Read Tobelo O YESAYA 36 Bible Online

O YESAYA 36 - Tobelo bible

O YESAYA 36

¹O taongo mangimoi de iata magoronaka aipareta o Hizkia o Yehuda manga koano, o Yehuda makota-kota mabebeno o mehele waparangi deʼ wautumoka o Sanherib, o Asyur manga koano.

²Iboto gënanga ünanga wähuloko aitentara komanga ngöe mangale yogahoko hupaya maKoano Hizkia womaike. Onanga imahiadono o kotaoka gënanga deʼ imal̄e o ngï o dumuleoka yahetongo Yo Foka-foka mangaDumule o baraka madatekoka ihihahahuru o akere o lupanga dakuil̄e idadaduoka de yauku.

³Daha yaruange o Hizkia aipegawe yoboa imakamake o Asyur mangatentara mangabaluhu gënanga. O pegawe yaruange gënanga ganga o Elyakim o Hilkia aingohaka o kadato manga tau manyawa mangabaluhu, o Sebna o negara masekretaris, deʼ o Yoah o Asaf aingohaka, o kadatoka masekretaris.

⁴O Asyur mangatentara mangabaluhu gënanga wätemo onangika, ”Nihiadono makoano Hizkiaika makoano Asyur ai demo nënanga, ’Yadodoa ngona namao anidiri ikuata?

⁵Ngona natobote o demo dika yakunu natagali mangaakali deʼ mangakuata o tentara? O nagona nangaku hiädono ngona nobarani nalawani o Asyur?

⁶ Ngona igoungu nanganono o Mesir mangaroriwo, mä gënanga kaimatero hokä o nguhumu maröehe napake mangale ani diki-diki; — done o diki-diki gënanga itobiki deʼ anigiama yatohoko. Hoko gënanga o Mesir mangakoano mangale o nyawa mata-mata iwingano-nganono unangika.’ ”

⁷Wohigila-gila o Asyur mangatentara mangabaluhu wotemo, ”Ekola mudukua ngini nitemo nïwinganono ma Jouika mia Jou Madutu? Maöraha o Hizkia wahipareta hupaya o Yehuda deʼ o Yerusalem ma nyawa duga-duga yopuji o huhuba mangï mahimangoka o Yerusalemoka, koigoungua wakiliangoka o huhuba gënanga o huhuba mangï deʼ hagala o ngï iwihuba-huba ma Jou mahirete?

⁸O öraha nënanga de makoano Asyur airomanga tobarani tobataru nako nginiinihidöaka o kuda o dutu o ribuhu hinoto, maraioka tingini ahahoko genangua manga ngöe gënanga mangale yöbarene.

⁹Mangale nialawani o Asyur mangatentara mangabaluhu duru yototipokoukuö ngini konia poaua. Mä ngini nianganono o Mesir ihidingoto o roriwo o kereta ihipoparangi deʼ mangaduduono yobare-barene o kuda!

¹⁰Ngini niatobote miniparangi deʼ miautumu niaberera ma Jou Airoriwoua? Ma Jou mahirete womïhuloko ngomi miaparangi deʼ miabinaha.”

¹¹Daha o Elyakim wato, o Sebna deʼ o Yoah o Asyur mangatentara mangabalu-baluhika gënanga, ”Tuanga, notemo dika o Aram mangabahasa magoronaka de ngomi, ngomi mimangarati. Uha napake o Ibrani mangabahasa, done imangarati o kawaha o kota mabebeno o mehele mal̄okuoka gënanga.”

¹²O tentara mangabaluhu gënanga wohaluhu, ”Boteka nginika deʼ niakoano dika wohihuloko makoano Asyur mangale tohiadono mata-mata nënanga? Ngohiö tohi ade-ade o kawahaika yogogeruku o bebeno o meheloka gënanga, kamamoi de ngini niaol̄omo aiioko mahirete deʼ niaokere aiihihi mahirete.”

¹³Ipaha o tentara mangabaluhu magogurutil̄e gënanga womaoko deʼ womapöaka de o Ibranioka mademo, ”Ni ihene okia o Asyur mangakoano wotö temo-temoka,

¹⁴’Uha niomodeke winitipu o Hizkia! Unanga wakunua winïhihalamati ngini!

¹⁵Uha nihigihene aibobaja mangale niwïnganono ma Jouika. Uha niatobote ma Jou ahawinïhihalamati ngini ekola watatoka o Asyur manga tentara yaora niakota.

¹⁶Uha niwihigihene o Hizkia! Ngohi, o Asyur mangakoano tohidöaka o nasihati hupaya nihupu o kota magoronaino deʼ nimaike. Done nginiyakunu niol̄omo o angguru mahohoko niadumuleino mahirete, ikali niokere niahumuino mahirete,

¹⁷hiädono ngini tinïtururu o berera moika yodangadeika niaberera mahirete. Dokengoka naga o angguru madumule ihihasili o angguru nginiika, deʼ o gandum madumule ihihasili o gapuno mangale niainomo.

¹⁸Uha niwihigihene o Hizkia! Unanga duga-duga winitipu ngini de wotemo ma Jou ahawinïhihalamati ngini. Mamoi iböto o hoana mahomoa mangagikiri ihihalamati aiberera ahikuahaino?

¹⁹Kiaka o Hamat deʼ o Arpad mangaberera magiki-gikiri? Kiaka o Sefarwaim magiki-gikiri? Naga iboa ihihalamati o Samaria?

²⁰O gikiri hoko kiaka mamoi iböto ihilapahi aiberera ahikuahaino? Kiaka yakunu ma Jou wohihalamati o Yerusalem!ʼ ”

²¹Yoihene gënanga, o Yerusalem manyawa yohaluhua, hababu ma Koano Hizkia wahiparetaoka hupaya önanga imarirïdoka dika.

²²Done o Elyakim, o Sebna deʼ o Yoah yakakihi toönanga mangapakeanga manonako mangahininga ihuha, daha yoiki ma koanoika ihingahu okia waheto-hetongoka o Asyur mangatentara manga baluhu gënanga.