Read Tobelo O YESAYA 23 Bible Online

O YESAYA 23 - Tobelo bible

O YESAYA 23

¹ Nenanga o behehongo mangale o Tirus. Hei Tarsis ningö ngoti-ngotiri niatoaka o ngöto maago-agomo, nidodora! Maöraha nilio nihidete o Siprus de niaino, ngini nihingahu o Tirus makota iwederoka. O hohana deʼ niatau-tau idadioka kamagilianga.

²Nimaruae, hei o hohanino manyawa, hagala o Sidon imahuku-hukunu! Hababu biaha ngini niahidingoto hagala o nyawa o ngöto mahonongaika mangale imahukunu de imä ija o Mesir manga gandum deʼ mangale nimahukunu deo hoana deo berera mata-mata.

⁴Hei o Sidon makota, anihoromati ihihangoka! O ngöto ma ago-agomo maluku-luku inihigoungokauaoli ngona, yato, ”Ngohi komaiwahi tongohaka, komaiwahi talago-agomo o ngohaka o nauru ekola o ngoheka.”

⁵O Mesir manyawaö aha yatodokana deʼ yoruaeuku maöraha yoihene o Tirus ibinahaka.

⁶Nidodora, deʼ nimahiditoko o Tarsisika, hei o hohanino manyawa!

⁷Niolega anikota o Tirus nagaka o öraha mahirainohi. Nenanga o kota o biaha imahi sosanangi? Nenanga o kota yahidingoto hagala o nyawa o ngöto mahonongaika mangale yoniarara dokengika?

⁸Koigoungua imahöhuku-hukunu o nyawa yomomulia duru yahohoromati o duniaka? O nagona yal̄e maputuhu mangale yatifa o Tirus, o kota duru ikokuaha nënanga?

⁹Ma Jou Duru Wokokuaha, Unanga wal̄e maputuhu gënanga. Unanga waputuhu mangale wohibobaha manyawa manga edenge mangale hagala o hasili önanga yomömake-makeoka, deʼ yähikauku hagala o nyawa yahöhoromati o duniaka.

¹⁰Nioiki niakarajanga niadumule, hei Tarsis madol̄a, hababu o kapa malangi koiwakaoli.

¹¹Ma Jou watoakikaka Ai giama o ngöto mal̄okuoka deʼ walulu hagala o popareta. Unanga wohidöaka o pareta hupaya o Funisia mabebeno-bebeno o mehele yabinaha.

¹²Ma Jou wato, ”Hei Sidon makota! Ngona aha nomahi sosanangokauaoli. Aninyawa yätuku. Ngaroka önanga imahiditoko o Siprusika, önanga yoridua.” (

¹³O Asyur mahoanua, mä duga-duga o Babel mangahoana yamal̄aika o Tirus makota yakuaha o aiwani madorou. Onango ihigoko o menara-menara ihigogiloliti, yaruba hagala mabebeno o mehele deʼ ya diai o kota gënanga kamagilianga.)

¹⁴Nidodora, hei ningöngoti-ngotiri! O kota ngini niangaku-ngaku iwederoka.

¹⁵Aha iboa maöraha o Tirus yawohanga o taongo moritumidi madekana, kaimatero o koano womatengo ai umuru. Nako maöraha yatilakuroka gënanga, o Tirus aha hokä o ngoheka mahuku-hukunu amidiri o nyanyi nënanga magoronaka:

¹⁶Nal̄e o kecapi, nakiloliti o kota, Hei nahohuku-hukunu ani diri nododoaokaua iniwö woha-wohanga! Nakuti o kecapi, nonyanyioli, hupaya ngona inihiningaokaoli.

¹⁷O taongo moritumidi gënanga ipaha, ma Jou aha wohininga o Tirus deʼ wohigumal̄a ënanga yadiai mamanarama mahira. Enanga aha imahukunu de mata-mata o popareta o dunia mal̄okuoka.

¹⁸O utumu deʼ o hewa yamömake-make aha yagogonua, mä aha ihihuba ma Jouika. Hagala o nyawa iwihuba-huba ma Jou aha yapake o tiwi gënanga mangale ihi ija o pakeanga de o inomo önanga yopöparalu.