Read Tobelo O YESAYA 21 Bible Online

O YESAYA 21 - Tobelo bible

O YESAYA 21

¹Nenanga o behehongo mangale o Babel: Hokä o hidal̄oko mamuhu-muhuku mafioko yatilakuru o tonaka makokakaha, hokogënanga o bodito iboa o berera homodo-modongika.

²Ngohi tamake o lolega mangale idödadadi hoboborohono; mangale yosa tiaua deʼ yobobinaha. Nitagi niahimangiha, Elam matentara, niaparangi! Hei Madai matentara, niahigiloliti! Ma Jou Madutu aha wohibobaha mata-mata o hangihara yododiai hababu o Babeloko.

³O lolega gënanga ihidiai ngohi tomahiorikokaua hiädono takunua tamake ekola toihenoli. Ngohi ahihawana deʼ ahihiri, hokä momatengo o ngoheka magogiria momagilianga.

⁴Ahihininga ihuha; tamao toborohono ihidiai ngohi tohaharoka. O hutu tomau-mau duga-duga ihigao o dodokana.

⁵Tamake o rameanga majamuanga ibotukuoka; o gogogere mangï mangale o tamu-tamu isadiaka. Onanga yol̄omo deʼ yokere. Itodokanino toihene o pareta: ”Hei tentara manga balu-baluhu! Nihidiai niadadatoko!”

⁶Daha ma Jou wohitemo ngohino, ”Noiki nihi gogere womatengo wogoa-goana deʼ nïhuloko ünanga wohingahu okia wamö make-make.

⁷Nako ünanga wamake o kuda yobare-barene maduduono hohinoto, o duduono, o keledai deʼ o unta yobö bare-barene, ünanga kiani watailako wohidodiai.”

⁸Ipaha o gogoana gënanga wopöaka, ”Tuanga, ngohi togoanoka o wange higetongo o hutu deʼ o wange.”

⁹Nialega önanga gënanga! O duduono yokö kuda-kuda yoboa yahohinoto. Ipaha o gogoana gënanga wohiabari, ”O Babel itifaka! Toönanga manga puji madulada-dulada iwedere imahikabarihika o tonakoka.”

¹⁰Ahi nyawa o Israeloka! Ngona inipito-pitoko deʼ inidoko-doko hokä o gandum mamui-mui. O öraha nënanga tohidöaka ngonaika o abari maoa toö ihe-ihene ma Jou Duru Wokokuahaino, o Israeloka manga Jou Madutu.

¹¹Nenanga o behehongo mangale o Edom. Naga o nyawa wohiboaka ngohino o Edom de yaino, ”Hei, gogoana, kaitedekanohi o hutu nënanga? O jam muruonohi kongoruminouahi?”

¹²Tohaluhu, ”O ngorumino ahaiboa, mä o hutu-hutuö. Nako nomau noleha, naino nolehali.”

¹³Nenanga o behehongo mangale o Arab: Hei, o Dedan manyawa, hagala niakafila imätau-tau o momo marubu-rubu mahohihikaoka o Arab matonakoka.

¹⁴Hei Tema matonaka manyawa, niahidöaka yokere o nyawa manga kiriti madudungika yoböboa-boa nginika, deʼ niahiol̄omo imahi dito-ditokika.

¹⁵Hababu önanga ihioaroka manga diri o oworo irörahu-rahukil̄eino, o toimi mal̄eha ipopela-pelangil̄eino, deʼ o parangi magogiria imakutuduku.

¹⁶Daha ma Jou wohitemo ngohino, ”O taongo moiohi yakokoronauku o Kedar manga hoa-hoana mangasanangi aha ipaha.

¹⁷O Kedar yotötoi-toimi ganga o nyawa duru yonönau-nauru. Mä duga-duga mahuhutulu onangino aha yohalamati. Ngohi, o Jou o Israeloka manga Jou Madutu totemoka.”