Read Tobelo O YESAYA 49 Bible Online

O YESAYA 49 - Tobelo bible

O YESAYA 49

¹ Nihihigihene ngohi, hei hagala o berera magogurutika nio hohininga ahidemo-demo. Ma Jou wohiahoko ngohi kowahi de ngohi toma kil̄au, Unanga wohi iriki ngohi maöraha ngohi ayo kaami mamatainohi.

² Unanga wadiai ahidemo-demo kaimatero madoto o oworo, de Aigiama mahirete Unanga wohihohongino ngohi. Unanga wohihidadi ngohi hokä o toimi madoto högiho-gihoroka, deʼ wagogono otiba madengo magoronaka hupaya kawomahi dodiai wapake.

³Wotemo ngohino, ”Ngonala Ahigilaongo; Ngohi aha ihihimulia karana ngona.”

⁴Mä Ngohi totemo, ”Ahihuha de ahikangela parahaja; todamata ahikuata de kaparahaja!” Mä ngohi tongaku ma Jou wodemo ahihaku, ma Jou Madutu wohibalahi ngohi imamoteke ahimanarama.

⁵Toma kil̄auuahi, ngohi wohiahoko ma Jou todadi Aigilaongo, mangale tätoomu o Israeloka maumati, hupaya önanga imaidulu Unangika. Ma Jou wohihidadi ngohi duru dema horomati, ma Jou Madutu ganga ahikuata.

⁶ Ma Jou wohitemo ngohino, ”O manarama iholoi ilamoko inidama ngona, hei Ahigilaongo; ngona duga-duga aha nahigilioua oYakub aidifauku mahou-hou de nahigilio deʼ nohigilio mangamulia hoi hira-hirali hagala o Israeloka manga hoana, mä tonihidadi odararono o hoana de o berera maago-agomo, hupaya odunia ingodumu yahihalamati.”

⁷Ma Jou Madutu wotebi-tebini o Israeloka wahihohalamati wotemo o nyawa duru yahikokaukuika, deʼ yadoha-dohata mangale o hoana de o berera maago-agomo ikali yodadi yokokuaha manga gilaongo, ”O kokoano aha yamake ahimanarama; önanga aha yomomiki ihihoromati Ngohi. Yo kokuaha ahayamakeö, dahayatilabuku yohuba.” Genanga idadi karana ma Jou wairikoka aigilaongo; O Israeloka manga Jou Madutu wotebi-tebini wosatia aijajika.

⁸ Ma Jou watemo Aiumatika, ”maöraha Ngohi ahihininga yadaene, Ngohi ahatohaluhu; mawange Ngohi tinïhihalamati, Ngohi tiniriwo ngini. Ngini Tinihohongino deʼ Tinigoana, deʼ Todiai ojaji mangale o hoana de o berera maago-agomo. Tairiki o berera duru irirïdi idadi o puhaka matonaka yogogogere.

⁹O nyawa yabui-buika Tahuloko yohupu; naga ongï mahohuhutuoka Ta ao odararonika. Hokogenangoli odoporono itotoongoroka önanga yokurangua, o ngekomo magurutu isadia oinomo.

¹⁰ Done önanga aha idadiua mangakiriti madudungu ekola yähahini, deʼ ahayatapal̄uua o wange mahauku o tonaka makokakahaoka. Hababu Ngohi, tahaya-hayanga önanga, ahaTatuda önanga, deʼ tatomoteke önanga ahagala oakere matitika.

¹¹Ngohi aha todiai ongekomo tohi nonu ol̄oku de mabuturungoka mata-mata Ahingekomo maago-agomo ahaTohirata.

¹²Magurutoka deyaino Ahiumati yokokiboa, o koremie deya il̄e, o wange madumuniha deyaoko deʼ o Sinim o koreharail̄e de yauku.”

