Read Tobelo O YESAYA 18 Bible Online

O YESAYA 18 - Tobelo bible

O YESAYA 18

¹ O berera moioka de yaino hagala o Sudan mangairi mahonoka yoihene makawuwu o longu-longu.

²O berera gënanga de yaino o huhuloko-huhuloko yatoaka o Nil ma Ngairi o pandan mangoti-ngotiri magoronaka. Hei, huhuloko-huhuloko nitötai-taiti, nilio itaiti niabereraika niatilakuru o ngai-ngairi gënanga. Niao moi o behehongo mangale nia nyawa yokua-kuata deʼ yonau-nauru, hagala nianyawa mangagogurutil̄e deʼ mangakai maalu-aluhu deʼ yämodongo o duniaka yamode-modekika.

³Hei, ngini mata-mata niogogogere o dunia! Niohohininga nako o panji-panji ihidoa hagala o l̄oku matubuoka! Niihene nako o trompet yatoilingi!

⁴Ma Jou wohitemo ngohino, ”Ahi gogeroka daku deyauku, Ngohi aha tapulono daukuku de marïdi deʼ madararono, ma miridi imatero o dumunitara imatüku o hutu mahau-haukoka o gugutuku maöraha magoronaka, deʼ mamodararono imatero o wange madararono maöraha o wangeoka.

⁵Maöraha ihohokuahi, maöraha mahuri itifaoka deʼ o angguru mahohoko iomukuahi mautuoka, o Sudan aha yawedere o haturu, magapanga imatero o gakana ihi tobiki hagala o raraga o angguru mautuino.

⁶O tentara manga maiyeti-maiyeti aha yodogumal̄aika idadi hagala o totaleo mainomo maöraha o ngogoro, deʼ o aiwani madorou maöraha o dumamata.”

⁷Aha maöraha iboa o huhuba-huhuba ihiadono ma Jouika Duru Wokokuaha o bereraino gënanga yatilakuru o ngai-ngairi, manga nyawaino yokua-kuata deʼ yonau-nauru, manga nyawaino manga gogurutil̄e deʼ mangakai maalu-aluhu deʼ yämodongo o duniaoka ingodumu. Onanga aha yoboa o Sion ma Doporonika, ma Jou Duru Wokokuaha iwihuba-huba mangïika.