Read Tobelo O YESAYA 47 Bible Online

O YESAYA 47 - Tobelo bible

O YESAYA 47

¹ Ma Jou wotemo, ”Hei, Babel, nouti anipareta makuruhioka, deʼ nogogere o kafo mal̄okuoka. Ngona nomaedengokaua deʼ mamutiti hokä mahira.

²Nawedere o gapuno de o helewo; na helenga anikokudu, napoho anibaju hiädono yamake aniwunihi, deʼ natobongo hagala ongairi.

³O nyawa aha inimake ngona anihekonoka, inihikauku deʼ inihimal̄eke. Ngohi aha tabalahi ohininga magogono ngonaika, deʼ moiuaö Taotana.”

⁴O Israeloka manga Jou Madutu wotebi-tebini wonahibebasi ngone, airomanga ma Jou Duru wo Kokuaha.

⁵Ma Jou wotemo o Babelika, ”Noma rïdi, deʼ nowohama o huhutu magoronaika. Ngona aha ini hetongokauaoli ’hagala pareta makoano Ngoheka’.

⁶Mahira Ngohitängamo Ahiumatika, önanga Tapulonokauaoli to Ngohi madutu. Daha önanga Tahilapahi ngonaika, deʼ ngona nadoraua önanga, koaholi yoböbalu-baluhu natuku de koiwa mahayanga.

⁷Ngona natobote aha nodadi okoano ongoheka kahiado-adonika, deʼ ngona namaoua ekola napikiri mabahaka.

⁸ Hababu gënanga nohihigihene Ngohi, hei ngona noigo nakinïki o sanangi! Natobote ani wowango irïdi, deʼ koiwa hokä ngona. Napikiri ngona aha nodadiua o bobao, deʼ anidifauku aha yobinahaua.

⁹Mä öraha moidika, o wange moimagoronaka, o hali hinoto gënanga kamamoi idadi. Mal̄aika ngona napake o gumatere deʼ omatara, anirokata deʼ aningohaka yadohigorako.

¹⁰Ngona nomamao norïdi anidorou magoronaka, napikiri animanarama yolegaikaua. Ngona inihirehene anibarija deʼ aniganako, natobote koiwa hokä ngona.

¹¹Mä ngona aha initapal̄u o bodito, anigumatere madodotoko yakunua inihirehene. Ngona aha inidotoboa o huha deʼ nakunua nomäbarihi. O binaha aha iboa de kaitodokanino, deʼ kowahi de gënanga nomahiori-orikua.

¹²Nomahikekete dika de mata-mata animatara deʼ anigumatere, iniruaeuku ngona maöraha mulaenge kanietetekohi. O nagona ihioriki gënanga mabaraguna ngonaika, mangale inihikökokamodongo hagala anihaturu.

¹³Ngona nomasikaua karana mangöe onasihati. Nahuloko yomai-maihi yotagi manga himangiha inihihalamati ngona; önanga yatailakoka ihidodiai hagala o dihanga malibuku deʼ imädotoko hagala omurumu, deʼ omede mahungioka magetongo ihidodemoka okia idadi aniwowango.

¹⁴Nolega, önanga hokä o gandum maröehe madoolenge yaol̄omo o uku; yakunua önanga ihihalamati manga diri mahirete! O uku madokara gënanga duru kohahauku onangika, o uku hatoli mahau-hauku mangale imarauku.

¹⁵Genanga mafaida inïmai-maihi nginika iniruaeuku ngona maöraha mulaenge kanietetekohi; moi-moi yoiki inimal̄aika ngona; moiua yoboa mangale inïriwo.”