¹³Nonyanyi hei dihanga, nomä ulili hei dunia, hei hagala ol̄oku, o morene nohi ulili! Hababu ma Jou woboa walaru Aiumati, Unanga wädora Aiumati yatö tuku-tuku.

¹⁴Mä o Yerusalem manyawa yotemo, ”Ma Jou wonamal̄aka ngone, tongone nanga Jou wonäwohangoka ngone.”

¹⁵Ma Jou wohaluhu, wato, ”Kaiyakunu momatengo oayo mawohanga amingohaka, deʼ modoraua amingohaka madutu? Ngaroka munanga mawohanga, Ngohi ahatoniwohangua ngona!

¹⁶Yerusalem, Ngohi salalu tonihininga ngonaika; aniromanga Tagarade Ahigiama mahoatuku.

¹⁷Hagala o nyawa initotumomiki ngona mangajapati yoboa, deʼ iniwo wede-wederoka ngona aha yoiki.

¹⁸Nolega de napulono inihigilolitino, anikawaha ima toomuinoka deʼ yoboa ngonaika. De mangale Ngohi, ma Jou Madutu towango-wango, Ngohi totemo, igoungu, ngona aha ani hininga ilamoko karana aninyawa, hokä o mol̄oka o ngoheka amihininga ilamoko karana amiporomu.

¹⁹Ani berera mamomo koiwa deʼ duru kairïdika, oraha nënanga idadi duru kohämodehehoto mangale hagala o nyawa yoigo yogogere. Deʼ hagala o nyawa yomau inihibinaha ngona, ngonaka de manga gurutikaoka yoiki.

²⁰Ngoha-ngohaka imakil̄au o berera mahomoaoka aha yotemo ngonaika, ’O berera nënanga duru kohämodehehoto ngohino, nohidöaka o ngï hupaya ngohi takunu torïdi nenangoka.’

²¹Done ngona aha notemo anihininga magoronaka, ’Onagona yahingohaka ongoha-ngohaka gënanga mangale ngohi? Koigoungua tongohi ahingoha-ngohaka yohihangoka, deʼ takunokaua tahingohakoli? Ngohi ihiao otabuanga magoronaka deʼ ihihirehene deʼ ihimal̄aika odiri tomatengoka. Hoʼ okiaino o ngoha-ngohaka gënanga, deʼ o nagona yahihero önanga?ʼ ”

²²Ma Jou Duru Woko Kurutil̄e wotemo Aiumatika, ”Ngohi ahatohidöaka ononako ohoana de oberera ma ago-agomika deʼ önanga aha ihigilio aningoha-ngohaka; aningoha-ngohaka o nauru aha yatotiri, deʼ aningoha-ngohaka o ngoheka yamoku manga beleka mal̄okuoka.

²³Okokoano aha hokä oama nginika, deʼ okokoano ongoheka hokä nia ayo. Onanga aha yatilabuku inihoromati ngona deʼ imahitipokouku manga diri ngonaika. Done ngona aha nohioriki Ngohi ma Jou; o nyawa imahi ngano-nganono Ngohino manga nganono itoakua.”

²⁴Ngini nileha, ”Kaiyakunu obanakono yaora yonau-nauru mangagiamino, ekola yatago-tagokino yaora o nyawa mangahayanga koiwa-iwa mangahoatino?”

²⁵Ma Jou wohaluhu, ”Genanga ahaidadi. Yonau-nauru yatumu-tumunguku ahayakogorali. O nyawa mangahayanga koiwa-iwa mangabanakono aha yaorali. Hababu Ngohi mahirete talawani anihaturu; Ngohi aha tahihalamati aningoha-ngohaka.

²⁶Ngohi aha tadiai anihaturu ihidaluku o awunu, hiädono önanga imakotoma. Done oumati onyawa yongodumu ahaihioriki, Ngohi, ma Jou, Tinihi hohalamati; Duru wokö Kua-kuata, o Yakub ai Jou Madutu aniduduhuhu.”