Read Tobelo O YESAYA 41 Bible Online

O YESAYA 41 - Tobelo bible

O YESAYA 41

¹Ma Jou Madutu wato, ”Nimarïdi deʼ nihihigihene Ngohi, hei hagala o berera magogurutika manyawa. Nimahidiai mangale niboa ojuruhakimika, nitagi nia himangika deʼ nihihimanga niaperekara. Niaino ngone horapati homakinïki, mangale haputuhu onagona yatiai, onagona yahowono.

²Onagona iwihimomiki wokokuaha o wange mahiwariha, deʼ iwihidöaka Unanga outumu kahokogenangika? Onagona iwidiai Unanga wahohihanga ohoana deo berera ma ago-agomo, deʼ wapareta o kokoano mangale Unanga? Aioworo yadiai önanga yahigerewoto hokä o kafo Aitoimi yahibarihi önanga hokä o gandum maröehe madoolenge yawuwu ohidal̄oko.

³Unanga gila-gila waginiki deʼ wotagi aihimangiha koiwa madadatoko; Ail̄ou majapati, ngadeke yatigiua ongekomuku.

⁴O nagona yadiai mata-mata gënanga? O nagona ihitantu aingekomo masejara? Ngohi, ma Jou, Ngohila madodihiraka, deʼ kahirahi naga hiadono mabahaika.

⁵Hagala o berera magogurutika manyawa yamake okia Tadödodiaioka. Onanga yatodokana deʼ yohawana yohaharoka, daha imatoomu kamamoi deʼ yoboa.

⁶Mata-mata o nyawa imäkokiriwo, deʼ imahikukuata mangahininga.

⁷O tau wododiai wohikuata o gurasi wododiai aihininga, o nyawa yotütutuku o gurasi deo haaka de o tataka yahigiriri o nyawa yotötutuku o behi matiti mal̄okuoka. Wato, ’Yaoa itiai ani manarama’; daha wohikuata de opaku hupaya igiwiua.

⁸ Mä ngona, Israel, Ahi gilaongo, o umati Toni iri-iriki, ngona o Abraham aidifauku, Ahi hobata.

⁹Ngona tonil̄eoka hagala o dunia mabahaino, toniahoko hagala o ngï magogurutino. Totemo, ’Ngona Ahigilaongo; Ngohitoni tilaua Ahingongiriki.’

¹⁰Uha nohawana hababu Ngohi tonitomoteke ngona, uha ani hininga ihuha, hababu Ngohi ani Jou Madutu. Ngona aha Tonihi bitumu deʼ Toniriwo, Tonituda de Ahigiama iö utu-utumu.

¹¹Nalega, mata-mata o nyawa iningamo-ngamo ngonaika, ahayahihanga deʼ mangamal̄e-mal̄eke. Hagala o nyawa inilawa-lawani ngona, ahayobinaha deʼ yahehara yamata.

¹²Ngona ahanalingiri hagala o nyawa inilawa-lawani ngona, mä önanga namakeua. Hagala o nyawa nima tekepoparangi dede ngona o öraha nënanga yobinahaka deʼ yohihanga.

¹³Hababu Ngohi o Jou, ani Jou Madutu, tasöika anigiama maniraka; Totemo, ’Uha nohawana, Ngohi ahatonï riwo ngona.’ ”

¹⁴O Jou wato, ”Uha nohawana, Israel, ngaroka ngona noeteke deʼ nobole. Ngohila o Jou tonï riwo-riwo ngona, Duru wotö Tebi-tebini, o Israeloka manga Jou Madutu ganga woni Hihohalamati.

¹⁵Nolega, ngona tonihidadi hokä yöbido-bidoro ma aoto, mahungi, idoto deʼ maingiri o rei hinoto. Ngona ahanohidoro ol̄oku deʼ nawedere; hagala o doporono nohidadi hokä o afa.

¹⁶Ngona ahanätal̄oko önanga, daha önanga yahihaili ohidal̄oko deʼ yahibarihi orato. Ngona aha nomorene karana Ngohi, o Jou, deʼ noma hil̄e karana ngohi, o Israeloka manga Jou Madutu.

¹⁷Nako Ahihoana yobobodito gënanga imälingiri oakere, deʼ toönanga mangangomaha itore karana manga kiriti madudungu, done Ngohi, o Jou, ahatobaluhu toönanga manganiata; O Israeloka manga Jou Madutu ahawamal̄aikaua Aiumati.

¹⁸Tadiai hagala o ngairi ihahuru hagala o doporonoka itö totoongoro; ojobubu ahaihuaele odudungu magoronail̄e. O tonaka makokakaha ahaTohidadi o taaga; oakere aha ihoropu otonaka madudungino.

¹⁹O Tonaka makokakaha aha Todatomo o liwewuru mautu, o zaitun mautu, murad deʼ o akasia mautu. O tonaka makokakaha aha Tohidadi o hongana, o eru ma hongana, o berangan deʼ o liwewuru.

²⁰Done mata-mata o nyawa ahayamake deʼ ihioriki Ngohi, o Jou, ta dödodiai. Onanga aha yohohininga deʼ imangarati, o Israeloka manga Jou Madutu wotebi-tebini wodiai gënanga idadi.”

²¹Ma Jou, o Israeloka manga koano, wotemo ogiki-gikiri, ”Niao niaperekara, nihihimanga hagala o hababu!

²²Niboa, deʼ nihidodemo okia aha idadi, hupaya ngomi mihioriki damä mabahaka. Nihingahu idödadadi kahuruonika, nihitararono mamangarati hupaya ngomi miohohininga.

²³Niahetongo okia ahaidadi, hupaya ngomi mihioriki ngini igoungu o gikiri maago-agomo. Niadiai ibobaraguna ekola ihirö rugi-rugi, hupaya ngomi miheranga miamake.

²⁴Igoungu, ngini deʼ niamanarama koiwa, deʼ inihigö gogiriri kainï emono dika.

²⁵Ngohi tihimomikoka womatengo o wange mahiwariha: Tiahoko ünanga mangale wäparangi o koremie de wail̄e. Yokokuaha aha wapito-pitoko hokä o peseke, hokä o bohoko wododiai wapito-pitoko o tonaka matau-taulu.

²⁶O nagona nginino ihi dodemoka hiädono ngomi yakunu mihigoungu ënanga? Mä ngini nia hidogoronaka koiwa ihingahu-ngahu koiwa yoihene ngini nitemo-temo.

²⁷Ngohi, o Jou, madodihiraka tohiabari o Sionika; ngohi tohidingoto wo ao-ao o abari maoa o Yerusalemika.

²⁸Maöraha tolingiri o giki-gikiri mahidogoronaka, koiwa moi o yakunu ihidöaka o hidumutu, koiwa yakunu yo haluhu.

²⁹Igoungu, o giki-gikiri gënanga ibaragunaua, önanga duga-duga o dulada yaui-uihuku ima ngaku-ngakunua, deʼ yakunua i diai okianaga.”