Read Tobelo O YESAYA 34 Bible Online

O YESAYA 34 - Tobelo bible

O YESAYA 34

¹Niaino nimatoomu, hei hagala o hoana deo berera, deʼ ni ihene. Mal̄aika o dunia ingodumu deʼ mata-mata iwö wango-wango magoronaka iboa dei ihene.

²Ma Jou wängamo mata-mata o hoana deo bereraika deʼ hagala toönanga mangaduduono. Unanga ahawähukumu deʼ wäbinaha önanga.

³Toönanga mangamaiyeti-maiyeti ahailungunua, mä imal̄aika dika idadi imela deʼ ibounu. Hagala ol̄oku ahaitokara karana yodunguihi toönanga manga awunu.

⁴ O wange, o mede deʼ hagala o murumu ahaibodito. O dihanga ahayalulu hokä o karatahi ilüluluino. Hagala o murumu aha itifa hokä o hoka-hoka iturabaha mautuoka de yauku.

⁵ Ma Jou wohidiaioka Aioworo ohorogaka deʼ o öraha nënanga o oworo gënanga ahayatapal̄u o Edom manyawa yogogelengaoka o hukumanga deʼ ahayahibinaha.

⁶Ma Jou Aioworo ahaimahi nauhoka o awunu deʼ iomanga de toönanga mangahaki, hokä dema awunu deʼ mahaki o aiwani ihihuba-huba. Hababu ma Jou wadiai o huhuba o Bozraoka, deʼ wodiai o doma maago-agomo o Edom matonakoka.

⁷Hagala o nyawa ahayohonenge hokä o hapi ihuhuku deʼ o hapi magö. Toönanga mangaberera ahaitokara de o awunu deʼ iomanga de o haki.

⁸Genanga ma Jou Aiöraha woriwo o Sion deʼ wabalahi aihininga wagogonika aihaturu-haturuika.

⁹O Edom mangai-ngairi ahaingali idadi o teri, deʼ matonaka idadi owalira. Mabaha oberera ingodumu itokara hokä o teri.

¹⁰ O hutu de owange madokara gënanga ihonengua, deʼ manofo ikokapupu enangil̄e mangale kahiado-adonika. O tonaka gënanga aha imal̄aika ihomoa deʼ ikakaha ingohaka deʼ idanongo, deʼ moiokaua yanonu.

¹¹O totaleo, o undan deʼ o landak ahayogogere, o totaleo o wuku de o ginene deʼ o wogono aha yögogere dokengoka. Ma Jou wohidadi o tonaka gënanga iruaeuku deʼ ihomoa hokä wohidadiuaohi.

¹²Koiwa o koano yopareta o bereraka gënanga, deʼ mata-mata matutuda yohihangoka.

¹³Hagala o bebeno o mehele deʼ hagala o kota mabebeno o mehele aha yongango o momo marubu-rubu mahohihika deʼ o momo, deʼ yögogere o kaho o honganika deʼ o totaleo o unta.

¹⁴O aiwani madorou aha yodogerewotika magoronaka; hagala o tokata imakokabaluhu, deʼ o hutu-hutu matokata imalingiri mangï imahi batongo.

¹⁵O ngioka gënanga o dodiha ibiha-biha imadiai maigutu, yogohi, yomoduku deʼ yapaliara mangoha-ngohaka. O totaleo o kawihiö imatoomu demahabi moi-moi.

¹⁶Nialingiri deʼ niabasa ma Jou Ai Buku magoronaka: Koiwa moiö o dodadino gënanga aha ihihanga ekola koiwa mahabi. Hababu hoko gënanga ma Jou Aipareta, deʼ Unanga mahirete watoomuoka ënanga.

¹⁷Ma Jou waregu-regu o berera gënanga toönanga mangahidogoronaka deʼ moi-moi yatarima mangahidoku. Onanga ahayogogere genangoka mangale kahiado-adonika, deʼ o tonaka gënanga idadi toönanga madutu mangangohaka de mangadanonguku.