Read Tobelo O YESAYA 30 Bible Online

O YESAYA 30 - Tobelo bible

O YESAYA 30

¹Ma Jou wotemo, ”Yobodito o Yehuda manga tutuda-tutuda, karana önanga ihilawani Ngohino. Onanga yanïki hagala o datoro to Ngohiua ahidatoro. Onanga yatulihi de manga giama o jaji imalawani de Ahimau. Done kai totoporono toönanga manga baradoha.

²Onanga yoiki o Mesirika yogahokua Ahiputuhu. Onanga imahohongo o Mesirika deʼ imahinganono makoano Mesir ai roriwo.

³Mä o koano gënanga aha wa akere toönanga manga hininga, deʼ o hohohongo yongano-nganono o Mesirino ahakoi dadiua.

⁴Ngaroka o Yehuda manga huhuloko-huhuloko ima hiadonoka o Zoan deʼ o Hanes makota-kotaoka o Mesiroka,

⁵o nyawa mata-mata ahaidadi yamal̄eke karana yangakuoka o hoana yobobaragunaua mangale önanga. Onanga yamakeua o utumu ekola o roriwo, mä o hikauku.”

⁶Hoko nënanga ma Jou Aibehehongo mangale hagala o aiwani yogogogere o tonaka o koreharail̄e, ”O huhuloko-huhuloko yö gina toönanga manga keledai deʼ manga unta de o hadia-hadiai, daha yo kaika o daera iomanga o huha ibobahaya yogogere o singa, o dodiha ibiha-biha deʼ o naga magogahuhuoka. Hadiai-hadiai gënanga önanga ihihuba moi o hoanika yaku-akunua yariwo önanga.

⁷O Mesir manga roriwo kaparasuma dika. Hababu gënanga o Mesir Tohidöaka o romanga ihi ahoko o Naga ibobahayaua.”

⁸Ma Jou Madutu wohihuloko ngohi tatulihi Aiumati manga dorou, moi mabuku magoronaka hokä o hohininga mangale kahiado-adonika.

⁹Hababu, önanga gënanga o hoana yoigo iwilawani ma Jouika, yoigo yoeluku deʼ komaiwahi yomau ihigihene ma Jou Aidodotoko.

¹⁰Onanga yätemo o nabi-nabika, ”Niauru niatamunu! Uha nimitemo ngomino okia madiai, mä okia miononahihu ngomi mi ihene. Mal̄aikala ngomi kahirahi miahayali.

¹¹Nimahi rehene, deʼ nia l̄e o ngekomo mahomoa. Uha nimï ruae ngomi de o Israeloka manga Jou Madutu wotebi-tebini.”

¹²Karana gënanga o Israeloka manga Jou Madutu wotebi-tebini wotemo hoko gënanga, ”Ngini niaoluku Ahidemo deʼ niangaku niatuku ikali o tipu.

¹³Hababu gënanga ngini niahowono. Ngini hokä o bebeno o mehele magogurutil̄e itororata daku de yauku; dei todokanino dika ngini ahaniruba.

¹⁴Ngini ahaniwede-wederuku hokä o bohoko o tonaka iwedere imahikokabarihika, hiädono mangede-ngedere mahidogoronaka koiwa yakunu ipake mangale hohil̄e o uku mangaboho o rikanoka ekola mangale hohiuiti o akere o bak magoronail̄e.”

¹⁵Ma Jou Duru Wokokurutil̄e, o Israeloka manga Jou Madutu wotebi-tebini, wätemo Aiumatika, ”Nima toba deʼ kahirahi nirïdi, done ngini aha Tinihihalamati. Nihi ngaku Ngohino de niahininga idame-dame, done nginiTinihikuata.” Mä ngini nioluku!

¹⁶Koaholi ngini nidiai o datoro mangale nihioara nia diri niahaturuino de niobarene o kuda ihohiapoto. Irahai! Igoungu dama nginikiani niora! Ngini niapikiri niakuda ganga il̄aoaka magiria imapopata, ena hioko inigoginiki iholoi i kurutika majapati.

¹⁷O nyawa yaribuhu moi aha yoara yamake aihikokamodongo womatengo o haturu, deʼ o nyawa yamotoa mangahikokamodongo inidiai nginimata-mata nioara. Niaduduonino duga-duga igogogere moi o bandera maliate o doporo matubuoka.

