Read Tobelo O YESAYA 31 Bible Online

O YESAYA 31 - Tobelo bible

O YESAYA 31

¹Yobodito o nyawa yoö oi-oiki o Mesirika mangale yogahoko o roriwo! Onanga yangaku o Mesir manga tentara yopoparangi manga kuata de manga duduono o kudauku yobare-barene deʼ manga kuda ikua-kuata ikali manga kereta mangöe. Mä önanga iwi ngakuua ma Jouika, o Israeloka manga Jou Madutu wotebi-tebini deʼ yogahokua Airoriwo.

²Ma Jou wobarija deʼ wohioriki okia Unanga wadiai. Unanga wodotagao o bodito deʼ wadiai Aihikokamodongo mangale Wahukumu o nyawa madorou deʼ o nyawa yarö riwo-riwo önanga.

³O Mesir manyawa duga-duga kao nyawa, ma Jou Madutuua. Toönanga manga kuda o dodadi biaha, mabiaha ikokuahaua. Nako ma Jou wodiai, o hoana yoriwo-riwo gënanga aha yopeleke deʼ o hoana yaro riwo-riwo aha yaotaka. Done yahinoto aha yobinaha.

⁴Ma Jou wohitemo ngohino, ”Hokä o singa yodomotumuku magoli mangale yogoana deʼ yamodongua manga böaka deʼ manga gigoro o gogoana o duduono moi imatoomu yalawani ënanga, hoko genango Ngohi ahatoparangi deʼ togoana o Sion madoporono.

⁵Hokä moi o totaleo imahi popopoka maigutu mal̄okuoka mangale yahohongino mangoha-ngohaka, hoko genango ngohi, o Jou Duru to Kokuaha aha togoana, toriwo deʼ tohihalamati o Yerusalem.”

⁶Ma Jou wotemo, ”O Israeloka manyawa, ngini nihilawanoka Ngohi deʼ nibaradoha Ngohino. Mä maöraha nënanga, nimaidulu Ngohino!

⁷Aha iboa maöraha ngini mata-mata nia umo o gomanga madulada-dulada o haakaino deʼ o gurasino ngini niadiai mahirete de iomanga o baradoha.

⁸O Asyur aha yobinaha o parangi magoronaka, mä de o nyawa ua makuata. O Asyur manyawa ahayopiringana o parangi mangïoka, deʼ toönanga manga nyawa yogögö aha yahidadi o gilaongo.

⁹Toönanga manga koano aha yoara imahi hawa-hawanika, deʼ manga tentara manga balu-baluhu duru yätodokana, hiädono önanga yodogumal̄aika o parangi mapaji-paji.” Ma Jou wotemoka, ma Jou iwihuba-huba deʼ iwihoromati de o huhuba ituhu-tuhuku o Yerusalemoka.