Read Tobelo O YESAYA 24 Bible Online

O YESAYA 24 - Tobelo bible

O YESAYA 24

¹Ma Jou ahawabinaha o dunia, hiädono itoongoro deʼ kai ridika. Unanga ahawaidulu madol̄a deʼ manyawa wahikokitingakoka.

²Mata-mata o nyawa aha yamao mangawowango kaimatero: O imam-imam deʼ o kawaha, o gilaongo deʼ o tuanga, yohuku-hukunu deʼ yoija-ija, yobau-bau deʼ yahiböbau-bau, yokaya-kaya deʼ yomomihikini.

³O dunia aha hohibarihi deʼ ibinaha. Ma Jou wotemoka, deʼ o hali gënanga marai idadi.

⁴O dunia idadi itoolenge deʼ imaai o dunia ingodumu i hangihara. O dihanga deʼ o dunia ihangihara kamamoi.

⁵O dunia idadi yatorou karana manyawa yatilakuru hagala aipareta ma Jou Madutu, yangali wohi Totatapuoka deʼ yadiaiua o jaji Wadodiai dede önanga mangale kahiado-adonika.

⁶Hababu gënanga ma Jou walolaioka o dunia deʼ manyawa wahukumu karana toönanga manga manarama. Onanga wätuhuku deʼ mahuhutulu dika onangino yohalamati.

⁷O angguru mautu yapelelaka deʼ o angguru mateongo ihuha yamake. O nyawa mahira yomorene öraha nënanga manga hininga ihuha.

⁸Hoihenenokaua o kecapi yakuti yomore-morene deʼ yotakoro o damunu yarame-rame. O nyawa yomore-morene marame itogumoka.

⁹Koiwakaoli yokere o angguru de yonyanyi, koiwakaoli yajame mahemoro o ngokere idalu-daluku.

¹⁰O kota yamode-modekika iruaeuku; mata-mata o tau mangorana ikusioka karana yogogogerika yohawana.

¹¹Hagala o nyawa yopöaka o ngeko-ngekomoka karana koiwaka o angguru mateongo. Koiwakaoli o morene o bereraka gënanga mangale kahiado-adonika.

¹²O kota ibinahaka yatuhuku, deʼ hagala mangorana ma ago-agomo itoropaha imahi kokabarihika.

¹³Genanga aha idadi o dunia yamode-modekika o hoana deo bereraika yogetongo. Kaimatero mahali hokä o gugutuku ma orahoka, maöraha o zaitun mahohoko yal̄e hiädono imata deʼ o angguru mahohoko mabobaha yapagele mautuoka.

¹⁴Hagala o nyawa yohohalamati aha yonyanyi yomore-morene. O nyawa o wange madumuniha aha ihi abari ma Jou Ai mulia

¹⁵de o wange mahiwariha manyawa aha iwihigiri Unanga. O hohanino manyawa ahaiwihimulia ma Jou, o Israeloka manga Jou Madutu.

¹⁶O dunia mabaha-bahaka de yaino yoihene o higiriri manyanyi mangale o Israeloka, o hoana ihingo ngou-ngounu. Mä tobodito ngohi! Ngohi tohangihara! Yososatiaua hoko genangikaohi dika yosatiaua, idogoli önanga yosatiaua.

¹⁷Ni ihene, o dunia niogogogere ningodumu! O dodokana, o dadagoko deʼ o modoi ini damaoka ngini.

¹⁸O nyawa ihi oa-oara manga diri o dodokanoka de yaino ahayäotaka o dadagoko magoronauku, deʼ o nyawa yoö ota-otana o dadagokino ahayamodoi. O awana iriki-rikimi aha ipuraraha o dihanguku, deʼ o dunia mahohol̄e aha igiwi.

¹⁹O dunia itororata, iwede-wederuku deʼ igiwi.

²⁰O dunia ihululunino kai lebo-leboto hokä o nyawa yadaluku, deʼ igiwi-giwi hokä o dumuleoka matau o rato magoronaka. O dunia iruba karana mabaradoha madubuho. Enanga i wedere deʼ aha imomikokauaoli.

²¹O öraha gënanga ma Jou aha wähukumu yakö kokuaha o gitawa ma amo-maokoka deʼ o kokoano o duniaka.

²²Onanga aha yatoomu kamamoi hokä yatumu-tumunguku o aruku magoronaka, deʼ yadoditilaika o bui magoronaika hiädono yadono maöraha mangale yähukumu.

²³O mede aha idadi ihuhutu deʼ o wange itararonokaua, hababu ma Jou Duru Wokokuaha ahawopareta hokä o koano. Unanga ahawopareta o Yerusalemoka, o Sion madoporono mal̄okuoka, deʼ wohidumutu Ai mulia Ai umati manga tutuda-tutudaika.