Read Tobelo O YESAYA 39 Bible Online

O YESAYA 39 - Tobelo bible

O YESAYA 39

¹O öraha gënanga magoronaka, o Babel mangakoano, enagënanga o Merodakh o Baladan aingohaka, woihene ma Koano Hizkia wopanyake daha wotogumino. Done ünanga wähuloko o nyawa mangale yoao o hurata deʼ o hadia o Hizkiaika.

²O Hizkia wätarima o huhuloko-huhuloko gënanga de aihininga isosanangi deʼ wahidumutu onangika hagala aikaya, enagënanga o gurasi deʼ o haaka, o rampa-rampa deʼ o minya mabou-bounu, aitentara manga dae ingodumu. Koiwa okianaga moiö kadatoka deʼ ai paretaka i ngodumu la kowahimatokua onangika.

³Ipaha ma Nabi Yesaya wihimanga ma Koano Hizkia deʼ wileha, ”Okiaino hagala o nyawa gënanga? Onanga yato okia?” O Hizkia wohaluhu, ”Onanga o Babelino, o berera magogurutika.”

⁴”Onanga yamake okia o kadatoka?” o Yesaya wolehaoli. ”Hagala moi-moi,” o Hizkia wohaluhu. ”Koiwa o baranga o kadato magogogono magoronaka la tahimatokua onangika.”

⁵Daha o Yesaya wïtemo makoanoika, ”Ma Jou Duru wo Kokuaha wotemo,

⁶’Aha iboa maöraha hagala o kaya anikadato magoronaka, deʼ yatotoomuoka ani ete de ani tohora hiädono o wange nënanga, yatoraka o Babelika. Koiwa aha igogogere.

⁷ Ani ngohaka de ani danongino naga aha yal̄e deʼ yahidadi o kadato mapegawe mangale iwileleani o Bebel manga koano.’ ”

⁸Ma Koano Hizkia wohaluhu, ”Kayaoa dika ma Jou Ai behehongo nohiö ado-adono ngohino.” Unanga wohaluhu hoko gënanga karana wapikiri: ”Itiahali ahipareta kahirahi irïdi deʼ i dame madekaana ngohi towango.”