Read Tobelo O YESAYA 22 Bible Online

O YESAYA 22 - Tobelo bible

O YESAYA 22

¹Nenanga o behehongo mangale o Lolega ma Wai: Hei, Yerusalemoka nigogogere, yadodoa ngini mata-mata nidoa o tau makatuil̄e?

²Ipatutua o kota ingodumu nirorameanga deʼ niulili nimorene. Hababu nianyawa yopoparangi yohonenge o parangi nënanga magoronaka yohonengua karana imateke parangi.

³Mata-mata niakapita ihioara manga diri deʼ yätagoko önanga imahi daenuahi ihitoimi manga toimi. Mata-mata nianyawa yokua-kuata yätagoko ngaro magurutikaoka yoara.

⁴Ngarouha nohilegaika ngohi; mal̄aika ngohi tadodora hagala o nyawa ahihoanino yohohone-honengoka. Uha nihitaili nihilaru ngohi.

⁵Igoungu, ma Jou Duru Wokokurutil̄e deʼ Duru Wokokuaha wohitatapuoka o wange nënanga hokä iruaeuku mawange, o dodokana deʼ o huru-hara o Lolega maWaioka. O kota mabebeno-bebeno o mehele irubaka. O boaka yogahoko o roriwo igilaongo o dodoporonoka.

⁶O Siria manyawa yoboa de manga kuda deʼ manga kereta ihipoparangi, o Elam manyawa imahidae o toimi deʼ mal̄eha, o Kir manyawa ihidiai manga dadatoko.

⁷O Yehuda mawai-wai iboburere iomanga de o kereta ihipoparangi. O duduono yobare-barene o kuda imahidiaioka o Yerusalem mangorana maamo-amoko mahimangoka.

⁸O Yehuda manga bebeno o mehele ingodumu itoropahoka. O öraha gënanga, ngini niatailako o parangi madae, o dae magudangoka.

⁹Ngini niamake duru kohängöe o dororata o Yerusalem makota mabebeno o meheloka kokiani mihidiai. Ngini niatailako mata-mata o tau o Yerusalemoka, niakilianga muruononaga mahidogoronaka deʼ niapake mahelewo mangale nihitiai o kota mabebeno o mehele. Mangale niatoomu o akere,

¹¹ngini nidiai o lapanga o kota magoronaka de, niatoomu o akere o lupanga madeka-dekanukuino. Mä ngini niwihiningaikaua ma Jou Madutu madekanoka wohidatoro mata-mata gënanga, deʼ idadi hababu gënanga idadi.

¹²O öraha gënanga ma Jou Duru Wokokurutil̄e deʼ Duru Wokokuaha winïhuloko ngini niari deʼ nidodora, niakori niahaeke de, nimahinoa o ngoere o karongo.

¹³ Mä i idulu yaino, ngini nimahi sosanangi deʼ nirameanga. Ngini nitoaka o hapi deʼ o duba, nio ol̄omo o hiode ma akeme deʼ niokere o angguru mateongo ikali nipöaka, ”Niaino ngone hol̄omo deʼ hokere, hababu iyarehe ngone hohonenge!”

¹⁴Ma Jou Duru Wokokurutil̄e deʼ Duru Wokokuaha womahinyata Aidiri ngohino deʼ wotemo, ”Igoungu, toönanga manga dorou gënanga aha Ta apongua hiädono önanga yohonenge. Ngohi, o Jou totemoka.”

¹⁵Ma Jou Duru Wokokurutil̄e deʼ Duru Wokokuaha wohihuloko ngohi mimake o Sebna, o kadato manga tau manyawa mangabaluhu, mangale tohiädono unangika ma Jou Aibehehongo nënanga,

¹⁶”Natobote ngona nënanga o nagona? Okia anihaku hiädono ngona noma honotoko o lungunu mangale ngona ol̄oku o helewoka?

¹⁷Nomahidodiai, Ngohi ahatoniumo ngona magogurutika. Ngona aha Toniutuku deʼ Tonilululuino daha Tonitululu hokä o bali o berera maago-agomika. Dokengoka ngona aha nohonenge anikereta-kereta nohiamo-amoko madatekoka. Ngona napesekoka anituanga aitau manyawa mangaromanga.

¹⁹Hababu gënanga ngona aha toniaiki anipangkatino deʼ Tonihiguti anipangkati magogurutil̄eoka.

²⁰O öraha gënanga Ngohi aha tiahoko Ahi gilaongo o Elyakim o Hilkia aingohaka.

²¹O pakeanga imomulia deʼ anigorona maninikutu ahaTihipake unangika. Hagala anikuaha ahaTihidöaka unangika. Unanga aha wodadi o ama mangale o Yerusalem deʼ o Yehuda yogogogere.

²² Unanga aha wokuaha itötotomo ma koano aitimioka o Daud aidifauku. Unanga aha wasö o pareta makusi. Nako ünanga wahelenga, koiwa yakunu yatamunu, deʼ nako ünanga watamunu koiwa yakunu yahelenga.

²³Unanga aha tihidöaka o pangkati ibitu-bitumu hokä o paku ihipake makuata o bebeno o mehelika. Ai tau manyawa yongodumu aha yähoromati karana ünanga.

²⁴Mä ai ahali itötigi-tigi deʼ watötago-tagongo aha i dadi ai momoku mangale ünanga. Onanga aha imahilakete manga diri unangika, hokä bohoko o Saharea ihilakete o pakuku.

²⁵Nako gënanga idadi, done o paku ihipöpake-pake de makuata gënanga ahairahuku deʼ itifa. Deʼ gënanga mabobaha airoriadodoto deʼ mata-mata o nyawa ihilö lake-lakete mangadiri unangika. Ngohi, o Jou totemoka.”