Read Tobelo O YESAYA 20 Bible Online

O YESAYA 20 - Tobelo bible

O YESAYA 20

¹Mangale o Sargon aipareta, o Asyur manga koano, o tentara Asyur manga kapita waparangi o Asdod, moi o Filistinoka mangakota.

²O taongo hangeuahi, ma Jou wïhuloko o Yesaya o Amos ai ngohaka wahohe aitarupa deʼ o ngöere o karongo magogiria womahi pakeuku. Unanga wamoteke deʼ womadagi womahekonoka deʼ womatarupaua.

³Maöraha o Asdod makota ihigilolitoka, ma Jou wotemo, ”Ahi gilaongo o Yesaya o taongo hange iböto ai hekonoka deʼ womatarupaua. Nenanga manonako okia aha idadi de o Mesir deʼ o Sudan.

⁴O Asyur manga koano aha watagoko hagala o nyawa o berera hinotoino gënanga, deʼ önanga aha yäliliara de kamanga hekonoka. Yobalu-baluhu deʼ yogögö, mata-mata imädagi ima bajuua de imal̄ou mahoholeua de mangagului kahapulono, hokä o hikauku o Mesirika.

⁵Hagala o nyawa yängaku o Sudan deʼ ihi lamo-amoko o Mesir ahamanga hininga isanangua deʼ manga nganono iwedere.

⁶O öraha gënanga hagala o nyawa yogogogere o gahi madatekino aha yotemo, ’Niolega okia idadi de o nyawa ngone hangaku-ngaku mangale inahohongino ngone ma koano Asyurika. Kiaka yakunu ngone hohalamati?ʼ ”