Read Tobelo O YESAYA 45 Bible Online

O YESAYA 45 - Tobelo bible

O YESAYA 45

¹Ma Jou wiirikoka o Kores wodadi o koano; ünanga witumutu mangale wahohihanga o hoana de o berera maago-agomo deʼ mangale watobiki mangakuaha o kokoano. Ma Jou aha wahelenga o kota mangorana maago-agomo unangika, koiwa moiö i gogogere ibenoino. Unangika ma Jou wïtemo,

²”Ngohi aha tohidiai o ngekomo ngonaika; ol̄oku deʼ o doporono aha Tohirata, o ngora-ngorana o tabaga aha Tawedere, deʼ madudukuru o behi Tatobiki.

³Done ngona ahaTonihidöaka o arata o kaya iö iu-iunu, hupaya ngona nohioriki Ngohi o Jou, o Israeloka manga Jou Madutu, woniahokoka ngona de aniromanga.

⁴Ngona toniahoko deʼ Tonihidöakaohiromanga, ngaroka ngona nohinakoua Ngohi. Tonihimanarama ngona nariwo o Israeloka Ahigilaongo, hababu önanga Ahingongiriki manyawa.

⁵Ngohi o Jou koiwa mahomoa, Ngohi ma Jou Madutu Toma Tengo-tengoka. Ngona Tonihidaeoka, ngaroka ngona nohinakoua Ngohi.

⁶Hagala moi-moi gënanga Tadiaioka hupaya o wange mahiwaroko hiädono o wange madumuniha mata-mata o nyawa ihioriki Ngohi ma Jou, mahomoa de Ngohi koiwa naga o gikiri mahomoa.

⁷Ngohi tohidadadi o dararono deʼ o huhutu, Ngohi tohiboa o barakati deʼ o bodito. Ngohi o Jou tadodiai mata-mata gënanga.

⁸O dihangoka de yauku Tohiguti o utumu hokä o awana, o dunia yahelenga madiri mangale yatarima, daha ihiwango o halamati deʼ o bebasi; Ngohi o Jou todiai gënanga idadi.”

⁹ Yobodito o nyawa imalawani de wahidadadi; ünanga hokä o bohoko iwilawani o nyawa wadodiai. Boteka o tonaka matau-taulu iwi leha o bohoko wododiaika, ”Ngona magogiria okia nodiai?” Boteka o bohoko imaliwolu wadodiai koiwa to ünanga ai sawaro?

¹⁰Wobodito o nyawa wotemo aidimonika, ”Yadodoa ngohi ihihingohaka hokonënanga?”

¹¹O Jou, o Israeloka manga Jou Madutu wotebi-tebini wotemo, ”Nohi leha Ngohi yakorona o öraha mahimangika. Mä uha näleha mangale Ahingoha-ngohaka, ekola nohihuloko Ngohitodiai okianaga moi.

¹²Ngohi o Jou tohidadadi o dunia, deʼ tahidadi o nyawa mangale yögogere. De ahikuaha Ngohitohihohe o dihanga, deʼ tapareta o wange malako, o mede deʼ hagala o murumu.

¹³Ngohi tihimomiki o Kores mangale wadiai Ahi dungutu deʼ wohigoko o adili. Ngohi ahatohirata mata-mata o ngekomo wanononu. Unanga aha wohigokookali o Yerusalem makota deʼ wahibebasi Ahiumati yatumu-tumunguku, koiwa maurubokumu deʼ koiwa mabobangu.” Ma Jou Duru wo Kokuaha wotemoka.

¹⁴Ma Jou watemo o Israelika, ”Nimahitingini o Mesir matonaka mahasili deʼ o Sudan mautumu. Hagala o Syeba manyawa yopoputurungu idaditingini; önanga imadagi nia poretino manga ranteoka. Onanga aha yatilabuku deʼ imangaku, ’ma Jou Madutu igou-goungu niahidogoronaka; koiwa o gikiri mahomoa de Unanga!

¹⁵Ma Jou Madutu wohihohalamati o Israel ganga ma Jou Madutu wangö ngiu-ngiunu Aidiri.

¹⁶Mata-mata o nyawa yododiai o gomanga madulada; aha wahimal̄eke deʼ wähikauku.

¹⁷Mä o Israeloka wahihalamati ma Jou; aihalamati aha kahirahi. Ngini aha winihimal̄ekua deʼ winihikaukuua hiädono kahiado-adonika.’ ”

¹⁸Ma Jou wohidö dadadi o dihanga, Unanga ma Jou Madutu! Unanga wohidadi deʼ watüku o dunia, wadiai iputurungu deʼ kahirahi imaokoino. Unanga wohidadiua o ngï kairïdika, mä o ngï mangale yogogere. Unanga wotemo, ”Ngohi o Jou, deʼ koiwa mahomoa.

¹⁹Ngohi totemoua de kataiu-iunu, ekola madodagi irorahasia. Ngohi tahulokua Ahiumati o Israeloka ihilingiri Ngohi de kaparahaja. Ngohi, o Jou, totemo madiai, deʼ tohingahu okia magoungu.”

²⁰Ma Jou wotemo, ”Nimatoomu deʼ niboa nimakinïki, ngini mata-mata nio ota-otana o hoana de o berera ma ago-agomo manga hidogoronaka! Yobodo hagala o nyawa yao ihiduono o dulada o gota, deʼ imaniata o giki-gikirika yakunua yahihalamati.

²¹Niao perekara, nihihimanga manyonyata-nyonyata, yämal̄aika önanga imakinïki ihidailako. O nagona ihiabari o hali gënanga deʼ ihingahu maöraha kahuruonika? Koigoungua Ngohi, ma Jou? Koiwa o gikiri mahomoa de Ngohi. Ngohi ma Jou Madutu toadi-adili deʼ tohi Hohalamati, koiwa mahomoa sowaliua Ngohi!

²²Hei, dunia manyawa ningodumu, nimaidulu Ngohino hupaya ngini inïhihalamati, hababu duga-duga Ngohi ma Jou Madutu, koiwa mahomoa!

²³ Ngohi tojajioka, deʼ Ahijaji aha tadohukua; mangale Ngohimahirete Ngohitokoboto: Moi-moi o nyawa ahayatilabuku Ahihimangoka, deʼ manga demo mahirete magoronaka yojaji mangale yosatia Ngohino.

²⁴Hagala o nyawa yotemo, ’O adili deʼ o kuata duga-duga ma Jouino!ʼ Mata-mata o nyawa ihïdoha-dohata Ngohi ahayoboa Ngohino deʼ yamake o mal̄eke.

²⁵Mä o Yakub aidifauku aha yahihalamati, deʼ önanga aha ihihigiriri Ngohi, ma Jou.