Read Tobelo O YESAYA 46 Bible Online

O YESAYA 46 - Tobelo bible

O YESAYA 46

¹Nenanga mabobaha o Babeloka mangagiki-gikiri; mahira o Bel deʼ Nebo madulada yahuba, maöraha nënanga yogina o aiwani mal̄okuoka, idadi o dodubuho mangale o aiwani yabö bole-bole.

²Hagala o dulada gënanga yapoaua yoriwo mamomoku, önanga mahirete yaao hokä o dagokino. Genanga mangabaha önanga.

³Nihihigihene Ngohi, hei o Yakub aidifauku, ngini mata-mata mahou Ahiumatino. Ngohi tinipaliaraoka nginimamulaenge nginiinihingohaka.

⁴Ngohikahirahi nia Jou Madutu hiädono nginiinipereki; deʼ kahirahi tinigoana ngini hiädono nginiinidudutu. Ngohitinihidadi ngini deʼ kahirahi tinïpaliara ngini, Ngohi aha tiniriwo deʼ tinihihalamati ngini.

⁵De onagona ngininimau nihihitero dede Ngohi? Naga yakunu ihihitero dede Ngohi?

⁶O nyawa yahelenga manga dompet deʼ yakopoa mangagurasi, daha yatibanga manga haaka de o didibanga. Unanga wahewa o gurasi yododiai mangale yodiai o gomanga madulada, daha ünanga wahuba o dulada wadodiai.

⁷O dulada gënanga yapaku deʼ yakelengauku mangïoka, ënanga ima okoino genangoka deʼ yakunua imatotagali. Nako o nyawa imaniata enangika, ënangai haluhua, deʼ iwihihalamatua ünanga aihuhaino.

⁸Niohininga deʼ niatiba-tibanga, hei hagala o nyawa nisosatiaua!

⁹Niohininga i dodadadi-i dodadadi o öraha mahira; nihihi goungu Ngohi ma Jou Madutu, deʼ koiwa mahomoa, Ngohi ma Jou Madutu, deʼ koiwa hokä Ngohi.

¹⁰Mamulaenge de yaino Tohingahu o hali-o hali maduruino, maöraha mahira Tohidemoka okia ahaidadi. Totemo: Ahiputuhu ahaimadadi, Ahimau maraioka tadiai!

¹¹Ngohitiahoko womatengo wokokuaha o wange mahiwariha ünanga woboa hokä o totaleo ihohatera moi mangale wadiai Ahiputuhu. Okia Totötemo-temo maraioka aha Takarajanga, okia Tohidato-datoro maraioka aha Tamanarama.

¹²Nihihigihene Ngohi, hagala o nyawa niahininga ikokurutil̄e, ngininiatobote o utumu kohagurutikahi.

¹³Ngohi aha tohitigi o bebasi mawange, o halamati tohidö doa-döaka itudaokauaoli. Ngohi aha tohihalamati o Yerusalem, deʼ tohidöaka o horomati o Israelika.”