Read Tobelo O YESAYA 42 Bible Online

O YESAYA 42 - Tobelo bible

O YESAYA 42

¹ Ma Jou wato, ”Nenanga Ahi gilaongo Tïtotai-tai, Ahingongiriki manyawa wasosanangi Ahihininga. Ngohi tohidöakoka Ahikuaha unangika, mangale woao oadili mangale ohoana deo berera yagetongo.

²Unanga ahawopöakua ekola womahi gahoko de makuatil̄e, ai ilingi aha yogihenua o ngekomika.

³O tiba ipugiluku aha itobikua, o posi kai tawi-tawi aha ihonengua. De Aisatia ünanga aha wohinyata itoaka,

⁴wobibangua ekola ai nganono itoaka, hiädono o adili wohigoko o duniaka. Hagala o berera magogurutika yömau ai dodotoko.”

⁵ O Jou ma Jou Madutu wohidadi deʼ wohihoheika o dihanga; Unanga watuuku o dunia deʼ hagala iwö wango-wango mal̄okuoka. Unanga wahidöaka o nyawa o wowango deʼ o jiwa mawomaha. Unanga wohiadono o behehongo nënanga Aigilaongika,

⁶ ”Ngohi, o Jou, toniahoko deʼ tonihimanarama ngonamangale nohi dagi o adili. Ngona Tonituda deʼ Tonipaliara mangale nodadi o jaji o umati o nyawaika, deʼ o sahaya mangale mata-mata o hoana de o berera.

⁷Mangale nahelenga manga lako o nyawa yopilo-piloko, deʼ nahi bebasi o nyawa o bui mahohuhutuoka.

⁸Ngohi o Jou, genangala Ahiromanga; Ahimulia Tohidoakua o nagonaikaö, ka Ihi heto-hetongo Tohilapahiua o duladaika.

⁹O öraha nënanga Tohidodemoka idadioka manyonyata; Ngohi tomau tohingahu hagala o hali mahungi; idadiuwahi gënanga, Tohidemoka nginika.”

¹⁰Ninyanyi o nyanyi mahungi ma Jouika, niwi higiriri Unanga, hei o dunia ingodumu! Niruruhu, hei ngöto deʼ mata-mata madol̄a, hagala o berera magogurutika deʼ mata-mata manyawa!

¹¹Kokiani o tonaka makokakaha deʼ makota-kota iwi higiriri ma Jou, kayaoa o Kedar manyawa iwi higiriri Unanga! Kokiani o Sela makota manyawa ima uli-ulili, deʼ yopoa-poaka ol̄oku matubuoka de yauku!

¹²Kayaoa önanga iwihimulia ma Jou, deʼ kaiwi heto-hetongo Unanga hagala o berera magogurutoka.

¹³Ma Jou wotagi mahimangiha woparangi hokä womatengo wokua-kuata, hokä womatengo o tentara iwiomanga o kuata woparangi. Unanga wagoraka o parangi mahagaga, deʼ wohidumutu Aisawaro o lawanika.

¹⁴Ma Jou Madutu wotemo, ”Madekanoka Ngohi toma mou; Ngohi tomarirïdi deʼ tatumungu ahi diri. Oraha nënanga maöraha iboa mangale todiai, Ngohi tomau topöaka hokä o ngoheka momagilianga.

¹⁵Ol̄oku deʼ o doporono aha Tadiai itoongoro, mata-mata ma dadatomo Tohidadi imaai. Hagala o ngairi mawai Tangali idadi o tonaka makokakaha, mata-mata o taaga Tadiai itore.

¹⁶Ahi hoana de ahi berera yopilo-piloko ahaTatuda yanonu o ngekomo önanga ihiori-orikua; önanga ahaTatuda hagala o ngekomoka önanga yanako-nakoua. O huhutu Tohidadi o dararono mangale önanga, deʼ o ngekomo iguhu-guhu Tohirata. Genangala ahaTadiai mangale önanga, deʼ maraioka aha Tadiai.

¹⁷O nyawa yangö ngaku-ngaku o gomanga maduladaika deʼ ihigoungu hokä toönanga manga gikiri, aha yahikauku deʼ yahimal̄eke.”

¹⁸Ma Jou wotemo, ”Ni ihene hei hagala o nyawa ini totopongono! Nimalega, hei hagala o nyawa nipilo-piloko!

¹⁹O nagona iholoi yopiloko de Ahigilaongo o Israelokaino? O nagona iholoi yatopongono de Ahihuhuloko?

²⁰Israel, mangöe namake, mä nolegaikaua, aningauku ihelengaika, mä ngona noihenua.”

²¹Ma Jou woigo wahihalamati; Unanga womau Aitita yahoromati deʼ ihimulia.

²²Mä o hoana de o berera gënanga yamataoka yaoa; önanga yatumunguku hagala o kamari magoronaka o tonaka matimiuku, deʼ yahidotebenoino hagala o bui magoronaka. Onanga yodadi yo ora-ora yahibodito, deʼ koiwa yoboa yahidöaka o roriwo.

²³O nagona niahidogoronaka ngini yomau ihigihene o hali nënanga, deʼ yohininga mangale ihigila-gila?

²⁴O nagona yahilapahi o Israeloka mangale yäora? Koma Joua mahirete? Unangika ngone hobaradoha, ngone howangoua imamoteke Aipareta, deʼ hanikua Aidodotoko.

²⁵Done Unanga wonadiai ngone hamao Aimuruka kohagiria; deʼ hatagongo o hangihara karana o parangi hoboborohono. Aigangamo yatuhuku o Israeloka hokä o uku, mä ngone hamaoua, deʼ homädotokua hamö mao-maooka.