Read Tobelo O YESAYA 37 Bible Online

O YESAYA 37 - Tobelo bible

O YESAYA 37

¹Maöraha ma Koano Hizkia woihene o hingahu o nyawa ya ruangeino gënanga, ünanga wakakihi aipakeanga deʼ womahinoa o pakeanga o karongo manonako aihininga i huba, dahaünanga woiki ma Jou AiTauika.

²Ipaha ünanga wähuloko o Elyakim o kadato mangabaluhu, o Sebna o negara masekretaris deʼ o imam-imam de manga pangka-pangkatoka imakamake ma Nabi Yesaya, o Amos aingohaka. Onanga imahi noa o pakeanga o karongo.

³Nenanga o Hizkia aibehehongo önanga ihio ado-adono o Yesayaika, ”O wange nënanga o duka mawange; ngone inä hukumu deʼ inähikauku. Ngone hokä o ngoheka momauoka mongohaka, mä amikuata imataka.

⁴O Asyur manga Koano wihuloko aitentara manga baluhu ikokurutil̄e mangale iwihikauku ma Jou Madutu wowango-wango. O nagona ihioriki ma Jou Madutu woihenoka o hikauku gënanga deʼ wahukumu önanga yototemo-temo! Karana gënanga nomä niata ma Jou Madutuika mangale tongone nanganyawa kayo wango-wangohi.”

⁵Watarima iböto o behehongo ma Koano o Hizkiaino gënanga,

⁶o Yesaya wähuloko o huhuloko-huhuloko gënanga ihiadono o bobaluhu nënanga, ”Ma Jou wotemo, jou koano ngarouha nohawana noihene aihitararono o Asyur mangakoano aigogilaongo gënanga ma Jou wonä pidilua ngone.

⁷Ma Jou aha wadiai o Asyur mangakoano wohohininga moi o abari o hidal̄oko hiädono ünanga wolio aibereraika mahirete, deʼ dokengoka ünanga ahaiwi toma.”

⁸O Asyur mangatentara mangabaluhu magogurutil̄e wamake o abari aikoano wamal̄aka o Lakhis deʼ magogiria imateke parangi walawani o Libna makota, ikurutikaua de gënanga. Daha ünanga woiki dokengika mangale imamake aikoano gënanga.

⁹O Asyur mangaKoano watarimaoka o abari o Mesir mangaduduono o Tirhaka aitutuda matimioka o Sudanino magogiria yoboa yäparangi önanga. Karana gënanga, o Asyur mangakoano wohidingoto o hurata o Hizkiaika,

¹⁰o Yehuda manga koano. Hoko nënanga mademo o hurata gënanga, ”Uha initipu mangale ma Jou Madutu Ai jaji nangö ngaku-ngaku gënanga ngona ahano otakua ahigiama mahoatika.

¹¹Ngona noihenoka o berera yogetongo o Asyur mangakokoano yaparangi yabinaha kamamoiuku. Uha natobote ngona yakunu nootana.

¹²Maöraha ahiete de ahitohora yabinaha o Gozan, o Haran, deʼ o Rezef makota, ikali yätoma hagala o Eden manyawa yogögogogere o Telasaroka, moiuaö toönanga mangagiki-gikirino yahihalamati önanga.

¹³Kiaka manga kokoano o kota Hamat, o Arpad, o Sefarwaim, o Hena deʼ Iwa?”

¹⁴O Hizkia watarima o hurata gënanga o huhuloko-o huhuloko deʼ wabasa. Ipaha ünanga woiki ma Jou AiTauika deʼ wahoheika o hurata gënanga ma Jou Aihimangoka,

¹⁵ dahawomaniata wato, ”Jou Duru no Kokuaha, o Israeloka manga Jou Madutu, ani ngï nogogeruku o dodadi o horogaino de magö gahuhuoka mal̄okuoka, Ngona o Jou noma tengo-tengoka nakuaha hagala o pareta o dunia mal̄okuoka. Ngona nohidädadiö dihanga deʼ o dunia.

¹⁷Jou, tanunohohininga okia magogiria idadi dede ngomi. Noihene mata-mata o Sanherib wonihikauku Ngonaika, Jou Madutu nowango-wango.

¹⁸Ngomi mata-mata mihiöriki, Jou, o Asyur mangakokoano yabinahaoka manga ngöe o hoana deo berera yawede-wederoka toönanga manga berera.

¹⁹Toönanga manga giki-gikiro yatuhuku deʼ yawedere, hababu o giki-gikiri gënanga mata-matauku koiwa makuaha. Onanga duga-duga o dulada o gotaino deʼ o helewo o nyawa manga manarama.

²⁰Ya, Jou tongomi mia Jou Madutu, nomihipidili ngomi hagala o Asyur manyawaino gënanga, hupaya hagala hoana deo berera o duniaoka ihiöriki ngona o Jou noma tengo-tengoka.”

