Read Tobelo O YESAYA 40 Bible Online

O YESAYA 40 - Tobelo bible

O YESAYA 40

¹Hoko gënanga wotemo ani Jou Madutu, ”Nialaru, nialaru Ahiumati!

²Nia rïdi o Yerusalem manyawa mangahininga, niahetongo hokä yogilaongo ipahaoka. Toönanga mangahowono Tohiapongoka, hagala toönanga mangabaradoha Tahukumoka higali mahinoto.”

³ Naga o ilingi ipoa-pöaka, ”Nihidiai o ngekomo o tonaka makokakahaoka mangale ma Jou. Nia rikoto o ngekomo maago-agomo o tonaka makokakahaoka mangale tongone nanga Jou Madutu!

⁴O wai yogetongo kiani niöpohuku, ol̄oku deʼ o doporono nihirata. O tonaka itotoporono aha idadi irata, deʼ iguhu-guhu nihi nouhu.

⁵Deone ma Jou Aimulia ahaihi nyata; o umati o nyawa yongodumu aha yahakihi. I goungu, ma Jou mahirete wojajioka!”

⁶ Naga o ilingi itemo, ”Nohiabari!” Ngohi toleha, ”Okia kokiani tohiabari?” ”Nohiabari o nyawa hokä o momo, hokä o bunga duga-duga kaijai-jai mahailoa.

⁷O momo idadi itoolenge deʼ mahuri idadi imaai, nako ma Jou wohiwuwu o hidal̄oko ihau-hauku. Igoungu o hoana deo berera gënanga hokä o momo.

⁸O momo idadi itoolenge deʼ mahuri idadi imaai, mä tongone nanga Jou Madutu Ai demo itongohono kahiado-adonika.”

⁹Nodoa ol̄oku magogurutil̄e mal̄okuil̄e, deʼ nohingahu o abari maoa o Yerusalemika! Nopooka de ani ilingi makuatil̄e, de nohi ngahu o Abari Moa o Sionika! Nahetongo hegala o kata o Yehudika. Nahetongo hagala o Yehuda makotaika toönanga manga Jou Madutu ahawoboa!

¹⁰ Niolega, ma Jou o Jou Madutu woboa de aikuaha mangale wodiai de ainauru. Unanga iwinïki hagala o nyawa Wahibë bebasoka.

¹¹ Hokä womatengo o gogoana Unanga wapaliara Aiaiwani ma tika; Unanga mahirete wätoomu önanga. O duba mangohaka watotiri, de hagala ma ayo Unanga wätuda wabole-bole.

¹²O naguna wasupa o ngöto de aigiama mahoata wohiuiti, ekola watuga o gitawa de obuhaanga? O nagona yasupa o dunia matonaka de o susupa ekola yatibanga ol̄oku deʼ odoporono de odidibanga?

¹³ O nagona iwituda ma Jou, ekola iwidotoko Unanga hokä winonasihati?

¹⁴O nagonaika ma Jou womäleha hupaya womamake o ganako deʼ o mangarati? O nagona iwi hidöaka o hidumutu Unangika mangale wodiai de yakokorona?

¹⁵Mangale ma Jou hagala o hoana deo berera ma ago-agomo hokä o akere o dututu moi o hia-hia magoronaka, hokä o kafo o mukulu moi o didibangoka; hagala o nuhu kaimatero mamuguwini deo kafo ma alu-aluhu.

¹⁶Mata-mata o aiwani o Libanon mahonganoka yawedonua mangale ihidadi o huhuba ituhu-tuhuku; magota-gota duru kohamuhutulu mangale ihidadi o gota ihidofo-dofo.

¹⁷Mata-mata o hoana deo berera koiwa mamangarati mangale Unanga, matero-tero koiwa Aihimangoka.

¹⁸ Ho, de o nagona ngona nomau nihitero ma Jou Madutu? O nagona napulono imarupamoi dede Unanga?

¹⁹Unanga hokä o duladaua o tuka-tukanga mangamanarama, o dulada malape o gurasi deʼ mahohol̄e o haaka,

²⁰O nyawa yakunua imäija o gurasi ekola o haaka, yairiki o gota igapangua itorou. Unanga wolingiri o tukanga yanö nako-nako mangaleyodiai o dulada igapangua igiwi.

²¹Kiaka yakunu ngona nohiorikua deʼ noihenua, deʼ inihingahua Ngonaika maöraha kahuruono? Kiaka yakunu Ngona nomangaratiua mamulaenginohi sarakia mamulaenge o dunia?

²²Wohidö dadadi womapareta makuruhi o dunia mahululunu mal̄okuoka, manyawa wapulono mangamengeteke hokä o kahoho. Unanga wohihoheika o dihanga hokä ongöere, deʼ wohipake hokä o tau-tau mangalewögogere.

²³Unanga wadiai yokokuaha imagakunua, deʼ yoago-agomo ihihanga manga kuaha.

²⁴Onanga gënanga hokä idato-datomo magö daha imulaenge mangutuku ihiara. Nako ma Jou wohiwuwu o hidal̄oko, önanga yotoolenge deʼ yahihaili hokä o gandum maröehe madoolenge.

²⁵O nagona näpulono o rupamoi de ma Jou Madutu Duru wo To Tebi-tebini? De o nagona ngona nomau nihitero Unanga?

²⁶Napulono odihangil̄e, de nöhohininga! O nagona ihidadi hagala o murumu? Unanga watatoro ënanga hokä o tentara manga duduono, Unanga wohiroiki magegetongo ënanga mata-mata, deʼ waahoko moi-moi de maromanga. Koiwa moiö la ihihanga, karana ilamoko ma Jou Aikuaha!

²⁷Ho Israel, yadodoa ngona notaiana, matero-tero ma Jou ani Jou Madutu wohiorikua ngona nohuha? Matero-tero Unanga wolegaikaua ani wowango, deʼ wohiningaikaua ani haku?

²⁸Kiaka yakunu ngona nohiorikua deʼ noihenua? O Jou ma Jou Madutu wokokakali, wohidadadi o dunia ingodumu. Unanga komaiwahi idadi iwibole ekola womangakunua; Aidibanga hakunua hodumunu.

²⁹Unanga wahikuata onyawa yabole-bole, wahidöaka o kuata imasosikaikaua.

³⁰Hagala o nyawa ogö idadi yobole deʼ imangakunua o ngoha-ngohaka ogoduru yopeleke yoruba.

³¹Mä onyawa iwingaku-ngaku ma Jou, ahayamake o kuata mahungi. Onanga hokä ototaleo rajawali ihoho magurutil̄e de magahuhu makuata. Onanga imapopäta deʼ idadiua yabole, önanga imadagi deʼ koyä boleua.