Read Tobelo O YESAYA 26 Bible Online

O YESAYA 26 - Tobelo bible

O YESAYA 26

¹O öraha gënanga o nyawa aha ihinyanyi o nyanyi nënanga o Yehuda matonakoka: ”Hokokia makuata tongone nanga kota; ma Jou Madutu mahirete wohigoko mabebeno o mehele, nenangoka ngone hohalamati.

²Nia helenga hagala o ngorana maago-agomo, hupaya yowohama o hoana deo berera yososatia, o hoana deo berera yadodiai manga Jou Madutu Aimau.

³Jou, Ngona nohidöaka o dame deʼ o lola o nyawa manga hininga i bitu-bitumika, hababu ünanga woningaku Ngonaika.

⁴Niwingaku ma Jouika hokogenangika, hababu o Jou ma Jou Madutu hokogenangika wonä hohongino ngone.

⁵Ma Jou wahikauku o nyawa manga hininga ikokurutil̄e; Unanga wawedere toönanga manga kota mabebeno o mehele, deʼ wohirataika de o tonaka.

⁶Hagala o mihikini manyawa deʼ yohohangihara, aha yapito-pitoko.”

⁷O nyawa yorikoto imadagi o ngekomo iriko-rikotoka, hababu Ngona, Jou, o ngekomo nahihira onangika.

⁸Ngomi mianïki Ani putuhu, ya Jou, deʼ minidodamä Ngona; Ngona la o higiriri deʼ tongomi miahininga inimömau-mau.

⁹Ahi jiwa inimau Ngona maöraha o hutu-hutu, ahihininga duru inimau Ngona maöraha o ngorumino. Dama maöraha Ngona najuru hakimi o dunia, o dunia manyawa aha ihioriki okia madiai.

¹⁰Ngaroka o nyawa madorou iwihidiai de yaoa-oa, ünanga womadotokua dika okia madiai. O negara hukumokaö ünanga wodiai iadilua, deʼ woluku wohigoungu ma Jou Aikuaha.

¹¹ Jou, Ngona nomahidiaioka nähukumu Ani haturu, maöraha i hiorikua. Mal̄aika önanga duru yämal̄eke yamake Ani dora Ani umatika. Mal̄aika önanga yobinaha yomata mangale o hukumanga Nasosadia mangale önanga.

¹²Jou, Ngona aha nadiai ngomi milola; hagala ngomi mia kokarajanga, Ngona nadodiai mangale ngomi.

¹³Ngomi mamoi iböto imikuaha o tua-tuanga mahomoa, mä duga-duga Ngona ngomi minihigoungu, ya Jou tongomi mia Jou Madutu!

¹⁴Onanga yohonengoka deʼ aha yowango wangokauaoli, mangawomaha aha imomikokaua. Hababu önanga Nabinaha namata-mataka deʼ Naehe anihohiningaka.

¹⁵Ngona nomidogo miwöeoka ngomi Ani umati, ya Jou, deʼ nawoatika tongomi miadaera, karana gënanga Ngona minihimulia.

¹⁶Ngona nomi hukumoka ngomi; o dehehoto magoronaka ngomi mimaidulu Ngonaika, deʼ mimaniata Ngonaika, Jou.

¹⁷Hokä o ngoheka momau mongohaka momahirikiti deʼ mopöaka mahiri, hoko genangö ngomi Ani himangoka, Jou.

¹⁸Ngomi miröehe deʼ mihirikiti mahiri, mä okia-kiaua mihingohaka; ngomi mihidöakua o halamati o duniaika, miodogoua o manyawa yogogogere.

¹⁹Ani umati yohone-honengoka aha yowangookaoli, hagala toönanga manga maiyeti aha imomikoli. O nyawa yäjere-jereoka o tonaka magoronaka aha yomomiki deʼ imauli-ulili. Hokä o dumunitara yasanangi o dunia, Ngona nahiwango Ani umati madekanoka yahö hone-honenge.

²⁰Niwohama niatau magoronaika, hei Ahi hoana, daha niabeno o ngorana. Nimangiunika o öraha mahuhutulu hiädono ma Jou Ai dohata itouroka.

²¹Ma Jou aha wouti ai ngï Wogogogere o horogaka de wauku mangale wahukumu o dunia yogogogere karana toönanga manga baradoha. O doma önanga yadodiai de kaima ngiu-ngiunu aha wahelenga. O tonaka yapohukokauaoli hagala o nyawa yohonenge yatoma.