Read Tobelo O YESAYA 43 Bible Online

O YESAYA 43 - Tobelo bible

O YESAYA 43

¹Israel, hoko nënanga ma Jou wato, ”Ngohi tonihidadi de tonitüku ngona, uha nohawana, ngona maraioka Tonihihalamati! Ngohi toniahokoka ngona de ani romanga, ngona ganga Tongohi madutu.

²Nako ngona natobongo o akere, Ngohi ahatonitomoteke ngona, ngona ahainilutuua hagala o huha magoronauku. Nako natilakuru o uku, ngona ahainïukuua, hagala o sosoba itotubuho ahainihiboditoua ngona.

³Hababu Ngohi o Jou, ani Jou Madutu, o Israeloka manga Jou Madutu wotebi-tebini, woniHihohalamati. O Mesir Tonihidöaka hokä aniduduhuhu, o Sudan deʼ o Syeba hokä anidagali.

⁴Ngona de aniijaoka Ahilakoka, Ngohi tonihoromati deʼ tonïdora ngona; done tonihidöaka o nyawa hokä anidagali, o hoana de o berera maago-agomo hokä aninyawa madagali.

⁵Uha nohawana, hababu Ngohi tonihohongino ngona. O wange madumunoko de o wange mahiwariha Tahuloko ani ngohaka de ani danongo yoboa imatoomu.

⁶Tapareta o koremieuku deʼ o koreharail̄e, hupaya önanga i taiti yapidili. Mal̄aika niangoha-ngohaka o nauru magurutoka de yaino yolio, deʼ nia ngoha-ngohaka o ngoheka o dunia mabati-batingoka de yaino yolio.

⁷Hababu önanga mata-mata ya ahokoka de Ahiromanga, önanga Tahidadi mangale ihihimulia Ngohi.”

⁸Ma Jou Madutu wotemo, ”Nahuloko yotagi manga himangika Ahihoana de ahiberera yopilo-piloko, ngaroka toönanga de manga lako; yatopongono, ngaroka de toönanga manga ngauku.

⁹Nahuloko mata-mata o hoana de o berera imatoomu deʼ mata-mata o hoana imatoomu. O nagona toönanga manga giki-gikiri mahidogoronaka yahingahuoka okia idadadi o öraha nënanga? O nagona aihidogoronaka yakunu wohingahuoka o öraha mahimangika? Mal̄aika toönanga manga hakihi-hakihi yotagi manga himangika, deʼ ihinyata önanga yatiai, hupaya mata-mata yoihene önanga yotemo, igoungu hoko gënanga!

¹⁰Hei Ahiumati, ngini Ahihakihi-hakihi, ngini Tiniiriki nidadi Ahigogilaongo, hupaya nihinako Ngohi deʼ nihingaku Ngohino, deʼ nimangarati Ngohila ma Jou Madutu. Ngohi ma Jou Madutu Duru Toma Tengo-tengoka, koiwa naga mahomoa koiwahi deʼ ipahaika de Ngohi.

¹¹Ngohi mahirete o Jou, mahomoa de Ngohi koiwa naga inïhihalamati.

¹²Ngohi tinihingahuoka nginika, Ngohila tinihihohalamati ngini, deʼ o gikiri maporetinoua naga niahidogoronaka; nginila nidadi Ahihakihi-hakihi. Deʼ Ngohi, Ngohi nënanga ma Jou Madutu,

¹³mangale kahiado-adonika Ngohi kahirahi ma Jou Madutu. Koiwa yakunu yo otana Ahikuahaino, ekola yatatoko Ahidatoro.”

¹⁴Ma Jou winiHihohalamati, to Israeloka Wotö Tebi-tebini, wotemo, ”De mangale ngini, Ngohi tahidingoto o tentara o Babelika, deʼ Taohana o bui mangorana ma dudukuru-dudukuru; manga ulili de manga hagaga o Kasdim manyawa Tangali idadi o dodora.

¹⁵Ngohila o Jou, nia Jou Madutu totebi-tebini, nia Koano, tonihidadadi ngona, hei Israel!”

¹⁶Ma Jou wodiaioka moi o ngekomo yatilakuru o ngöto, yatilakuru o akere imö moku-moku.

¹⁷Unanga wahuloko o tentara deʼ mangabalu-baluhu yoparangi, deʼ önanga yoiki de o kereta de makuda-kudaoka. Mä önanga yoruba, yakunua yomimikoli, önanga yohonenge hokä o hubu ihonenge.

¹⁸Ma Jou wotemo, ”Koiwa mabaraguna nohininga öraha mahira, parahaja natiba-tibanga ipöpaha-paha.

¹⁹Nohohininga, Ngohi tadiai okianaga moi mahungi; öraha nënanga imulaengoka, boteka namakeua? Ngohi aha todiai o ngekomo o tonaka makokakahaoka, deʼ o ngai-ngairi o tonaka makokakahaoka.

²⁰O aiwani ihuhuhuku ahaihihimulia Ngohi; o kaho o honganika deʼ o totaleo o unta aha ihihigiriri Ngohi hababu Ngohi tohihahuru o akere o tonaka makokakahaoka, deʼ o ngai-ngairi o tonaka makokakahaoka mangale tahidöaka yokere Ahiumatika tairi-irikoka.

²¹Onangala o hoana de o berera Tatuku mangale Ahidiri, hupaya yakunu ihi abari o higiriri mangale Ngohi.”

²²Ma Jou wotemo, ”Ma ngona Israel, nohihubaua Ngohi, deʼ nohi pujiokauaoli Ngohino.

²³Ngona no aoua o duba mangale anihuhuba ituhu-tuhuku, nihihoromatiua Ngohi de niahuhuba. Ena hioko Tonihitubuhoua ngona de o huhuba, ekola tonihihuba ngona de togahoko o manyanyi.

²⁴Ngona noijaua o dupa mabounu mahemo-hemoro mangale Ngohi, ihisanangua Ngohi de o huhuba itötoa-töaka mahaki. I iduluyaino ngona nohihitubuho Ngohi de hagala anibaradoha, nohihihuba Ngohi de hagala anihowono.

²⁵Mä Ngohi ma Jou Madutu taehe anibaradoha, Ngohi tonihi apongo ngona karana hoko gënanga Ahibiaha; Ngohi tohohiningaokaua anibaradoha.

²⁶Nohihininga Ngohi, naino ngone hoiki o Juru Hakimika, nao aniperekara hupaya inyata ngona itiai.

²⁷Ani ete de anitohora madodihiraka yobaradohaka, anitutuda-tutuda ihilawanoka Ngohino,

²⁸ani imam-imam yäpesekoka ahi Tau. Done o Israeloka Tahilapahi mangale yahikauku, o Yakub aidifauku Tamal̄aika yabinaha.”