Read Tobelo O YESAYA 32 Bible Online

O YESAYA 32 - Tobelo bible

O YESAYA 32

¹Niolega, aha iboa maöraha womatengo ma koano wopareta dema adili deʼ o hoana manga tutuda-tutuda ihidagi o adili.

²Onanga moi-moi hokä o hohohongo mangï o hidal̄oko deʼ o ratoino. Onanga hokä o ngairi ihahuru o tonaka makokakahaoka, hokä o helewo mapako-pako mahohongo o tonaka madodoongoroka.

³O nyawa yao aku-akunu imahimake ahayatamunua mangalako, deʼ yakunu yoihene ahayohohininga.

⁴O nyawa mahira yaninïki o nahihu aha yodiai demanga sabar deʼ iomanga o mangarati. O nyawa yomou-mou ahayotemo de madodiai.

⁵O nyawa bodo yapulonokauaoli yohohoromati, deʼ yototipu-tipu yatemoua mangahininga irikoto.

⁶O nyawa bodo ihi demo hagala o demo ibodo-bodo deʼ ihi datoro itotorou. Okia dika yadiai ekola ihi demo marupa iwihikauku ma Jou Madutuika. Komaiwahi ünanga wahidöaka o inomo yahahahinika ekola yokere o nyawa manga kiriti madudungika.

⁷Enahioko womatengo wotipu-tipu wapikiri deʼ wadiai itotorou. Unanga wolingiri o akali mangale wahi bodito o nyawa mihikini de o demo ielu-eluku deʼ wätatoko önanga yamake manga haku.

⁸Mä o nyawa manga hininga itebini ihidatoro hagala o hali itotebini ihi datoro hagala o hali imomulia deʼ yodiaiö i momulia.

⁹Ni ihene, hei o ngongoheka niwango nimahi sosanangi, nibebasi de o huha!

¹⁰O öraha nënanga ngini yakunu niamao nisanangi, mä done hotaongo moiohi ngini ahanianganono itoaka, hababu o angguru nipagele idadiokaua, deʼ o tonaka mahomoa mahasili o koiwa.

¹¹Hiädono öraha nënanga ngini niwango nisanangi, nibebasi de o huha. Maöraha nënanga, nimahidahaharuku nihawana! Nia huputu niapakeanga deʼ nihiliko o ngoere o karongo niagoronaino.

¹²Niogari hagala niadumule iböboburere deʼ hagala o angguru maraki ihohoko iwö wöe-wöe,

¹³hababu ahinyawa manga tonaka yongango o momo irubu-rubu deʼ o momo dema hohihikaoka. Ya, niogari hagala niatau o nyawa manga ngï imahisosanangi deʼ o kota iomanga o rame!

¹⁴Ikali o kadato aha yodogumal̄aika deʼ o kota matiti irö rame-rame idadi kairïdika. O doporono deʼ hagala o gogoana mamenara ihirataka deo tonaka mangale kahiado-adonika. Hagala o keledai ihuhuku deʼ hagala oduba imahikabarihi deʼ iol̄omo o momo dokengoka.

¹⁵Mä mamoioli ma Jou Madutu ahawoboa de Aikuaha. Done o tonaka makokakaha aha idadi hagala o dumule maboburere, deʼ hagala o dumule ahahokä o hongana.

¹⁶O berera yamode-modekika ahanaga o hininga irikoto deʼ o adili.

¹⁷Moi-moi o nyawa aha yadiaioka itötotiai, hiädono naga o lola deʼ o dame kahiado-adonika.

¹⁸Ma Jou Madutu Aiumati aha yobebasi o huhaino, deʼ yowango o ngï irirïdoka deʼ idame-dame.

¹⁹Hokokia niautumu ngini mata-mata karana naga yaoaka o akere mangale niadö dato-datomo, deʼ nia aiwani o gigini yakunu iol̄omo o momo okiaika honanga de idame-dame. Mä niahaturu ahahokä o hongana yatapal̄u o awana o helewo deʼ toönanga manga kota ahaikilianga.