Read Tobelo O YESAYA 19 Bible Online

O YESAYA 19 - Tobelo bible

O YESAYA 19

¹ Nenanga o behehongo mangale o Mesir. Ma Jou woboa o Mesirika wobarene o lobi ihohiapoto. O Mesir manga goma-gomanga ihahara Ai himangoka deʼ o Mesir manyawa mangahininga ieteke.

²Ma Jou wotemo, ”Ngohi aha tohigoko o parangi o riadodoto o Mesiroka: o riadodoto imakalawani o riadodoto, imakokadateke imakalawani imakokadateke, o kota imakalawani o kota, deʼ o popareta imakalawani o popareta.

³Ngohi aha takilianga o Mesir manga dato-datoro deʼ tatobiki toönanga manga kuata. Onanga aha yogahoko o roriwo o goma-gomanga, yogahoko o nasihati deʼ o hidumutu yohou-houru deʼ o woma-womahika.

⁴O Mesir aha tohilapahi aigiamika womatengo ma koano wolalalimi wäpareta önanga de mahayanga koiwa. Ngohi, o Jou Duru Tokokuaha, totemoka.”

⁵O Nil ma Ngairi maakere ahaiowaha deʼ itotedekana itore.

⁶Madotara-madotara aha mabounu imela maöraha maakere iholoi imata. O totuhuru deʼ o momo aha idadi imaai.

⁷Mata-mata iteba-tebaika o Nil ma Ngairi magurutu madatekiha aha idadi i toolenge daha o hidal̄oko ihihaili.

⁸Yol̄ol̄awu-l̄awungu yabobiaha yotagoko o nawoko o ngairoka gënanga aha yopoa-pöaka mahiri deʼ yododora karana toönanga mangagumä deʼ manga jä ibaragunaokaua. O pakeanga yododiai aha manganganono itoaka;

⁹onanga deʼ manga nyawa yahewa-hewa aha manga hininga i huha deʼ mangakuata i tobiki.

¹¹Igoungu yobodo o Zoan makota matutuda-tutuda! O Mesir manyawa duru yobarija ihidöaka o nasihati yobodo-bodo! I goungu yobarani önanga yotemo makoanoika önanga o nyawa yososawaro deʼ o kokoano manga difauku maöraha mahira-hiraika!

¹²He, o Mesir manga koano, kiaka yononasihati Jou Koano yososawaro gënanga? Mudukua önanga ihioriki okia ma Jou Duru Wokokuaha wohi dato-datoro mangale o Mesir.

¹³O Zoan deʼ o Memfis matutuda-tutuda ganga o nyawa yobodo-bodo. Onanga o tutudaua, koaholi yahirehene manga hoana.

¹⁴Ma Jou wadiai önanga ihidöaka o nasihati imahi orikokaua. Mahasili, hagala o hali ihowono, deʼ yolebo-leboto hokä o nyawa yädaluku yahipaakoro manga ngunanga mal̄okuoko mahirete.

¹⁵O Mesiroka koiwa o nyawa kaimasikaohi, yaoa yokokuaha yaoa o kawaha, yaoa o nyawa ihibö balu-baluhu yaoa o nyawa biaha.

¹⁶Aha iboa maöraha o Mesir manyawa yodadi hokä o ngoheka yopola-polaka deʼ yohawana. Onanga yohawana yohaharoka nako iwimake ma Jou Duru Wokokuaha wohitoakika Aigiama mangale wähukumu önanga.

¹⁷O Yehuda matonaka idadi yogora-gorakil̄euku mangale o Mesir manyawa higali magetongo önanga yahidöaka o hohininga ma Jou Duru Wokokuaha aiputuhika mangale önanga.

¹⁸O öraha gënanga o Ibranioka manga demo aha yapake o Mesir makota motoa magoronaka. Hagala o nyawa dokengoka yägoraka o koboto de ma Jou Duru Wokokuaha airomanga. Moiani o kota gënanga aha ihiromanga ”O Wange malako makota.”

¹⁹O öraha gënanga o Mesir maberera matitioka aha nagamoi o huhuba mangï mangale ma Jou, deʼ maribatingoka moi o liate o helewo ihitinga-tingakoka mangale ma Jou.

²⁰O huba mangï deʼ o liate gënanga marupa o nonako ma Jou Duru Wokokuaha aiboa o Mesir mabereraka. Nako o nyawa gënanga yätuku, deʼ önanga imahiböaka yogahoko o roriwo ma Jouika, Unanga ahawihuloko womatengoani wahihalamati önanga.

²¹Ma Jou ahawohinyata Ai diri o Mesir manyawaika, deʼ önanga ahaiwinako deʼ iwihuba Unanga, ikali yao mangahuhuba deʼ ihihuba Unangika. Onanga aha yahetongo manga jaji Unangika de makoboto deʼ yadiai.

²²Ma Jou aha wägohara o Mesir manyawa, Unanga mabahaka Unanga wahitogumu önanga. Onanga ahaimaidulu ma Jouika, deʼ Unanga aha woihene toönanga manganiata ikali wahidöaka yotogumu.

²³O örahagënanga aha naga o ngekomo maago-agomo o Mesir deʼ o Asyur mahidogoronaka. Manyawa o berera hinotoino gënanga aha yolio yoiki yanïki o ngekomo gënanga deʼ önanga aha yopuji imakinïki.

²⁴O örahagënanga o Israeloka ahaimaketero manga pangkati de o Mesir deʼ o Asyur, deʼ o hoana harahange gënanga aha yodadi o barakati mangale o dunia ingodumu.

²⁵Ma Jou Duru Wokokuaha aha wahibarakati önanga deʼ wotemo, ”Tinihibarakati ngini, hei Mesir Ahi umati, o Asyur Ahi dodadi, deʼ o Israel o umati Tairi-iriki.”