Read Tobelo O YESAYA 28 Bible Online

O YESAYA 28 - Tobelo bible

O YESAYA 28

¹Ibodito o kota idadi ihilamo-amoko o Israeloka yadö dalu-daluku! Mahailoa idadi irongo hokä o karangan bunga i maai toönanga manga häeke mal̄okuoka. Ibodito o kota madol̄omo ikokurutil̄e o wai iboburere mahidogoronaka ihi lamo-amoko hagala o nyawa yadalu-daluku ngadeke yohonenge.

²Ma Jou aha wihuloko womatengo wokua-kuata deʼ wonau-nauru. Woboa hokä o rato yanikino o awana o es, hokä o awana iriki-rikimi deʼ o nguihi ihinahini. De mabuturungu Unanga wahipaka önanga o tonakuku.

³O tutuda yadalu-daluku ihi amo-amoko gënanga aha wapito-pitoko.

⁴Toönanga manga kota kayaheto-hetongo imulaengoka irongo gënanga aha ihihanga. Manga wowango hokä o ara mahohoko mawowango iomuku maorahuahi; hoko gënanga yamake, gila-gila yapagele deʼ yaol̄omo.

⁵Ma Jou Duru Wokokuaha aha wodadi o karangan bunga mahohailoa Ai umatika.

⁶Ma Jou ahawahidöaka o mamao o adili o haki-hakimika, deʼ o barani hagala o nyawaika manga manarama yogoana o kota o parangioka de yaino.

⁷O nabi-nabiö deʼ o imam-imam yadaluku karana duru ilamoko holi yokere o angguru deʼ o arak. Onanga imadagi kayo lebo-leboto deʼ imahi dodepeleke karana toönanga manga dibanga iruaeoka. O nabi-nabi yakunokaua imangarati o lolega-lolega ma Jou Madutu wahidödoa-döaka onangika. O imam-imam yakunokaua yaputuhu hagala o perekara yahi hima-himanga onangika.

⁸Toönanga manga meja iomanga de o ngunanga, hiädono koiwaka o ngï madebi-debini.

⁹Onanga yotaiana mangale ngohi, yato, ”Watobote ünanga wa dotoko o nagona? O nagonaoli yoparalu ai hitararono? Watibanga ngone nënanga o ngohaka maiteteke daha o huhu inahi pidilino?

¹⁰O nagona yato ünanga wonä dotoko ngone o hurufu moioka deo hurufu moika, o demo moioka de o demo moika, o kalimati noioka deo kalimati moika.”

¹¹ Nako ngini nioluku nihihigihene ngohi, done ma Jou aha wihuloko o nyawa maporetino mangale winidotoko ngini ailugo magoronaka imakohowono malugo deʼ manga demo o nyawa maporetino.

¹²Ma Jou winïhiributu o hibatongo mangï nginika mata-mata, mä ngini nioluku niwihigihene ünanga.

¹³Karana gënanga ma Jou wini dotoko ngini o hurufu deo hurufika, o demo deo demoika deo kalimati deo kalimatika. Deʼ maöraha nimadagi ngini niruba nibitikangil̄e hiädono inïl̄abo, inimodoi deʼ initagoko.

¹⁴Ni ihene okia woto temo-temoka ma Jou, hei nihö hohohedo nia popareta o kawaha o Yerusalemoka!

¹⁵Ngini nitemo ngomi midiaioka o jaji deo honenge deʼ mi diai o rimoi de o nyawa yohone-honenge manga dunia. Ngini niamao maraioka o bodito ahaiboa-boa gënanga ahayatapal̄ua nia diriuku, karana ngini nipake o akali mangale nia hohongino niadiri.

¹⁶ Hababu gënanga, O Jou Duru Wokokurutil̄e wotemo hoko nënanga, ”Ngohi ahatakelenga o hohol̄e ikua-kuata deʼ i poputurungu o Sionoka; moi o helewo o hohol̄e dema ija-ijaoka de madulihi: ’O nagona yangaku ibitumu, aha imaikeua yohihanga.’

¹⁷O adili Tohidadi o duduga magumini, deʼ o rikoto Tohidadi o hibatingi magumini.” O awana o helewo aha yaehe yatebi-tebini mata-mata o tengeluku ngini nia ngaku-ngaku. O nguihi ahaihinahini o ngingiunu mangï.

¹⁸Niajaji de o honenge deʼ niarimoi de o nyawa yohone-honenge manga dunia ahaihidadiua, hiädono nako o bodito iboa, ngini niwedere inipito-pitoko.

¹⁹Ngini aha initapal̄u o huha kahokogenangika deʼ kiani nia tagongo o wange higetongo, o ngorumino, o wangeoka deʼ o hutu-hutu. Ngini aha nihawana nihaharoka nako ngini nimangarati ma Jou Madutu Ai behehongo.

²⁰Ngini hokä o nyawa yomau imaidu manga dangiri magoronaka yomugurutua mangale o ngï imahidotigiranga manga diri. Nia gal̄oko yomongoatua mangale nihihawo nia diri.

²¹ Ma Jou aha womaoko hokä o Parazim mal̄okuoka. Unanga aha woparangi hokä o Gibeon ma Waioka mangale ai dungutu wadiai. Ai dungutu iheranga mangale o nyawa! Unanga aha wadiai Ai manarama mahasili yaheranga.

²²Ngohi toihenoka ai putuhu ma Jou Madutu Woko kurutil̄e deʼ Wokokuaha mangale wabinaha o berera ingodumu. Uha niongelo hagala o hohininga mademo tohiö ado-adono nënanga. Dama idadi iholoi nginika mangale nia otana nia diri!

²³Ni ihene Ahi demo-demo, nio hohininga ahi behehongo.

²⁴Womatengo wototumule aha hoko genangikaua wopajeko, wopasolo deʼ waihara matonaka mangale wodatomo.

²⁵Nako matonaka gënanga ibotoka, ünanga woderero o gihihi, hokä o jintan madaro-daromo deʼ o jintan magare-garehe. Unanga wodatomo harahinoto marupa o gandum wohi rei-rei, deʼ madatekino o dadatomo mahomoa.

²⁶Unanga wohioriki madodagi wakokarajanga, hababu ai Jou Madutu widotokoka.

²⁷Unanga wapakeua wahidoro madatoro mangale wahidoro o jintan madaro-daromo ekola o goroba malululu mangale yagulinga o jintan magare-garehe, mangale gënanga ünanga wapake o didipo maguguwini.

²⁸Maöraha wohidoro o gandum, ünanga wagoharua hokogenangika hiädono iwedere. Kowali! Unanga wohioriki madodagi wohidoro de madiai de wobarenuku o goroba mal̄okuoka koi wederua o gandum mamui-mui gënanga.

²⁹Aibarija gënanga iboa ma Jou Duru Wokokuahaino. Mata-mata ma Jou Ai datoro ibarija deʼ salalu ihasili.