Read Tobelo O YESAYA 29 Bible Online

O YESAYA 29 - Tobelo bible

O YESAYA 29

¹Ibodito o Yerusalem makota yaho heto-hetongo ma Jou Madutu aihuba mangï! Ibodito o kota o Daud womä tau-tau mangï! Mal̄aika hagala o taongo imateketagali de hagala mawange ma ago-agomo.

²Mä ma Jou Madutu aha wodotagao o bodito o kotauku gënanga, hiädono o nyawa yohangihara deʼ imaruae. O kota i ngodumu imahirupa o huba mangï imahiramohoka o awunu.

³Ma Jou aha waparangi o kota gënanga deʼ wohigiloliti hagala mabatingi.

⁴O Yerusalem hokä o tokata ihi dailako mangale ihitoihene mailingi o tonaka magoronail̄e, mailingi kai hegi-hegiri o kafo magoronail̄e.

⁵Mä aha mata-mata o nyawa maporetino manga hayanga koiwa-iwa gënanga aha yohihanga hokä o kafo ekola o afa o hidaloko yawuwu. De itodokanino deʼ koima nako-nakoua.

⁶Ma Jou Wokokuaha aha wohi bebasi o kota gënanga de o rato deʼ o ohu hoboborohono. Unanga aha wodotagao o rato deʼ o uku ihiru-hiru.

⁷Daha mata-mata manga duduono o nyawa maporetino yäpoparangi o Yerusalem, ma Jou Madutu Aihuba mangï makota, mata-mata ihigogilolitino deʼ yaparangi o kota gënanga, ahayohihanga hokä o nanere maöraha o hutu-hutu.

⁸Hagala o hoana deo berera manyawa imatoomu mangale yäparangi o Yerusalem aha hokä o nyawa yahöhabirokata wonanere ünanga magogiria wol̄omo, dahawomomiki de ai mamata mahomoa, ekola hokä o nyawa manga kokiriti madudungu wonanere ünanga magogiria wokere, daha womomiki de aingomaha matore-tore.

⁹Gila-gila kani hera-heranguku deʼ niatamunu nialako hokä o nyawa piloko! Idadi inïdaluku, mä karana ko anggurua niokere. Nitagi kanilebo-leboto mä karana o arakua niokere.

¹⁰ Ma Jou winidiai ngini nikadu-kadunu deʼ nimaidu nianihu-nihuku. Unanga watamunu manga lako o nabi-nabi deʼ wakokudu manga biono yamö make-make.

¹¹O lolega magetongo mamangarati ahaingiunu mangale ngini, hokä o buku isö sege-segelika. Nako o buku gënanga niao womatengoika, yakunu wabasa hupaya ünanga winidabasa nginika, ünanga ahawotemo ünanga wakunua, karana o buku gënanga isegelika.

¹²Nako niao o nyawa wabasa-basaikaua, ünanga aha wohaluhu ünanga wakunu wobasa.

¹³ Ma Jou wotemo, ”Hagala o nyawa gënanga duga-duga ihihuba Ngohi de manga demo-demo, mä toönanga manga hininga ikurutika dede Ngohi. Toönanga manga agama duga-duga o nyawa manga datoro yahafalino.

¹⁴ Karana gënanga önanga aha Tatodokana de o gogohara togogilio. O nyawa yobobarija aha idadi yobodo, deʼ mata-mata toönanga manga sawaro ahakoibaragunaua.”

¹⁵Yobodito o nyawa ihidailako iwingiunu manga datoro ma Jouino! Onanga yodiai de koyoilingua, deʼ yatobote moiua yamake ekola ihioriki okia önanga yadiai.

¹⁶ Hagala moi-moi önanga yatotakaidulu. Kiaka iholoi mal̄okuoka, o bohoko wododiai ekola o tonaka matau-taulu? Yakunu iwidodiai witemo widodiaiika, ”Ngonaua nohidiai ngohi”? Ekola yakunu okia honanga gënanga itemo unangika, ”Ngona okia-kiaua nakunu”?

¹⁷Naga o dolabololo mailingi, ”Itedekanokauaoli o hongana idadi o dumule matonaka, deʼ o dumule matonaka iliokali idadi o hongana.”

¹⁸O öraha gënanga o nyawa yatotopongono aha yakunu yoihene moi o bukuino yadabasa, deʼ o nyawa yopilo-piloko hoko kangano yowango o huhutu magoronaka aha yakunu imahioriki.

¹⁹Hagala o nyawa yomo mihikini deʼ yohina-hina aha yamao okali o utumu wahidö doa-döaka o Israeloka manga Jou Madutu wotebi-tebini.

²⁰Genanga manga baha hagala o nyawa yatö tuku-tuku o nyawa mahomoa deʼ iwihikauku ma Jou Madutu. Ma Jou Madutu aha wabinaha mata-mata o nyawa baradoha.

²¹O nyawa yoigo yododiai o romanga madorou, o nyawa tätatoko o nyawa madorou yahukumu, ihigerewoto o ade-ade i elu-eluku hupaya o nyawa mangahininga iriko-rikoto uha yamake o adili.

²²Hababu gënanga ma Jou, o Israeloka manga Jou Madutu wihi bebebasi o Abraham, öraha nënanga wotemo, ”Ahi nyawa, ngini aha ini hikaukuokauaoli deʼ niabiono aha imuleokauaoli karana inimal̄eke.

²³Hababu nako ngini niamake niangoha-ngohaka Ngohi tinihi doa-döaka nginika, done ngini aha nihigoungu Ngohi o Israeloka manga Jou Madutu wotebi-tebini. Ngini aha nihihoromati deʼ nihimodongo Ngohino.

²⁴O nyawa bodo aha imadotoko imangarati deʼ o nyawa hokogenangika yokokurubungu aha yosanangi yädotoko.”