Read Tobelo O YESAYA 25 Bible Online

O YESAYA 25 - Tobelo bible

O YESAYA 25

¹Jou, Ngona ahi Jou Madutu, tonihimulia Ngona deʼ tohigiriri Ani romanga. Hababu Ani manarama-manarama duru i heranga; Ngona nohidatoro maöraha mahiraikahi, deʼ nadiai de nosatia.

²O kota gënanga Nawederoka; o kota mabebeno o mehele gënanga idadi magilianga. O kadato ihigoko-goko o nyawa maporetino i binahaka, deʼ ihigoko okaua mangale kahiado-adonika.

³Ngona aha inihigiriri o hoana deo berera yokua-kuata, deʼ inimodongo o hoana deo berera manga hayanga koiwa-iwa manga kota-kotaoka.

⁴Hababu Ngona nodadi nahiditoko mangale o nyawa yobole-bole, o ngï irirïdi mangale o nyawa mihikini o dehehoto magoronaka. Ngona o hidutuluku o hidal̄oko irato-ratooka, o hohohongo o wange mahau-haukoka. Hababu o nyawa manga hayanga koiwa-iwa yaparangi hokä o rato o awa-awana ma orahoka,

⁵hokä o hidal̄oko ihiru-hiru o tonaka itotoongoroka. Mä Ngona nadiai tongomi mia haturu manga uru itamunu, Narïdi manga boaka hagala o nyawa manga hayanga koiwa-iwa; hokä o lobi mahohongo yahihanga o wange mahauku ikokiria.

⁶O Sion madoporonoka, ma Jou Duru Wokokuaha aha wohidiai o jamuanga mangale mata-mata o hoana deo berera o duniaoka. Unanga wohidiai o inomo duru ihöhemo-hemoro deʼ o angguru iö iri-iriki.

⁷O doporono gënanga mal̄okuoka Unanga aha wahelenga o lobi o hininga mahuha yahawo-hawoino o hoana deo berera.

⁸ Ma Jou Duru Wokokuaha aha wabinaha o honenge mangale kahiado-adonika! Unanga aha waehe o kongo o bionino magetongo, deʼ wohikurutika o hikauku Ai umati yatago-tagongo o dunia i ngodumu. Ma Jou wotemoka, deʼ o hali gënanga marioka idadi.

⁹O oraha gënanga o nyawa aha yotemo, ”I gou-goungu ünanga tongone nanga Jou Madutu; Unanga ngonehidodamä, hupaya ngone wonahihalamati. I goungu, nënanga o Jou, Unanga ngonehidodamä. O orahanënanga ngone houlili homore-morene, hababu Unanga wonahihalamatoka ngone.”

¹⁰ Ma Jou aha wahohongino o Sion ma Doporono, mä o Moab aha wa pito-pitoko hokä o gandum maroehe o wal̄e mangioka.

¹¹Manyawa ahayatoakika manga giama hokä o nyawa yo mau yo tiboko. Mä ma Jou ahawohi tipokouku toönanga mangahininga ma gurutil̄e hiadono önanga imangakunokaua.

¹²O Moab ma bebeno o mehele dema bebeno magogurutil̄e aha waruba deʼ wohipaka o tonakuku hiadono i wedere hokä o kafo.