Read Tobelo O YESAYA 35 Bible Online

O YESAYA 35 - Tobelo bible

O YESAYA 35

¹O tonaka makokakaha de o tonaka madödududungu imorene, o bunga-bunga ihohe o tonaka makokakahaoka.

²O tonaka makokakaha ihero kohagiria, deʼ inyanyi de o ngekomo malugo-lugo. Mahailoa hokä o Libanon mal̄oku, mapamoro hokä o Karmel deʼ o Saron mawai. Done o nyawa magetongo ahayamake ma Jou Ai kuaha, deʼ ai mulia tongone nanga Jou Madutu.

³ Niakuata niagiama yabö bole-bole, niabitumu niabuku ihahahara.

⁴Niatemo mangahininga iö ete-etekika, ”Niakuata niahininga, uhanihawana, nia Jou Madutu woboa mangale wähukumu o haturu, Unanga woboa winihihalamati ngini.”

⁵ O öraha gënanga o nyawa yopilo-piloko ahayakunu imahioriki, deʼ o nyawa yatotopongono aha yakunu imahihene.

⁶O nyawa yotalo-talo imatototubo hokä o maijanga, o nyawa yomou-mou imä uli-ulili yomorene. Hababu o jobubu yodohoropu o tonaka makokakahaoka, o ngairi ihahuru o tonaka makokakahaoka.

⁷O dowongi mahau-hauku aha idadi o lupanga, o tonaka itotoongoro ahaidadi o akere matiti. O ngï mahiraino yogogere o kaho o honganika, aha yongango o totuhuro deʼ o buho.

⁸Dokengoka ahanaga o ngekomo maago-agomo, ”O ngekomo madumutu o halamati” maromanga. O nyawa baradoha ahayatilakuru dokengoka, o nyawa bodo ahayahirehenua o nyawa yanö nononu.

⁹O ngïoka gënanga ahakoiwaka naga o singa, ekola o aiwani madorou mahomoa. Hagala o nyawa wahihohalamatoka ma Jou aha yotagi dokengoka.

¹⁰Hagala o nyawa wahibö bebebasi ma Jou aha yolio; önanga yongohama o Yerusalem makota de ima uli-ulili, toönanga mangabiono mamangangoro karana manga morene i kokakali. Onanga aha ima garago deʼ yomorene; o duka deʼ o liwolu de o daiyana ihihangoka.