²¹Ipaha o Yesaya wohidingoto o behehongo maKoano Hizkiaika hokä mabobaluhu mangale makoano ainiata,

²²ma Jou wotemo, ”O Yerusalem makota inigogiete deʼ inihohedu ngona, Sanherib!

²³Nohiöriki ngona o nagona nadoa-doana deʼ nahikauku gënanga? Ngohi, o Israeloka manga Jou Madutu, o Jou Madutu totebi-tebini.

²⁴Ngona nahidingoto anihuhuloko mangale nomahil̄e de mangöe o kereta nohipoparangi, ngona nahihangoka hagala ol̄oku magogurutil̄e o Libanonoka. Ngona noma edenge ngona natol̄angoka hagala o liwewuru mautu duru magogurutil̄e deʼ duru mahohailoa, ikali nongohama mahonga-hongana duru irö rubu-rubu.

²⁵Ngonaö nomahi lamoko ngona nofaiti o humu deʼ nokere o akere hagala o nyawa maporetino mangabereraka, deʼ ani tentara-tentara yapito-pitoko o Nil ma Ngairi hiadono itore.

²⁶Komaiwahi ngona noihene mata-mata gënanga Tohidatoroka maöraha mahiraohi? Deʼ öraha nënanga Ngohi tadiai. Ngohi toni hidöaka ngonaika o kuaha mangale nawedere hagala o kota ma bebeno o mehele idadi kama dodoropaha.

²⁷Hagala o nyawa yogogogere dokengoka imasikaua; önanga ya todokana de yohawana. Onanga hokä o momo o tonaka malua-luasoka ekola o momo iwango o tau makatuoka, yatoolenge nako yawuwu o hidal̄oko o wange mahiwariha ihö hau-hauku.

²⁸Mä Ngohi tohiöriki hagala moi-moi mangale anidiri. Ngohi tohioriki okia ngona nadiai deʼ kiaika ngona noiki. Ngohi tohioriki ngona duru nongamo Ngohino,

²⁹deʼ Ngohi toihenoka mangale ani gangamo de ani edenge gënanga. Oraha nënanga Tohipake o lalakete aningunungika deʼ o aro-aro aniuruino, hupaya ngona Tonitatauru tonihigilio natilakuru o ngekomo nanononu maöraha noboa.”

³⁰O Yesaya wohidingoto o behehongo nënanga o Hizkiaika, ”Nenanga ahaidadi o nonako ngonaika. O taongo nënanga deʼ o taongo nanga himangoka o nyawa ahayaol̄omo o gandum iwö wango-wango mahirete. Mä iböto gënanga önanga yakunu imadatomo o gandum deʼ o angguru ikali yajame mahasili.

³¹O Yehuda manyawa kayo wangohi aha mata-mata kadema ënanga hokä o dadatomo mangutuku duru koha lukuuku deʼ ihihasili o hohoko.

³²O Yerusalemoka deʼ o Sion mal̄oku mal̄okuoka aha naga hagala o nyawa yohalamati, hababu ma Jou Duru wo Kokuaha wohitantuoka o hali gënanga ahaidadi.

³³Nenanga ma Jou wotemo mangale o Asyur mangakoano: ’Unanga ahawongohamua o Yerusalem ekola wohitoimi aitoimi o kotaika gënanga. O tentara-tentara de mangadadatokoka koiwa yatigika o kota gënanga, deʼ magilolitino ahaihi gokoua yagogogoana mangabeno.

³⁴O Asyur mangakoano ahawolio watilakuru o ngekomo wanö nononu maöraha woboa, wongohama o kota gënanga. Ngohi, ma Jou, totemoka.

³⁵O Yerusalem makota aha Togoana deʼ Tahohongino mangale Ahihoromati mahirete deʼ mangale Ahijaji de Ahigilaongo o Daud.’ ”

³⁶O hutu genangö ma Jou Aimalaekat iboa o Asyur manyawa mangatau-tau ika deʼ yatoma yaribuhu o ratuhu moi de moritufange de motoa o tentara manyawa. Yarehino mawange o ngoru-ngorumino toönanga manga maiyeti-maiyeti imahi kokabarihika.

³⁷Done o Sanherib womadohuku, o Asyur mangakoano, deʼ wolio o Niniweika.

³⁸O wange moiuku, maöraha ünanga magogiria wopuji o Gikiri Nisrokh matau magoronaka, ünanga iwitoma de o oworo mangale o Adramelekh deʼ o Sarezer, aingoha-ngohaka o nauru. Iboto gënanga önanga yoara o Araratika. Done o Esarhadon, ai ngohaka o nauru mahomoa, wodadi witagali ünanga.