¹⁸Ngaro hoko gënanga, ma Jou wododama maöraha mangale wohidumutu Aihayanga de Aidora nginika. Unanga womahidiaioka mangale Winidora ngini. Hababu o Jou ganga ma Jou Madutu wadiai okia yakokorona. Youtumu o nyawa iwi nganono Unangika.

¹⁹Hei ngini nigö gogogere o Yerusalemoka, ngini ahahokogenangikaua niari. Ma Jou wototodora, de, majapati winïbaluhu ngini nako ngini nimahiböaka nigahoko o roriwo Unangika.

²⁰Ma Jou winihidöaka ngini o öraha o sosoba itotubuho mangale winidotoko ngini. Mä o öraha nënanga Unanga mahirete winidatekuku ngini hiädono ngini niamao Aiboa.

²¹Nako ngini o ngekomoka de nirehene, niaporetoka aha ni ihene Aiilingi wotemo, ”Nenanga mangekomo; nianïki o ngekomo nënanga.”

²²Hagala niagomanga madulada malape o haaka deʼ o gurasi aha ngini niaumo hokä o peseke, ikali nitemo, ”Ngohioka de noiki!”

²³Nako ngininidatomo o gihihi, ma Jou ahawohidingoto o awana hupaya o gihihi gënanga iwango deʼ ihihasili o gugutuku demaboboloi. Mangale nia aiwani o gigini aha isadia o tonaka malua-luasi mamomoko ka haamokika.

²⁴O hapi manauru deʼ o keledai yapopajeko niadumule ahayaol̄omo o aiwani o gigini mainomo duru maoa-oa ihi diaiukuoka de madodagi yodingakoka.

²⁵Mawange hagala o bebeno o mehele ihigogilolitino niahaturu deʼ hagala manyawa yatoma, ol̄oku deʼ o doporono magetongo aha ihipooteke o ngairi maiti-iti.

²⁶O mede aha itararono kaimatero de o wange, deʼ o wange ahahigali matumidi iholoi itararono de biaha, hokä o dararono o wange tumidino hatoomuino idadi moi. Mata-mata gënanga ahaidadi maöraha ma Jou wadehoro deʼ wohitogumu Aiumati manga nabo-nabo yagoli-golioka.

²⁷Aikuaha deʼ aimulia ma Jou magurutoka de kaha pulono. O uku deʼ o nofo ihidumutu Aigangamo. Unanga imakoketemo dede önanga, deʼ Aidemo-demo yatuhuku hokä o uku.

²⁸Unanga wahuloko o hidal̄oko iwihihiraino hokä o nguihi magurutil̄e nangatomarino ihinahini hagala moi-moi. Unanga wabinaha o hoana deo berera, deʼ hagala toönanga manga datoro itotorou koidadiua.

²⁹Mä ngini, ma Jou Madutu Aiumati, aha nimorene deʼ ninyanyi hokä o agama mawange maago-agomo mahutuku. Ngini aha nimorene hokä hagala o nyawa yotagi yahiginïki o sulingi yameta ma Jou Ai Tau, o Israeloka manga roriwo wadö demo-demo.

³⁰Ma Jou aha wohitoihene Aiilingi imomulia, deʼ o nyawa moi-moi ahayamao Aikuaha ikokokiria. Aigangamo ahayodotagao o uku yatotuhu-tuhuku, o awana, irö riki-rikimi, o awana o helewo deʼ o rato.

³¹O Asyur manyawa ahayoruaeuku maöraha yoihene ma Jou Aiilingi deʼ yamao Aihukumanga itotubuho.

³²Magogiriaka önanga yamao Ai gogohara-gogohara, ma Jou Aiumati imahi sosanangi de o musik o gendang deʼ o kecapi. Ma Jou Madutu mahirete ahawoparangi walawani o Asyur manyawa.

³³Maöraha mahirali i botukuoka o ngï iwituhuku mangale o Asyur mangakoano. O ngï gënanga iluku deʼ iwoata, imadol̄a o gota hohi dofo-dofo itotoporono. Ma Jou aha wawango de wohiwuwu Aiwomaha hokä o ngairi o waliara.