Read Tobelo O YESAYA 17 Bible Online

O YESAYA 17 - Tobelo bible

O YESAYA 17

¹ Ma Jou wotemo, ”O Damsyik marupa o kotaokaua, mä duga-duga magogilianga madohu.

²Hagala o kota o Siriaoka aha yodogumal̄aika mangale kahiado-adonika deʼ idadi o aiwani ipopaliara matika mangï; moiua ahayaduhu ënanga.

³O Israel aha ihihanga manga hohohongo deʼ o Damsyik ihihanga manga bebasi. O Siria manyawa mahou-houohi ahayowango o hikauku magoronaka hokä o Israeloka manyawa. Ngohi, o Jou Duru To Kokuaha, totemoka.”

⁴Ma Jou wotemo, ”Aha iboa maöraha o Israeloka mangautumu ipaha, deʼ mata-mata de maënanga ihihanga.

⁵O Israeloka aha hokä o dumule o Refaimoka yamata yautuku magandum, deʼ duga-duga mahou mahuhutulu.

⁶Hokä o Zaitun mautu yamata yapagele mahohoko, deʼ igogogere muruono nagaokahi dika majaga madeka-dekarika, hokogenangoli o Israeloka manyawa mahuhutulu dika aha yohalamati. Ngohi, o Jou, o Israeloka manga Jou Madutu, totemoka.”

⁷O wange gënanga o nyawa aha imaidulu yogahoko o roriwo Wohidödadadika, o Israeloka manga Jou Madutu wotebi-tebini.

⁸Onanga aha yonganonokauaoli toönanga mangamanarama mahasilino mahirete, enagënanga o huhuba-o huhuba mangï o dupa yoduhu-duhuku mangï, deʼ o Dewi Asyera madulada-dulada.

⁹O wange gënanga, hagala o Israeloka mangakota ipoputurungu mabebeno o mehele aha idadi ikilianga deʼ duru irïdi, hokä hagala o kota yododogumal̄aika mangale Hewi deʼ o Amori manyawa maöraha o Israel manyawaika de yaino önanga yoara.

¹⁰O Israel, ngona niwohangoka ma Jou Madutu wonihihohalamati de wonihohongino ngona hokä ol̄oku o helewo ikökua-kuata. Iduluyaino, ngona nodatomoka hagala o dumule mangale hagala o gikiri.

¹¹Mä ngaroka o dadatomo gënanga gila-gila itori deʼ ihuri mawange nadatomo, makoiwa naga mahasili. Duga-duga naga o huha de namao mahiri yakunua ihihanga.

¹²O hoana deo berera ikua-kuata magogiria yogigoro; mailingi matühu hokä o ngöto mamoku-moku ikokiria maruruhu.

¹³Onanga yotagi manga himangika hokä o nguihi homodo-modongo. Mä ma Jou Madutu womau wahiboditoönanga, daha önanga ihioara mangadiri hiädono magurutika. Onanga yaginïki hokä o afa o doporono magelehoroka ihihaili o hidal̄oko, ekola o kafo yawuwu o rato.

¹⁴Maöraha o bimaoa önanga yadotoboa o hawana kohagiria, mayododagika o ngorumino önanga yohihangoka. Genanga mangawowango moi-moi o nyawa inaora-ora ngone.