Read Tobelo O YESAYA 14 Bible Online

O YESAYA 14 - Tobelo bible

O YESAYA 14

¹Ma Jou aha wadora Ai umati o Israeloka, deʼ wairikoli önanga yodadi to Unanga madutu. Unanga aha wahigogeroli toönanga manga bereraka mahirete. O nyawa maporetino aha yoboa imakodogo dede önanga.

²O hoana manga ngöe aha yariwo o Israeloka manga hoana mangale yolio manga bereraika wahidödoa-döakoka ma Jou onangika, deʼ dokengoka o hoana deo berera gënanga aha imahi gilaongo o Israelokaika. O Israeloka aha yatagoko hagala o nyawa mamoi iböto yatotago-tagoko deʼ yapareta hagala o nyawa mamoi iböto yatötuku-tuku.

³Ma Jou aha wahibebasi o Israeloka manyawa o panyakeino deʼ o hangihara, deʼ o karajanga madodubuhoino yahipopakisa onangika.

⁴Nako ma Jou wodiai gënanga, önanga aha iwihohedu o Babeloka manga koano hokonënanga, ”Ma koano aihayanga koö iwa-iwa wootakoka! Unanga wakunokaua wonatukuoli.

⁵Ma Jou wohibobahaka yokokuaha itotorou manga pareta

⁶de manga dohata yätuku o hoana deo berera deʼ hokogenangika yaaniaya önanga.

⁷Mabaha o dunia yamode-modekika aha irïdi deʼ itumuloa, deʼ moi-moi o nyawa yonyanyi yomore-morene.

⁸O Libanon magota o eru deʼ magota o liwewuru imorene karana ma koano aihayanga koiwa-iwa gënanga wootakoka, deʼ ünanga woikoka, moiua yahuloko yätol̄anga önanga!

⁹O nyawa yohone-honenge manga dunia irame-rame iwitarima o Babel manga koano gënanga. Done imomiki hagala o nyawa manga jiwa mahira yokokuaha o duniaoka, deʼ o kokoano manga jiwa i momiki toönanga manga kadatoino.

¹⁰Onanga mata-mata iwiböaka unangika, ’Hei örahanënanga ngona hokä ngomi, nobole deʼ nomasikaua!

¹¹Mahira ngona inihoromati de o musik o kecapi, maöraha nënanga nagaka o nyawa yohone-honenge manga dunia irirïdoka. Hagala o gaili idadi anidangiri deʼ o kulubati idadi anigal̄oko.’

¹² Hei o Babel manga koano, mahira ngona o koruku o ngorumino noleto-letongo, mä örahanënanga nootakoka o dihangoka de nauku! Mahira ngona nahihanga o hoana deo berera, maöraha nënanga iniumo o tonakuku.

¹³ Ngona nomau nodoa o dihangil̄e deʼ nohigogere anikadato o murumu duru magogurutil̄e mal̄okuoka! Napikiri ngona yakunu nogogere hokä o koano ol̄oku o koremieuku idaduoka mal̄okuoka, hagala o gikiri imatotoomu mangï.

¹⁴Ngona notemo, ngona ahanodoa dakuil̄e magogurutil̄e o lobi-lobiil̄e deʼ nodadi hokä Duru Woko Kurutil̄e.

¹⁵Enahioko ngona inihi tudukuku mangï duru kohälukuuku o nyawa yohone-honenge manga duniauku.

¹⁶Onanga naga genangoka ahainipulono deʼ initailako ngona. Onanga ahayoleha, Neünanga manyawa wahahara o dunia deʼ watodokana hagala o pareta?

¹⁷Unanga wawöwede-wedere hagala o kota deʼ wangali o dunia idadi o tonaka makokakaha? Unanga nënanga komaiwahi wäpidili watago-tagokino ekola wamal̄aika önanga yolio?ʼ

¹⁸Mata-mata o hoana deo berera manga koano yajere-jereoka mario de makaramata manga jereoka moi-moi,

¹⁹mä ngona koiwa anijere; animaiyeti yaumo hokä o dori yatila, yopohukuku hagala yopoparangi manga maiyeti yohöhone-honenge o parangi magoronaka, deʼ ihikaweli kamamoi önanga o helewo mapidahika, hokä o maiyeti yapito-pitoko.

²⁰Ngona nabinahaka aniberera deʼ natoma anihoana mahirete. Karana gënanga ngona aha inijereua hokä o kokoano mahomoa. Moiua anitau manyawaino yatotorou gënanga aha yahihalamati.

²¹Yotö toa-toaka aha de majapatioka yomulaenge! Ani ngohaka o nau-nauru aha yohonenge karana toönanga manga ete de manga tohora manga baradoha. Moiua onangino aha yopareta o duniaka ekola ihigoko hagala o kota.”

²²Ma Jou Duru Wokokuaha wotemo, ”Ngohi aha taparangi o Babel deʼ tahohihanga. Moiua aha Tahihalamati, kaö ngoha-ngohaka Tamal̄aikaua yowango. Ngohi, o Jou, totötemo-temoka.

²³O Babel aha Tohidadi o lepa yogogere o wuku de o ginene. O Babel aha Tahehara tatebi-tebinoka. Ngohi, o Jou Duru To kokuaha, totö temo-temoka.”

²⁴ Ma Jou Duru Wokokokuaha wokoboto: ”Tohi dato-datoroka gënanga maraioka aha idadi.

²⁵O Asyur manyawa o Israel manyawaika Ahibereraka aha Tabinaha, deʼ naga Ahil̄oku-l̄okuoka aha Tapito-pitoko. Ngohi aha ahibebasi Ahihoana yatuku-tukuino deʼ manga dodubuhoino yapopakisa mangale o Asyur manyawa.

²⁶Nenanga Ahi datoro mangale o dunia; Ahi giama itoakika mangale tahukumu o hoana deo berera.”

²⁷Ma Jou Duru Wokokuaha waputuhoka mangale wodiai hokogënanga. Unanga watoakika Ai giama mangale wahukumu, deʼ moiua yakunu iwitatoko Unanga.

²⁸ Nenanga o behehongo ihingö ngahu-ngahu ma Koano Ahas wohonenge mataongo magoronaka.

²⁹ Hei, Filistin manyawa, o diki-diki o boboha niapöpake-pake mangale niahigohara itobikoka. Mä uha ngona nomorene, hababu nako o dodiha o dutumoi ihonenge, o dodiha iholoi i torouoli iboa yatagali, deʼ o dodiha magohi itutuku o naga de magogahuhuoka.

³⁰Ngini aha initapal̄u o habirokata kohagiria, deʼ mata-mata o nyawa mahou-houoli aha yätoma. I idulu yaino, o nyawa duru yomomihikini ma Jou Aiumatino ahayamake o inomo, deʼ hagala o nyawa imasosikaua ahayowango de irïdi isosanangi.

³¹Nidodora, deʼ nipöaka nigahoko o roriwo, hei hagala o Filistinoka mangakota! Kokiani ngini mata-mata nihawana nihaharoka! O lobi o kafo ikokapupu o koremieil̄e ihinonako o haturu manga duduono iboa; koiwa yohawana toönanga manga hidogoronaka.

³²O bobaluhu okia ngone aha hohidöaka hagala o huhulokika yoböboa-boa o Filistin manga bionino? Ngone ahahotemo onangika ma Jou wohigokoka o Sion, deʼ Ai umati yohöhangihara aha yamake o hohohongo genangoka.