaoka.

²²O kaho honganika deʼ o serigala aha malou mailingi i haluhu o Babel mabebeno o mehele deʼ o kadato-kadatoino. Maöraha iwedere itigioka iboa deʼ maöraha koitudaokaua.”