Read Tobelo O YESAYA 16 Bible Online

O YESAYA 16 - Tobelo bible

O YESAYA 16

¹O Sela makota de yaino o tonaka makokakahaka, o Moab manyawa ihidingoto o duba mangohaka mangale yokökokuahaika o Yerusalemoka.

²Hagala o Moab manyawa yotama o Arnon ma Ngairi madatekoka ikali yotagi-tagi imahiorikokaua hokä hagala o totaleo yaduhu maigutoka.

³Onanga yatemo o Yehuda mangahoanika, ”Nitemo okia kiani ngomi miadiai. Nidadi ngomino o hohongo irirïdi o wangeoka mahau-haukoka, deʼ nïmimal̄aika ngomi migogere niahohongo magoronaka. Ngomi nënanga mimahi dito-ditoko; nimingiunu ngomi deʼ uha nisatiaua ngomino.

⁴Nimi higumal̄a ngomi mima hidodogumu niabereraka. Nimihohongino ngomi hagala o nyawa yomau imibinaha ngomi.” (Yotötuku-tuku deʼ yohiböbobinaha aha ipaha, deʼ hagala o nyawa yawöwede-wedere deʼ yatötuku-tuku o Israeloka mangaberera ihihanga.

⁵Ipaha womatengo o Daud aidifaukuino ahawodadi o koano, deʼ ünanga ahawäpareta aihöana de aidora deʼ o satia. Unanga ahawohigoko o adili deʼ majapati wadiai mangale wamanarama madiai.)

⁶O Yehuda manyawa yotemo, ”Ngomi miihenoka mangale o Moab manyawa manga edenge. Ngomi mihiöriki toönanga manga hininga magurutil̄e deʼ imahil̄e-hil̄e. Toönanga mangademo duga-duga imadodiai madol̄a.”

⁷Hababu gënanga mal̄aika o Moab manyawa imätekedodora. Mal̄aika önanga yoari nako imahininga mangainomo mahemo-hemoro biaha önanga yaol̄omo o Kir-Hareset makotaka. Mal̄aika önanga manga nganono itoaka deʼ yopoa-poaka mahiri.

⁸Hagala o dumule o Hesybon madatekoka deʼ hagala o Sibma maangguru madumule yabinahaoka, hagala o dumule biaha ihihasili o angguru duru maoa-oa mangale yakokuaha o nyawa deʼ yadiai önanga yädaluku. Mahira hagala o angguru madumule gënanga mangoatika hiädono o Yaezer makota; deʼ o wange mahiwaroko hiädono o tonaka makokakaha, deʼ o wange madumuniha hiädono o Honenge ma Ngöto mahononga.

⁹O örahanënanga ngohi togari o Sibma maangguru mautu hokä ngohi togari o Yaezer. Ngohi tauihi ahikongo mangale o Hesybon deʼ o Eleale, karana matonaka ma hasili o haturu yaol̄omo yamata.

¹⁰Moiokauaö yomorene hagala o dumule iboburereoka gënanga. Koiwa o ulili mailingi ekola yonyanyi o angguru madumuleoka. Koiwa naga yateo o angguru mangale yodiai o angguru mateongo. Ngohi tatogumoka toönanga manga morene maulili.

¹¹Ahi hininga ipoa-poaka deʼ iwede-wederuku tamake marupa o Moab deʼ o Kir-Heres.

¹²O Moab manyawa imahihuha de imahikangela yadoa o doporono ihihöhuba-huba toönanga manga puji mangï mangale imäniata, mä koiwa mahasili.

¹³Genanga o behehongo mahira wohidödoa-döaka ma Jou mangale o Moab.

¹⁴Deʼ öraha nënanga ma Jou wotemo: ”O taongo hangeoli yakokoronauku, hagala o kaya ihilamo-amoko o Moab aha ihihanga. Makawaha manga ngöe-ngöe aha idadi mangahuhutulokahi dika deʼ yobole.”