Read Tobelo O YESAYA 51 Bible Online

O YESAYA 51 - Tobelo bible

O YESAYA 51

¹Ma Jou wotemo, ”Nihihi gihene Ngohi, hei ngini niö igo-igo inïhihalamati deʼ niboa Ngohino nigahoko ororiwo. Niohininga ol̄oku ohelewo kiaino ngini nihonotoko, deʼ ohelewo nifai-faiti okiaino ngini nifaiti.

²Niohininga niaete de niatohora o Abraham deʼ o ngo Sara; maöraha Ngohi tiahoko o Abraham, ünanga koiwa toünanga aingohaka; daha Tihibarakati ünanga deʼ Tihidöaka aidifauku yowöe.

³Yerusalem, Ngohi ahatonilaru ngona, deʼ mata-mata yogogogere anidoropahoka. Anitonaka ilua-luasi mamomo koiwa tohidadi idato-datomo, hokä o Edom, Ahidumule iboburere. Genangoka onyawa ahaimagarago deʼ yomorene deʼ yosyukur de hagala onyanyi.

⁴Niohohininga Ahiilingi, hei Ahihoana, ni ihene Ahidemo-demo, hei Ahiumati. Tahidöaka Ahidodotoko ohoana de oberera ma ago-agomika, hagala Ahitita ahayadararono önanga.

⁵Ohalamati Tahidoa-döaka itigioka; Ahiutumu maöraha ngadeke iboa. Ngohi mahirete aha tapareta o hoana de o berera maago-agomo. Hagala oberera magogurutika ihïdodama Ngohi deʼ yonganono Ahimanarama ikua-kuata.

⁶Nipulono odihanga deʼ niolega o dunia; o dihanga ahaihihanga hokä onofo deʼ o dunia aha ibabiti hokä obaju madeka-dekanuku, mata-mata manyawa ahayohonenge hokä o hihiri. Mä ohalamati Tahidoa-döaka kahirahi kahiado-adonika, deʼ Ahiutumu ipahaua.

⁷Nihihi gihene Ngohi, hei Ahihoana, ngini nihioriki okia madiai; Ahidodotoko igogono niahininga magoronaka. Uha nihawana nako ngini inihohedu o nyawa, uha nihawatere nako önanga inïhikauku ngini.

⁸Onanga aha yobinaha deʼ yohihanga, hokä opakeanga yaol̄omo ogoguhu deʼ opakeanga oduba magogo yaol̄omo obuteteke. Mä ohalamati Tahidoa-döaka kahirahi kahiado-adonika, Ahiutumu igila-gila ongohaka de odanonguku.”

⁹Nomomiki ya Jou, nomïriwo ngomi, nomihihalamati ngomi de Anikuaha. Nomomiki hokä o öraha mahira maöraha Ngona nomïwedere o ngo Rahab deʼ natuduku ongöto managa gënanga hiädono ihonenge.

¹⁰Ngonali nadudungu ongöto, ongöto maakere iluku-luku. Ngona nodiai ongekomo yatilakuru oakere gënanga, hupaya hagala onyawa Nahihohalamati yakunu yatobongo.

¹¹Done hagala onyawa wahibebebasi ma Jou ahayolio önanga yowohama o Yerusalemika de imä uli-ulili toönanga mabiono iletongo karana mangamorene ikokakali. Onanga yomorene deʼ imagarago, oduka deʼ oliwolu ihihangoka.

¹²Ma Jou wotemo, ”Ngohi tinilaru ngini. Yadodoa ngona namodongo onyawa yokokakali ikaua, onyawaika yaumo hokä omomo?

¹³Kiaka yakunu ngona niwohanga ma Jouika ani Dodadi? Wohihö hohohe odihanga deʼ wogelenga odunia mahohole? Yadodoa owange magurutu ngona nohahara inituku-tuku mangagangamoika kaimahidodiai inihohihanga? I gou-goungu, toönanga mangagangamo gënanga ahaini koronaua ngonaika.

¹⁴Yatago-tagokino madataiti yobebasi; önanga aha yokurangua oinomo, deʼ aha yohonengua deʼ yajere.

¹⁵Hababu Ngohi o Jou nia Jou Madutu, taruae ongöto hiädono mamoku-moku iruruhu. Duru wokoKuaha ganga Ahiromanga.

¹⁶Ngohi tohihohe odihanga deʼ togelenga odunia mahohole-hohole. Ngohi totemo o Sionika: Ngona Ahiumati; Ngohitonihidöaka Ahidodotoko ngonaika deʼ tonihohongino ngona de Ahi kuaha.”

¹⁷Nomomiki, hei Yerusalem, nomomiki! O hukumanga wonï gogelenga ma Jou karana Ai gangamo, nodagioka hiädono imata.

¹⁸Aninyawaino koiwa naga inituda anigogerino koiwa inihingotaka.

¹⁹Ngona initapal̄u ohuha orupa hinoto; ani berera yaparangi mahasili iwedere de ibinaha deʼ ani kawaha ihihonenge ohahini. Koiwa inïdora deʼ inïlaru ngona.

²⁰O ngekomo mabahaka yogetongo hagala aninyawa yoruba imata mangakuata hokä omaijanga yakorona ohoma. Onanga yatapal̄u ma Jou Aigangamo, deʼ yakorona ani Jou Madutu Aibanarata.

²¹Noihene hei hagala o nyawa initötuku-tuku, yolebo-leboto hokä o nyawa yadaluku!

²²Hoko nënanga wotemo ani Jou, o Jou ani Jou Madutu winïdemo ngini, ”O hangihara Tinihï doa-döaka Ahigangamo magoronaka ahaTa l̄ëoli nginino. Ahigangamo ahaitorou, deʼ ngini ngarouhali niatagongo.

²³O hangihara gënanga Tahidöaka inïtuku-tukuika, mamoi iböto inihuloko ngini nimarubaiha otonakoka, deʼ inipito-pitoko ngini, matero-tero ngini ongekomo yobobidoku o nyawa.”