Read Tobelo O YESAYA 27 Bible Online

O YESAYA 27 - Tobelo bible

O YESAYA 27

¹ O öraha gënanga ma Jou ahawapake Ai oworo ikua-kuata deʼ idoto-doto mangale wihihukunu o Lewiatan, o dodiha ima gale-gale deʼ ideho-dehoro gënanga, deʼ mangale wätoma o naga o ngötoka.

²O öraha gënanga ma Jou aha wotemo, ”Ninyanyi mangale Ahi angguru madumule ihohailoa.

³Ngohi, o Jou, magogoana; o öraha magetongo Ngohi tatuagi, o hutu de o wange Ngohi togoana, hupaya uha naga yaruae.

⁴Ngohi tamao tongamo okaua. Hokä nako o momo ekola o momo marubu-rubu mahohihikaoka, Ngohi aha tahohihanga, deʼ tatuhuku tamata-mataka.

⁵Mä nako Ahi umati manga haturu-haturu yolingiri o hohohongo Ngohino, mal̄aika önanga mimakadame dede Ngohi, ya, mimakadame dede Ngohi.”

⁶Ma öraha aha iboa, o Israeloka manyawa aha hoka o gota mautu imahi ngutuku deʼ imahoheika, ikali yaomanga o dunia mal̄okuoka de hagala toënanga mahohoko.

⁷Ma Jou wähukumu Ai umati imadaenua madubuho Unanga wahö hukumu o hoana deo berera yahö haturu önanga. Unanga wätomaua Ai umati hokä Unanga wätoma Ai haturu.

⁸Ma Jou wähukumu Ai umati de waumo o berera mahomoaika. Unanga waduhu önanga de o hidal̄oko madorou o wange mahiwariha.

⁹Mä hagala o Israeloka mangabaradoha duga-duga yakunu iapongo nako hagala mangagikiri mahuba mangï yagulinga ya alu-aluhu hokä o dofae. Mata-mata o dupa deʼ o Dewi Asyera madulada kokiani yawedere.

¹⁰O kota mabebeno o mehele gënanga idadioka kai rïdika deʼ yamal̄aika hokä o tonaka makokakaha kamahomoa. O aiwani o gigini matika iol̄omo deʼ imahibatongo genangoka ikali yamata hagala o hoka-hoka mautu majaga-jagaka.

¹¹Nako mararaga itoolengoka deʼ itobiki, o ngongoheka yoboa deʼ yadiai o gota ihi dofo-dofo ukuika. O hoana deo berera gënanga okia-kiaua imangarati, done ma Jou Madutu Wohidödadadi aha wahayangua ekola wadoraua önanga.

¹²O öraha gënanga ma Jou aha watoomu Ainyawa moi de moi o Efrat ma Ngairi de yaino hiädono o Mesir maribatingi. Unanga aha wahikitingaka önanga hokä o nyawa ihikitingaka o gandum mamui de ma afa.

¹³O öraha gënanga o trompet mapako-pako aha yawuwu mangale ya ahokokali mata-mata o Israel manyawa yaumo-umo o Asyuroka deʼ o Mesir. Onanga aha yoboa o Yerusalemika mangale iwihuba ma Jou Ai doporono itötebi-tebinoka.