Read Tobelo O YESAYA 33 Bible Online

O YESAYA 33 - Tobelo bible

O YESAYA 33

¹Yobodito tongone nangahaturu-haturu! Onanga yoora ngaroka yaoraua, deʼ yodiai o romanga madorou ngaroka yodiaiua o romanga madorou. Mä yoora ibotino deʼ yodiai o romanga madorou, önanga mahirete aha yodadi ihihonenge yoora deʼ yododiai o romanga madorou.

²Ya Jou, nomïdora ngomi. Ngona tongomi miangonganono. Nomi hohongino ngomi o wange itagali o wange deʼ nomihihalamati ngomi o hidehehoto maörahoka.

³Nako Ngona nomaoko deʼ nohitoihene Ani ilingi maruruhu, hagala o hoana deo berera ahayopiringana deʼ hohahi bari-barihi.

⁴Hokä o kahoho matika o nyawa yaparangi deʼ yaora toönanga manga arata.

⁵Ma Jou duru womulia; Unanga wakuaha hagala moi-moi. Unanga ahawohigoko o tita deʼ o adili o Yerusalemoka

⁶deʼ wohidöaka o dame Aiumatika. O arata yahihohalamati önanga ganga o barija deʼ o ganako ikali o horomati ma Jouika.

⁷Hagala o nyawa o nauru yobobarani yopöaka yogahoko o roriwo; o huhuloko-huhuloko ihidailako o dame yoari de manga hininga ihuha.

⁸Hagala o ngekomo ma ago-agomo duru ibahaya hiädono idadi kairïdika; moiua o nyawa yanonu. O jaji ihipongono deʼ yafofakatioka yatila. Koiwakaoli yolegaika.

⁹O berera yodogumal̄aika idadi kairïdika. O Libanon mahonga-hongana kama bobelelaka, deʼ o Sion mawai iboburere i dadi hokä o tonaka makokakaha. O Basanoka deʼ mal̄okuoka o hoka-hoka ikokirero.

¹⁰Ma Jou wätemo o hoanika gënanga, ”Oraha nënanga Ngohi aha tomaoko deʼ tadiai tohi dumutu Ahikuaha.

¹¹Niadatoro kaparahaja, deʼ hagala ngininiadodiai koiwa mabaraguna. Nia gangamo hokä o uku yabinaha niadiri mahirete.

¹²Ngini hokä o torohugu yatuhuku mangale yadiai o dofae; hokä o momo irubu-rubu mahohihika yatol̄anga deʼ yatuhuku o uku magoronaka.

¹³Mal̄aika mata-mata o nyawa yotigi-tigino yaoa yokuru-kurutika yoihene mangale Ahi manarama deʼ ihigoungu Ahikuaha.”

¹⁴Hagala o nyawa baradoha o Sionoka yohaharoka yohawana. Onanga yato, ”Ma Jou Madutu Aiputuhu hokä o uku itoka-tokara mangale kahiado-adonika. Mudukua naga yakunu yotongohono o uku yahibobinaha gënanga magoronaka?”

¹⁵Ngini yakunu nitongohono nako ngini nitemo deʼ nidiai o diai. Uha nilingiri o utumu de niateo o mihikini manyawa, deʼ uha niatarima o tiwi o urubokumu. Uha nimakinïki de o nyawa mangadatoro o doma ekola o dorou mahomoa.

¹⁶Done ngini ahainihohongo deʼ nirïdi, matero-tero naga o bebeno o mehele ikua-kuata magoronaka. O inomo deʼ o akere ihidiaiuku mangale ngini.

¹⁷Aha iboa maöraha ngini niwimake womatengo o koano wopareta de makaramata mangale o berera mabebeno o mehele ihoheika hagala o libuku.

¹⁸Niahawana ipöpaha-paha o soungu yogaho-gahoko, yo pangka-pangkati deo gogoana maporetino igogogere kanio hininga dika.

¹⁹Ngini ahaniamakeokaua hagala o nyawa maporetino yanako-nakoua o adati yotemo-temo manga bahasa magoronaka ngini nimangaratiua.

²⁰Niapulono o Sion makota, mangï ngone hohi amoko hagala o agama marameanga. Niapulono o Yerusalem! Hokokia marïdi o ngï gënanga mangale niogogere hokä o tau-tau komaiwa yatururu, mabebeloho komaiwahi yarahuku deʼ komaiwahi maliliko itoaka.

²¹Ma Jou ahawohimatoko Aimulia ngoneino. Ngone aha howango o ngairi iwoa-woata madatekoka, yakunua yohidete o haturu manga kapa.

²²Mata-mata toönanga manga kapaoka makia honanga ingo ngodu-ngodumu koiwa mabaraguna; hagala mahidete yakunua yahohe! Mata-mata o haturu maduduono manga kaya aha ngone haora, deʼ magegetongo duru kohä ngöe, hiädono o nyawa yopopalugaö mayamake o hidoku. Ma Jou mahirete ahawodadi tongone nanga koano; Unanga ahawopareta, wohigoko o tita deʼ wonähihalamati ngone nangahaturuino.

²⁴Moiua tongone nanga bereraka ahayotaiana karana yopanyake, deʼ mata-mata o baradoha ahayahiapongo.