Read Tobelo O YESAYA 38 Bible Online

O YESAYA 38 - Tobelo bible

O YESAYA 38

¹O öraha gënanga magoronaka o Hizkia wopanyake deʼ ngadekohi wohonenge. Ma Nabi Yesaya o Amos aingohaka, wilega ünanga deʼ witemo, ”Ma Jou wobehehongo hupaya Jou Koano natiai mata-mata anihidailako, hababu Jou Koano ahanotogumua. I tedekanuaoli jou Koano ahanohonenge.”

²O Hizkia womaidulu o bebeno o mehelika, daha womäniata,

³”Jou, nohihininga ngohi nënanga tomahigilaongoka Ngonaika de ahisatia deʼ ahihininga irikoto. Ngohi hokogenangika tohidailako tamoteke Animau.” Daha o Hizkia woari de aihininga ihuba.

⁴O Yesaya woikoka, ma Jou wïhuloko ünanga

⁵womaidulu o Hizkiaika deʼ wohiadono o behehongo nënanga, ”Ngohi, o Jou, ma Jou Madutu wohihö huba-huba o Daud aniete de anitohora, woihenoka aniniata deʼ wamake anikongo. Ngohi ahatodogo aniumuru o taongo ngimoi de motoaoli.

⁶Ngona deʼ o Yerusalem makota aha o Asyur manga Koanoka de Tinihipidili. O kota nënanga ahakahirahi Tahohongino.” Daha o Yesaya wähuloko o nyawa yawedere ya alu-aluhuku o ara mahohoko daha ihinauhu o Hizkia aiborohika hupaya i togumu. Ma Koano Hizkia woleha, ”Okia manonako ma Jou ahawohihi togumu deʼ ngohi yakunu toikoli ma Jou Ai Tauika?”

⁷O Yesaya wohaluhu, ”Nenanga manonako ma Jou wohidöaka jou Koanoika Unanga waganapu Aijaji.

⁸Mahidumutu o wange ma jam ma Koano Ahas wododiai, ma Jou ahawadiai magurumini o riri ngimoioka.” Done idohuku o gurumini gënanga iriri ngimoioko.

⁹O Hizkia wotogumu ibotino, ünanga wotulihi o higiriri manyanyi nënanga:

¹⁰”Totemo, daha mahononga tongohi ahiumuru kiani toiki, tohibobaha ahingango mahou o nyawa yohone-honenge mangaduniaka.

¹¹Totemo, ngohi ahatimake okauaoli ma Jou o duniaka, ekola tämake o nyawa o duniaka nënanga.

¹²Ahi nyawa itöaka, hiädono ahiajali, hokä o gogoana manga tau-tau yakilianga; hokä o pakeanga yatobiki yododiai mapakakahino; tatobote ma Jou Madutu ahawohibobaha ahingango.

¹³O hutu magurutu ngohi tohiboa-boaka mahiri, matero-tero ahi kobo-kobongo yawedere o singa o dutu moi; tatobote ma Jou Madutu aha wohibobaha ahi ngango.

¹⁴Ahiilingi iholoi ihutulu deʼ ibole, hokä o namodara ngohi totaiyana. Ahilako yabole karana imatagail̄e o dihangil̄e, Jou, nohihibebasi ngohi o huhaino nënanga.

¹⁵Okia yakunu totemo? Nenanga ma Jou Aimanarama; ngohi takunua tomäidu karana ahihininga mahuha.

¹⁶Ya Jou, nohihidöaka ngohi o ngango mangale Anidemo deʼ Ani manarama, mal̄aika ngohi towango Ngonaoka dika.

¹⁷Ahi hininga mahuha ahaingali idadi irïdi, Ngona nohihalamati ngohi o bahayaino; hagala ahibaradoha Na apongoka mata-mata.

¹⁸O honenge ma alamoka koiwa ini higiriri Ngona, o nyawa yohone-honenge yakunua yönganono Anisatia.

¹⁹Duga-duga o nyawa yowango-wango inihigiriri Ngona, hokä tadodiai o wange nënanga. Mangadimono yaade-ade mangangohakika hokokia Anisatia Ngona, ya Jou.

²⁰Jou, Ngona nohihi togumoka ngohi, done ngomi mihi nyanyi o higiriri ani Tauoka de miakuti o kecapi, tongomi mia wowango magurutu.”