Read Tobelo O YESAYA 44 Bible Online

O YESAYA 44 - Tobelo bible

O YESAYA 44

¹O Jou wotemo, ”Noihene, hei Yakub ahigilaongo, hei Israel, o umati Tiniiri-iriki!

²Ngohi ma Jou tonihidadadi ngona, tonituku ngona mamulaenge ngoni ayo ami mamataokahi, deʼ toniriwo ngona. Uha nohawana, ngona Ahigilaongo, o umati Toniiri-iriki Tonïhohininga.

³Hababu Ngohi aha tohituagi o akere o tonaka madü dudungika, deʼ tohihahuru o ngai-ngairi o tonaka matore-toreoka. Ngohi aha tohidöaka Ahikuaha anidifauku, deʼ tahibarakati ani ngohaka de ani danongo.

⁴Onanga aha yowango yoburere hokä o momo o akere madatekoka, hokä o gandarusa mautu o ngairi madatekoka.

⁵Moi-moi aha imangaku manga diri Tongohimadutu, deʼ yoboa imahi dogo de o Yakub aidifauku. Moi-moi yatulihi manga giamoka: Toma Jou Madutu, deʼ ya hetongo manga diri ma Jou Madutu Aiumati manyawa.”

⁶ Nenanga aidemo ma Jou Duru Wokökokuaha, o Koano deʼ o Israeloka mangahohohongo, ”Ngohi ma Jou Madutu Toma Tengo-tengoka, madodihiraka deʼ mabobahaka.

⁷O nagona hokä Ngohi? Niwihuloko ünanga womangaku! Mal̄aika ünanga wohingahu deʼ wohinyata Ngohino! O nagona ihidodemoka o öraha mahimangika öraha mamulaenge hiädono o öraha mabaha?

⁸Ahihoana de ahiberera, uha nihawana ekola inïtodokana; koigoungua kahuruonohi de yaino hiadono o öraha nënanga Ngohi tohidodemoka okia idödadadi? Nginila Ahi hakihi-hakihi. O hohohongo mahomoa koiwa deʼ tanakoua.”

⁹Hagala o nyawa yododiai o gomanga madulada gënanga yobaragunaua, deʼ hagala o gikiri önanga yapuji-puji gënanga ifaidaua. Hagala o nyawa yahuba-huba o dulada gënanga yopiloko deʼ okia-kiaua ihioriki, hababu gënanga önanga aha yamake omal̄eke.

¹⁰Parahaja yodiai o dulada yao ui-uihi deʼ yahuba hokä o gikiri!

¹¹I goungu, mata-mata o nyawa yahö huba-huba o dulada yamake o mal̄eke. O nyawa yododiai o dulada gënanga o nyawa biaha. Nahuloko önanga yotagi manga himangika imakinïki; maraioka ahayohawana deʼ yämal̄eke.

¹²O behi wotututuku wal̄e o behi madobiki daha watuku o uku magoronaka deʼ watutuku de o tataka. Unanga wokarajanga de hagala aikuata naga unangoka. Wokarajanga magogiriaoka, ünanga idadi iwihahini, aikiriti madudungu, deʼ iwibole.

¹³O tau wododiai watuga o gota. Unanga watulada maduku de o kapuru, wagarade de aipakakaha deʼ wohidadi o nyawa madulada marorahai, dahawohigogere ai tau magoronaka.

¹⁴Mudukua o gota wapö pake-pake ma ahali o liwewuru mautuino, o eru mautu ekola o terpentin mautu watö tola-tolanga o honganoka. Mudukua o ünanga wodatomo o Salam mautu daha wodama hiädono o awana yadiai iwango.

¹⁵O hidoku moi o gotaino gënanga ihidadi o gota ihi dofo-dofo mangale imahirauku deʼ imahiharongo o roti deʼ imahi nofo o hiode maakeme, daha ünanga iwiwedonoka? Unanga womarauku deʼ wotemo, ”Uwe, itiai kaharahai deʼ hatoli mahauku! Igoungu yasanangi o uku nënanga!” O gota gënanga mahou wapake mangale wadiai o dulada. Unanga womaponu wahuba deʼ womäniata, ”Ngona ahigikiri, nohihihalamati ngohi!”

¹⁸Igoungu yobodo hagala o nyawa hoko gënanga! Onanga yatamunu manga lako deʼ toönanga mangahininga hiädono okia-kiaua imangarati.

¹⁹Wododiai o dulada gënanga wapikiri wadonikaua, ”O gota gënanga o hidoku moi tatuhuku, deʼ makuru tapake mangale tohiharongo o roti deʼ tohil̄ofo o hiode ma akeme mangale ahi inomo. Daha mahou o gota gënanga tohidadi o dulada. Ho öraha nënanga ngohi tahuba o gota madobiki!”

²⁰O manarama gënanga kaimatero dika de yaol̄omo o kafo. O nyawa gënanga iwihirehene mangale aipikiringa ibodo-bodo, hiädono ünanga iwiriwo yakunokauaoli. Unanga wakunua wohigoungu o dulada naga aigiamoka gënanga o tipu mata-mata.

²¹Ma Jou wotemo, ”Nohininga mata-mata nënanga, hei Israel, hababu ngona Ahigilaongo. Ngohi tonitüku ngona, deʼ ngona Ahigilaongo, Israel, Ngohi aha toniwohangua ngonaika!

²²Anihowono Taduhu hokä o lobi, ani baradoha Tabirï hokä o lobi itaro-taromo. Noma idulu Ngohino, hababu Ngohi tonihi bebasoka ngona!”

²³Nohi ulili o morene, hei o dihanga, noma uli-ulili, hei o dunia magoronaka mahidoku! Nohi ulili o morene, hei hagala ol̄oku! o honganö deʼ o gota yogetongo magoronaka! Hababu ma Jou wohi dumutoka Ai mulia de wätuhuku o Israeloka Ai umati.

²⁴Hoko nënanga wotemo ma Jou wo nihihohalamati wonituku ngona maöraha ngoni ayo ami mamata magoronaokahi, ”Ngohi o Jou tohidadi hagala moi-moi, toma tengo-tengo tohihohe o dihanga, deʼ koiwa ahi roriwo tohidadi o dunia.

²⁵Ngohi aha taiki yomai-maihi mangamaihi, deʼ tomahi gogule yogögogumatere. O nyawa yososawaro mangademo-demo talawani, toönanga mangasawaro tohidadi mangabodo.

²⁶Ngohi tohikuata Ahigilaongo ai demo, deʼ tadiai o datoro wohinyö nyata-nyata Ahihuhuloko, Ngohi totemo o Yerusalem aha yogogeroli, deʼ o Yehuda makota-kota aha Tohigokokali; itotoropahuku aha tohidiai.

²⁷Ngohitotemo o ngöto mabuku ukuika: Noowaha! Ngohi tomau tadudungu aningai-ngairi.

²⁸ Ngohi totemo o Koresika, ’Ngona ahanapareta Ahiumati, deʼ nadiai hagala Ahimau. Napareta hupaya o Yerusalem ihigokoli, deʼ ma Jou Ai Tau no gelenga mahohol̄e.’ ”